គណៈកម្មាធិការជាតិរៀបចំការបោះឆ្នោត (គ.ជ.ប) បានបង្កើតកម្មវិធីគ្រប់គ្រងនិងស្វែងរកការិយាល័យបោះឆ្នោត ដើម្បីឲ្យម្ចាស់ឆ្នោតមានភាពងាយស្រួលក្នុងការស្វែងរកទីតាំងការិយាល័យបោះឆ្នោតរបស់ខ្លួន។
សេចក្តីប្រកាសព័ត៌មានរបស់ គ.ជ.ប ដែលចេញផ្សាយនៅថ្ងៃនេះបានឲ្យដឹងថា ស្ថាប័ននេះបានផលិតកម្មវិធីមួយដែលអនុញ្ញាតឲ្យ ភាគីពាក់ព័ន្ធទាំងអស់ចូលស្វែងរកទីតាំងការិយាល័យបោះឆ្នោត តាមផែនទី Google Mapដោយគ្រាន់តែចូលទៅកាន់គេហទំព័រ www.pollingstation.org.kh ដើម្បីស្វែងរកទិន្នន័យតាមរយៈការជ្រើសរើស ឃុំ សង្កាត់ ក្រុង ស្រុក ខណ្ឌ រាជធានី ខេត្ត ឬស្វែងរកទីតាំងតាមផែនទី Google Map ដោយចុចតាមនិមិត្តសញ្ញាសម្គាល់ទីតាំងគណៈកម្មការរាជធានី ខេត្តរៀបចំការបោះឆ្នោតទាំង ២៥។
តាមសេចក្តីប្រកាសព័ត៌មានដដែល កម្មវិធីនេះដាក់ឲ្យប្រើប្រាស់ ចាប់ពីថ្ងៃទី១៣ ខែកក្កដា ឆ្នាំ២០១៨ នេះតទៅ។
