កម្មករបម្រើការងារនៅរោងចក្រមួយក្នុងខេត្តតាកែវ អះអាងថា មុនដួលសន្លប់ ពួកគេបានធុំក្លិនអ្វីម្យ៉ាង ខណៈអាជ្ញាធរអះអាងថា កាលដួលសន្លប់របស់កម្មករទាំងនោះ ពាក់ព័ន្ធនឹងកង្វះជាតិស្ករ។
កម្មកររាប់រយនាក់បម្រើការងារនៅរោងចក្រ ប៉ុន តឹសហ្វូតវែរ ស្ថិតក្នុងឃុំតាភេម ស្រុកត្រាំកក់ បានដួលសន្លប់ជាបន្តបន្ទាប់រយៈពេល ៣ថ្ងៃចាប់តាំងបីថ្ងៃទី៩ ដល់ថ្ងៃទី១១ ខែកក្កដានេះ។
គណៈកម្មាការទប់ស្កាត់ការដួលសន្លប់ បានវាយតម្លៃថា ការដួលសន្លប់របស់កម្មករទាំងនោះដោយសារខ្សោយ និងដួលតាមគ្នា បន្ទាប់ពីពួកគេបានឃើញកម្មការិនីម្នាក់រងរបួសដៃពេលកំពុងបំពេញការងារ។
អ្នកស្រី ហ៊ឹម ពិសី កម្មការីម្នាក់ដែលសន្លប់តាំងពី៣ថ្ងៃមុន ហើយទើបចេញពីមន្ទីរពេទ្យនៅថ្ងៃនេះនោះ បាននិយាយថា មុនពេលដួលសន្លប់គាត់បានធុំក្លិនអ្វីម្យ៉ាង ហើយក្រោយមកធ្វើឲ្យថប់ចុងដង្ហើម និងណែនដើមទ្រូងដួលសន្លប់តែម្តង។
អ្នកស្រី ហ៊ឹម ពិសី កម្មការីម្នាក់ដែលសន្លប់
កម្មករម្នាក់ទៀតដែលបានដួលសន្លប់តាំងពីទី១០កក្កដា ហើយទើបចេញពីមន្ទីរពេទ្យនៅថ្ងៃនេះដែរ អ្នកស្រី ចាន់ ដារី ឲ្យដឹងថា គាត់មិនបានធ្វើការកន្លែងអគារដែលកម្មករម្នាក់រងបួសដៃនោះទេ ហើយថា គាត់បានដួលសន្លប់បន្ទាប់ពីធុំក្លិនកាវសម្រាប់បិទស្បែកជើង និងក្លិនអ្វីម្យ៉ាងទៀតដែលអ្នកស្រីពិបាកបង្ហាញ។
អ្នកស្រី ចាន់ ដារី កម្មការិនីដែលដួលសន្លប់
ប្រធាន ប.ស.ស សាខាខេត្តតាកែវ លោក សួន វណ្ណៈ និយាយថា តាមការស្រាវជ្រាវរបស់គណៈកម្មាការទប់ស្កាត់ការដួលសន្លប់ បានរកឃើញថា កម្មករទាំងនោះដួលសន្លប់ដោយសារខ្សោយ និងដួលសន្លប់តាមគ្នា ដែលលោកថា ការដួលសន្លប់តាមគ្នានោះ គឺជាជំងឺ «ស្នេហ៍ហ្វូង» មិនមែនបណ្តាលមកពីជាតិពុលអ្វីនោះទេ។
ប្រធាន ប.ស.ស សាខាខេត្តតាកែវ លោក សួន វណ្ណៈ
មន្រ្តីអង្គការសង់ត្រាល់ ដែលចុះអង្កេតដល់កន្លែងកើតហេតុផ្ទាល់ អ្នកស្រី ធី ផល្លា មិនយល់ស្របនឹងការរកឃើញនេះទេ ដោយអ្នកស្រីថា តាមចុះសង្កេតផ្ទាល់ គឺបរិយាកាសក្នុងរោងចក្រនោះមិនល្អ។ អ្នកស្រីស្នើទៅក្រសួងការងារ និងថៅកែរោងចក្រ ត្រូវកែលំអរបរិយាកាសក្នុងរោងចក្រទាំងកំដៅ សម្ភារៈ និងអនាម័យជាដើម។
មន្រ្តីអង្គការសង់ត្រាល់ អ្នកស្រី ធី ផល្លា
កម្មករជាង ៣០០នាក់បម្រើការងារនៅរោងចក្រ ប៉ុន តឹសហ្វូតវែរ បាននដួលសន្លប់ជាបន្តបន្ទាប់រយៈពេលបីថ្ងៃ ដែលការដួលសន្លប់ក្នុងចំនួនច្រើនបែបនេះត្រូវបានអាជ្ញាធរអះអាងថា បន្ទាប់ពីកម្មករទាំងនោះបានឃើញកម្មការិនីម្នាក់រងរបួសលើចុងម្រាមដៃ ហើយហូរឈាមខ្លាំង និងស្រែកខ្លាំងៗ ខណៈកម្មករសរុបជាង៤ពាក់នាក់បម្រើការងារនៅរោងចក្រនោះ៕
