រដ្ឋាភិបាលគ្រោងសហការជាមួយដៃគូអភិវឌ្ឍន៍ផ្សេងៗក្នុងការកែច្នៃដំឡូងមីឲ្យមានគុណភាពត្រូវតាមបទដ្ឋានអន្តរជាតិ និងនាំចេញដើម្បីផ្គត់ផ្គង់តម្រូវការទីផ្សារពិភពលោក។
សេចក្តីប្រកាសព័ត៌មានរួមគ្នារវាងកម្មវិធីអភិវឌ្ឍន៍អង្គការសហប្រជាជាតិ(UNDP) និង ក្រសួងពាណិជ្ជកម្មកម្ពុជា ចេញផ្សាយកាលពីថ្ងៃទី១០ខែមិថុនាបានបង្ហាញលទ្ធផលនៃការសិក្សាថា កម្ពុជា ជាប្រទេសមានលទ្ធភាពអាចកែច្នៃដំឡូងមីដើម្បីផ្គត់ផ្គង់តម្រូវការពិភពលោកបាន។
តាមសេចក្តីប្រកាសព័ត៌មានគម្រោងនេះ នឹងចាប់ផ្តើមក្រោយការបោះឆ្នោតអាណត្តិទី៦ ដោយកែច្នៃទៅជាម្សៅដំឡូងមី ចំណែកកាកសំណល់កែច្នៃទៅជាចំណីសត្វនិងជីធម្មជាតិ។
អ្នកនាំពាក្យក្រសួងពាណិជ្ជកម្មលោក ស៊ាង ថៃ ប្រាប់វីអូឌីបន្ថែមតាមទូរសព្ទថា មុនចាប់ផ្តើមគម្រោងនេះ មានការសិក្សាច្បាស់លាស់ដោយរកឃើញថា ពិភពលោកកំពុងតែយកចិត្តទុកដាក់លើដំណាំដំឡូងមី សម្រាប់ទ្រទ្រង់ជីវិតបន្ទាប់ពីស្រូវ និងពោត។
រដ្ឋមន្រ្តីក្រសួងពាណិជ្ជកម្មលោក ប៉ាន សូរស័ក្តិថ្លែងក្នុងសេចក្តីប្រកាសព័ត៌មាននោះថា ដើម្បីអាចពន្លឿនគម្រោងនេះ រដ្ឋាភិបាលត្រូវការសហការជាមួយដៃគូអភិវឌ្ឍន៍ផ្សេង ដើម្បីបំពេញចន្លោះខ្វះខាតរវាងអ្នកវិនិយោគនិងកសិករដាំដុះ។
ចំណែកឯលោក រីឆាត ម៉ាស្ហល (Richard Marshall) សេដ្ឋកិច្ចវិទូនៃអង្គការ UNDP ប្រចាំប្រទេសកម្ពុជា លើកឡើងក្នុងសេក្តីប្រកាសព័ត៌មាននោះដែរថា ដំឡូងមីមានសារៈសំខាន់ក្នុងការជួយដល់សេដ្ឋកិច្ចកម្ពុជានិងកែច្នៃយកទៅប្រកួតប្រជែងលើទីផ្សារអន្តរជាតិបាន។
របាយការណ៍សិក្សារបស់ក្រសួងពាណិជ្ជកម្មបង្ហាញថា កសិករ៩ម៉ឺនគ្រួសារកំពុងតែដាំដំឡូងមី លើផ្ទៃដីកន្លះលានហិកតានៅក្នុងខេត្តចំនួន១៣។