ធនាគារពិភពលោក កាលពីម្សិលមិញបានសម្រេចផ្ដល់ឥណទានគ្មានការប្រាក់ដល់កម្ពុជាការអនុវត្តគម្រោងបង្កើនគុណភាពអប់រំ និងពង្រីកបណ្ដាញផ្លូវគមនាគមន៍។
ក្នុងសេចក្តីប្រកាសព័ត៌មានដែលចេញដោយធនាគារពិភពលោក កាលពីម្សិលមិញ រាជរដ្ឋាភិបាលកម្ពុជា និងធនាគារពិភពលោក បានចុះហត្ថលេខាលើកិច្ចព្រមព្រៀងលើគម្រោងវិនិយោគធំពីរ គឺគម្រោងកែលម្អការអប់រំឧត្តមសិក្សា ហៅកាត់ថា HEICP និងគម្រោងគ្រប់គ្រងសម្បតិ្តផ្លូវថ្នល់ជំហានទី២ ជាហិរញ្ញប្បទានបន្ថែម ដែលហៅកាត់ថា RAMP II ដែលមានទឹកប្រាក់សរុបចំនួនប្រមាណ ២០០លានដុល្លារអាមេរិក។
តាមប្រភពដដែល គម្រោងកែលម្អការអប់រំឧត្តមសិក្សា ហៅកាត់ថា HEICP ដែលមានតម្លៃទឹកប្រាក់ ៩០លានដុល្លារអាមេរិក ធនាគារពិភពលោកនឹងជួយដល់កម្ពុជាក្នុងការបង្កើនគុណភាពប្រព័ន្ធអប់រំឧត្តមសិក្សា ការស្រាវជ្រាវ និងដើម្បីពង្រីកឲ្យកាន់តែទូលាយថែមទៀតនូវលទ្ធភាពទទួលបានការអប់រំឧត្តមសិក្សាសម្រាប់ក្រីក្រ។ សម្រាប់ គម្រោង RAMP II ដែលមានតម្លៃទឹកប្រាក់ចំនួន ១១០លានដុល្លារអាមេរិក មានគោលដៅកែលម្អលក្ខខណ្ឌ សុវត្ថិភាព និងភាពធន់អាកាសធាតុរបស់ផ្លូវជាតិលេខ៤។
គម្រោងនេះ ក៏ផ្តោតទៅលើការបង្កើនគុណភាពស្ថានីយថ្លឹងទម្ងន់រថយន្តធំដែលមានស្រាប់ កាត់បន្ថយហានិភ័យនៃការដឹកលើសទម្ងន់ ដំឡើងសញ្ញាតំបន់ល្បឿនមានកម្រិត សញ្ញានាំផ្លូវ ប្រព័ន្ធភ្លើងបំភ្លឺប្រើថាមពលពន្លឺព្រះអាទិត្យ និងកាមេរ៉ាចាប់ល្បឿនបើក បរ។
គួរបញ្ជាក់ផងដែរថា គម្រោងទាំងពីរនេះទទួលហរិញ្ញប្បទានតាមរយៈឥណទានពីសមាគមអភិវឌ្ឍន៍អន្តរជាតិ (IDA) ដែលជាមូលនិធិរបស់ធនាគារពិភពលោកសម្រាប់ប្រទេសក្រីក្រជាងគេ ហើយជាកម្ចីគ្មានការប្រាក់ដែលត្រូវសងឲ្យគ្រប់វិញរយៈពេល ៣៨ឆ្នាំ រួមមានរយៈពេលអនុគ្រោះ៦ឆ្នាំផងដែរ។