លោកនាយករដ្ឋមន្ត្រី ហ៊ុន សែន បានសម្រេចតែងតាំងកូនប្រុសច្បងរបស់លោក ជាអគ្គមេបញ្ជាការរងកងទ័ពជាផ្លូវការហើយ បន្ទាប់ពីក្បាលម៉ាស៊ីនជាន់ខ្ពស់ក្នុងជួរកងទ័ព ត្រូវបានរុះរើកាលពីពាក់ចុងខែមុន។
ក្នុងព្រះរាជក្រឹត្យចុះថ្ងៃទី៦ កក្កដា ព្រះករុណាសម្តេចព្រះបរមនាថ នរោត្តម សីហមុនី បានត្រាស់បង្គាប់តែងតាំងលោក ហ៊ុន ម៉ាណែត ជាអគ្គមេបញ្ជាការរងកងយោធពលខេមរភូមិន្ទ។
សេចក្ដីសម្រេចតែងតាំងលោក ហ៊ុន ម៉ាណែត ជាអគ្គមេបញ្ជាការរងកងទ័ពនេះ ត្រូវបានធ្វើឡើងទៅតាមសំណើរបស់លោកនាយករដ្ឋមន្ត្រី ហ៊ុន សែន។
លោកហ៊ុន ម៉ាណែត បច្ចុប្បន្នមានតួនាទីជាមេបញ្ជាការកងទ័ពជើងគោក ជានាយសេនាធិការចម្រុះស្តីទី ជាមេបញ្ជាការកម្លាំងពិសេសប្រឆាំងភេរវកម្ម និងជាមេបញ្ជាការរងនៃកងអង្គរក្សរបស់ឪពុកលោកផ្ទាល់។ ក្រៅពីតួនាទីជានាយទាហាន លោកហ៊ុន ម៉ាណែត ក៏ជាសមាជិកគណៈកម្មាធិការកណ្តាលរបស់បក្សប្រជាជនកម្ពុជាផងដែរ ។
នាយកប្រតិបត្តិសម្ព័នគណនេយ្យភាពសង្គមលោក សន ជ័យ យល់ថា ការស្នើសុំព្រះមហាក្សត្រតែងតាំងកូនខ្លួនក្នុងតំណែងណាមួយនោះមិនខុសនោះទេ ដោយសារកម្ពុជាពុំមានច្បាប់ស្តីពីទំនាស់ផលប្រយោជន៍ ប៉ុន្តែ លោកបានចោទសួរអំពីឯករាជ្យភាពរបស់មន្ត្រីយោធា ខណៈដែលលោក ហ៊ុន ម៉ាណែត ក៏ជាសមាជិកជាន់ខ្ពស់របស់បក្សកាន់អំណាចផងនោះ។
នាយកប្រតិបត្តិសម្ព័នគណនេយ្យភាពសង្គមលោក សន ជ័យ
លោក ហ៊ុន ម៉ាណែត ត្រូវបានតែងតាំងជាអគ្គមេបញ្ជាការរងកងទ័ព តែរយៈពេលប៉ុន្មានសប្តាហ៍ប៉ុណ្ណោះមុនការបោះឆ្នោតថ្នាក់ជាតិថ្ងៃទី២៩ កក្កដាខាងមុខ។
ស្របពេលនេះដែរ អង្គការសិទ្ធិមនុស្សអន្តរជាតិ Human Right Watch បានលើកឡើងថា គណបក្សកាន់អំណាចរបស់លោក ហ៊ុន សែន កំពុងប្រើប្រាស់ឧត្តមសេនីយមួយចំនួនក្នុងជួររដ្ឋាភិបាល ឲ្យធ្វើការឃោសនាបម្រើបក្សរបស់ខ្លួន ដែលផ្ទុយទៅនឹងច្បាប់កម្ពុជាក្នុងនោះក៏មានលោក ហ៊ុន ម៉ាណែត ផងដែរ។
ប្រធាន Human Rights Watch លោក ប្រេត អាដាម បានលើកឡើងក្នុងសេចក្តីថ្លែងការណ៍នៅថ្ងៃនេះ
លោកឧត្តមសេនីយឯក ហ៊ុន ម៉ាណែត បានចូលបម្រើការងារជាកងទ័ពនៅឆ្នាំ១៩៩៥ ជាឆ្នាំដែលលោកត្រូវទៅរៀននៅសាលាបណ្ឌិតសភាយោធាអាមេរិកផងដែរ។ លោកត្រូវបានលោក ហ៊ុន សែន តម្លើងឋានៈជាមេបញ្ជាការរងនៃបញ្ជាការដ្ឋានកងទ័ពជើងគោកកាលពីដើមឆ្នាំ២០១១ ហើយនៅឆ្នាំ២០១៣ លោកត្រូវបានតម្លើងជាឧត្តមសេនីយ៍ឯកផ្កាយបី ហើយបើតាមការអះអាងរបស់ក្រសួងការពារជាតិកាលពីចុងខែមិថុនាកន្លងមកនេះ លោកអាចនឹងតម្លើងជានាយឧត្តមសេនីយ៍ផ្កាយ៤ នាពេលឆាប់ៗនេះ៕