ព្រះមហាក្សត្រ សម្ដេចព្រះបរមនាថ នរោត្ដម សីហមុនី និងមាតារបស់ទ្រង់ បានឧបត្ថម្ភព្រះរាជទ្រព្យសរុប ១លានដុល្លារ ទៅដល់មូលនិធិមន្ទីរពេទ្យគន្ធបុប្ផាកាលពីថ្ងៃអង្គារកន្លងមកនេះ។ នេះបើតាមយោងការចុះផ្សាយរបស់ទីភ្នាក់ងារព័ត៌មានកម្ពុជា AKP។
AKP បានចុះផ្សាយបន្តថា ព្រះមហាក្សត្រ នរោត្ដម សីហមុនី បានប្រទានថវិកា ១លានដុល្លារ ដល់លោកវេជ្ជបណ្ឌិត ដេនិស ឡូរ៉ង់ (Denis Laurent) អំឡុងពេលវេជ្ជបណ្ឌិតរូបនេះចូលបង្គំគាល់ព្រះមហាក្សត្រនៅក្នុងរាជវាំងកាលពីថ្ងៃទី១០ ខែកក្កដា។
មន្ទីរពេទ្យគន្ធបុប្ផា ត្រូវបានដំណើរការ និងគ្រប់គ្រងដោយលោកវេជ្ជបណ្ឌិត Beat Richer (បេអាត រិចឆ្នឺរ) តាំងពីឆ្នាំ១៩៩២មកម្ល៉េះ និងទទួលបានជំនួយពីរដ្ឋាភិបាលកម្ពុជា មូលនិធិគន្ធបុប្ផាប្រទេសស្វីស និងសប្បុរសជនដទៃទៀត ដើម្បីផ្ដល់ការព្យាបាលដល់កុមារកម្ពុជាដោយឥតគិតកម្រៃ។
របាយការណ៍គ្រឹះស្ថានអង្គរ បានឲ្យដឹងថា មូលនិធិមន្ទីរពេទ្យគន្ធបុប្ផា ក៏ទទួលបានថវិកាជាង ២.៧១លានដុល្លារផងដែរនៅក្នុងរយៈពេល ៦ខែដើមឆ្នាំនេះ ដែលត្រូវប្រាក់ឧបត្ថម្ភនេះត្រូវបានកាត់ចេញពីចំណូលបានមកពីការលក់សំបុត្រចូលទស្សនាតំបន់អង្គារ៕
