ប្រជាពលរដ្ឋខ្មែរនៅប្រទេសមួយចំនួនអះអាងថា នឹងធ្វើបាតុកម្មជំរុញឲ្យអន្តរជាតិកុំឲ្យទទួលស្គាល់ការបោះឆ្នោតនាចុងខែកក្កដានេះទេ។
តាមលិខិតដែលផ្សព្វផ្សាយជាសាធារណៈនៅក្នុងបណ្តាញសង្គមបង្ហាញថា ប្រជាពលរដ្ឋខ្មែរនៅក្រៅប្រទេសគ្រោងធ្វើបាតុកម្មនៅថ្ងៃទី២៨ខែកក្កដា មុនថ្ងៃបោះឆ្នោតមួយថ្ងៃរួមមាននៅប្រទេសអាេមរិក បារាំង និងកូរ៉េខាងត្បូងជាដើម។
លោក យឹម ស៊ីណន ដែលអះអាងថា ជាតំណាងឲ្យអ្នកដឹកនាំបាតុកម្មនៅប្រទេសកូរ៉េខាងត្បូង ប្រឆាំងការបោះឆ្នោត បានបញ្ជាក់ប្រាប់វីអូឌីតាមបណ្តាញសង្គមនាថ្ងៃនេះថា សហគមន៍ខ្មែរ និងសហគមន៍កូរ៉េ ដែលធ្វើការផ្នែកលទ្ធិប្រជាធិបេយ្យ នឹងនាំគ្នាកាន់ភ្លើងទៀនប្រជាធិបតេយ្យបំភ្លឺដល់កម្ពុជាដែលកំពុងរុំព័ន្ធដោយភាពងងឹត ហើយក៏ជាការថ្កោលទោសការបោះឆ្នោតខាងមុនផងដែរ។
លោកស៊ីណនបញ្ជាក់ថា បាតុកម្មនេះគ្រោងធ្វើនៅប្រទេសកូរ៉េ នាថ្ងៃទី២៨ ខែកក្កដា វេលាម៉ោង៥ល្ងាច ដល់ម៉ោង១០យប់ ពោលគឺមុនមួយថ្ងៃ នៃការបោះឆ្នោតជាតិ ដោយមានអ្នកចូលរួមតិចបំផុត១ពាន់នាក់ ដោយក្នុងនោះក៏មានវត្តមានលោកស្រី មួរ សុខហួរ និងលោក យ៉ែម បុញ្ញឬទ្ធិ អតីតតំណាងរាស្ត្រគណបក្សសង្គ្រោះជាតិចូលរួមផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ប្រជាពលរដ្ឋខ្មែរនៅប្រទេសកូរ៉េធ្វើបាតុកម្មនោះមិនអាចជំរុញឲ្យអន្តរជាតិដាក់សម្ពាធមកលើកម្ពុជាបាននោះទេ ដោយសារកម្ពុជាធ្វើការបោះឆ្នោតស្របតាមគោលការប្រជាធិបតេយ្យ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
តំណាងរាស្ត្រអតីតបក្សប្រឆាំងលោក អូ ច័ន្ធរ័ត្ន មានប្រសាសន៍ថា ការធ្វើបាតុកម្មជាសិទ្ធិរបស់ប្រជាពលរដ្ឋខ្មែរគ្របរូប ស្របតាមច្បាប់រដ្ឋធម្មនុញ្ញ។ ករណីនេះលោកថា គោរពសិទ្ធិអ្នកធ្វើបាតុកម្ម ខណៈលទ្ធិប្រជាធិបតេយ្យនៅកម្ពុជាដើរថយក្រោយ។
តំណាងរាស្ត្រអតីតបក្សប្រឆាំងលោក អូ ច័ន្ធរ័ត្ន
អ្នកនាំពាក្យ គណៈកម្មាធិការណ៍ជាតិរៀបចំការបោះឆ្នោត លោក ហង្ស ពុទ្ធា ថ្លែងថានេះជាការយល់ឃើញរបស់ក្រុមពលរដ្ឋដែលរស់នៅក្រៅប្រទេសទាំងនោះ។ ប៉ុន្តែលោក យល់ថាការសម្រេចយ៉ាងណាទៅលើការបោះឆ្នោតនាខែ កក្កដាខាងមុខអាស្រ័យលើប្រជាពលរដ្ឋខ្មែរដែលកំពុងរស់នៅកម្ពុជាសព្វថ្ងៃ។
លោកបន្ថែមយ៉ាងដូច្នេះថា៖«ការកំណត់ជោគវាសនារបស់ប្រទេសកម្ពុជាគឺប្រជាពលរដ្ឋដែលមានឈ្មោះក្នុងបញ្ជី ប្រជាពលរដ្ឋដែលរស់នៅក្នុងប្រទេស ជាអ្នកសម្រេចជោគវាសនាដោយខ្លួនឯង»។
ការបោះឆ្នោតជាតិជ្រើសរើសតំណាងរាស្រ្តសភានឹងប្រព្រឹត្តទៅនាថ្ងៃទី២៩ ខែកក្កដាខាងមុខ ដោយមានការចូលរួមពីបក្សនយោបាយចំនួន ២០បក្ស ប៉ុន្តែ ការបោះឆ្នោតនេះ ស្ថិតនៅក្រោមការរិះគន់ពីសំណាក់សហរដ្ឋអាមេរិក និងសហភាពអឺរ៉ុប ខណៈគណបក្សប្រឆាំងដ៏ធំមិនត្រូវបានអនុញ្ញាតឲ្យចូលរួមប្រកួតប្រជែងនោះឡើយ៕
