អតីតប្រធានគណបក្សប្រឆាំងលោក សម រង្ស៊ី នៅតែបន្តចោទប្រកាន់ថា អ្នកនៅពីក្រោយការបាញ់សម្លាប់លោក កែម ឡី ជាមន្ត្រីជាន់ខ្ពស់រដ្ឋាភិបាល ហើយថាពួកគេនឹងត្រូវនាំខ្លួនទៅកាត់ទោសជុំវិញសំណុំរឿងឃាតកម្មនេះ ដោយថាលោកមានភស្តុតាងរឹងមាំ ផ្តល់ឲ្យពីក្រុមហ៊ុនប្រងឥន្ទនៈរបស់អាមេរិកឈ្មោះ Chevron ។
លោក សម រង្ស៊ី អះអាងតាមវីដេឃ្លីបមួយ ដែលបង្ហោះលើគេហទំព័ទរបស់លោក នាថ្ងៃពុធនេះថា លោកទទួលបានឯកសារជាវីដេអូ ពីក្រុមហ៊ុន Chevron ហើយ ក្រោយពីលោកបានប្តឹងទៅតុលាការអាមេរិកទាមទារឲ្យក្រុមហ៊ុននេះបង្ហាញភស្តុតាងដែលថតបានដោយកាមេរ៉ាសុវត្ថិភាពបំពាក់នៅកន្លែងកើតហេតុ។
អតីតមេដឹកនាំបក្សប្រឆាំងរូបនេះ អះអាងទៀតថា ភស្តុតាងនេះ នឹងអាចឲ្យតុលាការអន្តរជាតិ ចាប់អ្នកពាក់ព័ន្ធជាមន្ត្រីរដ្ឋាភិបាល ដែលលោកចោទថា នៅពីក្រោយការបាញ់សម្លាប់លោក កែម ឡី មកផ្តន្ទាទោសបាន។
អតីតប្រធានគណបក្សប្រឆាំងលោក សម រង្ស៊ី
VOD មិនទាន់អាចសុំការបញ្ជាក់ពីក្រុមហ៊ុន Chevron បាននៅឡើយទេ ជុំវិញការអះអាងរបស់លោក សម រង្ស៊ីនេះ។
ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន ហៅការអះអាងរបស់លោក សម រង្ស៊ី នេះថា អាចជាការមិនពិតច្រើនជាង។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
បើតាមអ្នកនាំពាក្យបក្សកាន់អំណាចរូបនេះ សំណុំរឿងបាញ់សម្លាប់លោក កែម ឡីនេះ នឹងត្រូវបិទបញ្ចប់ ត្រឹមផ្តន្ទាទោសជនដៃដល់ម្នាក់ឈ្មោះ ជួប សម្លាប់ រួចរាល់ហើយ។
អ្នកវិភាគនយោបាយ លោក ឯម សុវណ្ណារ៉ា និយាយថា សំណុំរឿងនេះ មិនអាចទាក់ទាញទឹកចិត្តអ្នកតាមដានសង្គម និងអ្នកមានភក្តីភាពជាមួយលោក កែម ឡី ឲ្យជឿលើរដ្ឋាភិបាលថាកំពុងខិតខំលុបបំបាត់និទណ្ឌភាពទេ បើសំណុំរឿងនេះត្រូវបិទបញ្ចប់ត្រឹមផ្តន្ទាទោសជនជាប់ចោទតែម្នាក់នោះ។
អ្នកវិភាគនយោបាយ លោក ឯម សុវណ្ណារ៉ា
លោក កែម ឡី ដែលគេស្កាល់ថាជាអ្នកវិភាគហ៊ានរិះគន់រដ្ឋាភិបាលឥតសំចៃមាត់ ត្រូវបានខ្មាន់កាំភ្លើង បាញ់សម្លាប់លោក នៅហាងលក់ទំនិញមួយ ក្នុងស្ថានីយ៍ប្រេងឥន្ទនៈកាល់តិចជាប់ស្តុបបូកគោ ដែលស្ថានីយ៍ប្រេងនេះជារបស់ក្រុមហ៊ុន Chevron មានការិយាល័យកណ្តាលនៅអាមេរិក។ ក្រោយឃាតកម្មពីរឆ្នាំមកនេះ តុលាការបានផ្តន្ទាទោស ឈ្មោះ អឿត អាង ហៅ ជួប សម្លាប់ តែម្នាក់គត់ ឲ្យជាប់គុកអស់មួយជីវិត ដែលតុលាចោទថា បុរសម្នាក់នេះ ជាអ្នកបាញ់សម្លាប់លោក កែម ឡី។