របាយការណ៍៖ ក្រុមចារកម្មចិនកំពុងលួចទិន្នន័យពីស្ថាប័នបោះឆ្នោតកម្ពុជា

Fire Eye ព្រមានពីការលួចយកទិន្នន័យរបស់ក្រុមលួចព័ត៌មានបច្ចេកវិទ្យារបស់ចិនឈ្មោះ «TEMP PERISCOPE»

ក្រុមហ៊ុនអ៊ីនធើណែតសហរដ្ឋអាមេរិកមួយឲ្យដឹងថា ភ្នាក់ងារចារកម្មចិនកំពុងវាយប្រហារ និងលួចយកទិន្នន័យពីក្រសួង-ស្ថាប័នរដ្ឋមួយចំនួនរបស់កម្ពុជា ខណៈដែលការបោះឆ្នោតថ្នាក់ជាតិខិតជិតចូលមកដល់។ 

ក្រុមហ៊ុនអ៊ីនធើណែតសហរដ្ឋអាមេរិកមួយឲ្យដឹងថា ភ្នាក់ងារចារកម្មចិនកំពុងវាយប្រហារ និងលួចយកទិន្នន័យពីក្រសួង-ស្ថាប័នរដ្ឋមួយចំនួនរបស់កម្ពុជា ខណៈដែលការបោះឆ្នោតថ្នាក់ជាតិខិតជិតចូលមកដល់។

ក្រុមហ៊ុនសន្ដិសុខតាមប្រព័ន្ធអ៊ីនធើណែត Fire Eye ដែលមានមូលដ្ឋាននៅសហរដ្ឋអាមេរិក នៅថ្ងៃពុធនេះ បានបង្ហាញរបាយការណ៍សិក្សាស្រាវជ្រាវរបស់ខ្លួន ដោយរកឃើញថា ក្រុមលួចព័ត៌មានបច្ចេកវិទ្យារបស់ចិនឈ្មោះ «TEMP PERISCOPE» កំពុងលុកលុយ និងលួចយកទិន្នន័យ ពីស្ថាប័នគណៈកម្មាធិការជាតិរៀបចំការបោះឆ្នោត និងស្ថាប័នដទៃទៀត ដូចជា ក្រសួងមហាផ្ទៃ ក្រសួងការបរទេសកម្ពុជា ក្រសួងសេដ្ឋកិច្ច និងហិរញ្ញវត្ថុ ស្ថាប័នព្រឹទ្ធសភា និងស្ថាប័នព័ត៌មានផ្សេងទៀត។

ក្រុមហ៊ុន Fire Eye រកឃើញទៀតថា ក្រុមចារកម្មចិនកំពុងឃ្លាំមើលយ៉ាងដិតដល់លើការបោះឆ្នោតនៅកម្ពុជា​ និងថែមទាំងបានព្យាយាមលួចយកទិន្នន័យពីកូនស្រីអតីតមេដឹកនាំបក្សប្រឆាំង លោក កឹម សុខា​ គឺកញ្ញា កឹម មនោវិទ្យា ទៀតផង។

បើតាមរបាយការណ៍ដដែលនេះ ក្រុមចារកម្មចិន TEMP PERISCOPE កំពុងធ្វើការនេះឲ្យរដ្ឋាភិបាលចិន និងធ្លាប់លួចយកព័ត៌មានពីបណ្ដាក្រុមហ៊ុន និងស្ថាប័នផ្សេងទៀត នៅសហរដ្ឋអាមេរិក អឺរ៉ុប តៃវ៉ាន់ និងហុងកុងជាដើម៕

សង្ខេបទិន្នន័យនៃសកម្មភាពដែលក្រុម TEMP.Periscope ធ្វើសកម្មភាពលួចទិន្នន័យសំខាន់ពីមុខសញ្ញារបស់ពួកគេ (រូបភាព៖ Fire Eyes)

CCIM/VOD

រក្សាសិទ្វិគ្រប់យ៉ាង។ គ្មានផ្នែកណាមួយនៃអត្ថបទនេះ អាចត្រូវបានផលិតឡើងវិញក្នុងការបោះពុម្ពផ្សាយ ការសរសេរឡើងវិញ ឬ ការចែកចាយឡើងវិញដោយគ្មានការអនុញ្ញាតជាលាយលក្ខណ៍អក្សរឡើយ។