សហភាពអឺរ៉ុបបានព្រមានជាថ្មីទៀតថា ការដកប្រព័ន្ធអនុគ្រោះពន្ធ EBA ពីកម្ពុជា ជាជម្រើសចុងក្រោយ បើការខិតខំប្រឹងប្រែងរបស់ខ្លួន ក្នុងការជំរុញប្រជាធិបតេយ្យត្រូវបានបរាជ័យ ។
ការព្រមានជាថ្មី ពីសហភាពអឺរ៉ុបនេះ ធ្វើឡើងក្រោយ១ថ្ងៃ បន្ទាប់ពីគណៈប្រតិភូរបស់ខ្លួន បានបញ្ចប់ការស្វែងរកការពិតនៅកម្ពុជា ដោយប្រើរយៈពេល៧ថ្ងៃ ចុះជួបមន្ត្រីរដ្ឋាភិបាល តំណាងសហជីព សង្គមស៊ីវិល ពាណិជ្ជករ អង្គការសហប្រជាជាតិ និងអង្គការពលកម្មអន្តរជាតិនៅកម្ពុជា។
សេចក្តីប្រកាសព័ត៌មានចុះថ្ងៃទី១២ខែកក្កដា បានលើកឡើងថា ការពិភាក្សានិងប្រមូលព័ត៌មានក្នុងអំឡុងពេលបេសកកម្មនៃសហភាពអឺរ៉ុប ផ្តោតយកចិត្តទុកដាក់លើការធ្លាក់ចុះធ្ងន់ធ្ងរ សិទ្ធិនយោបាយ សិទ្ធិបោះឆ្នោត សិទ្ធិអង្គការសង្គមស៊ីវិល យន្តការដោះស្រាយជម្លោះដីធ្លី និងការគំរាមកំហែងធ្ងន់ធ្ងរដល់សេរីភាពសមាគម និងសិទ្ធិចរចាជាសមូហភាព។
សហភាពអឺរ៉ុប បានបង្ហាញជំហតាមសេចក្តីប្រកាសននេះថា ការវិវត្តនយោបាយនៅកម្ពុជាថ្មីៗនេះ ថាការគួរឲ្យព្រួយបារម្ភ និង ព្រមានថា ៖
តាមសេចក្តីប្រកាសដដែល គោលការណ៍ពាណិជ្ជកម្មរបស់សហភាពអឺរ៉ុប បានផ្តោតសំខាន់ទៅលើយុត្តិធម៌សង្គមជាទិដ្ឋភាពចាំបាច់បំផុត ការគោរពសិទ្ធិមនុស្ស សេរីភាពជាមូលដ្ឋាន និងបទដ្ឋានការងារ។ អឺរ៉ុបបញ្ជាក់ថា ប្រព័ន្ធអនុគ្រោះ EBA នេះ មានឥទ្ធិពលសំខាន់ទៅលើការអភិវឌ្ឍ និងការលុបបំបាត់ភាពក្រីក្រនៅកម្ពុជា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ទទួលស្គាល់ថា ការកាត់ផ្តាច់ប្រព័ន្ធអនុគ្រោះពន្ធកូតាពីសហភាពអឺរ៉ុបនេះ ពិតជាបានប៉ះពាល់ធ្ងន់ធ្ងរ ដល់កម្មករ និងនិយោជិតក្នុងវិស័យកាត់ដេរ។
ប៉ុន្តែអ្នកនាំពាក្យរូបនេះ អះអាងថា បើសហភាពអឺរ៉ុបកាត់ផ្តាច់ប្រព័ន្ធអនុគ្រោះពន្ធនេះមែន លោកថាជាការវាយតម្លៃខុសរបស់ ក្រុមប្រទេសលោកសេរីមួយនេះ ដោយថាការវិវត្តនយោបាយនៅកម្ពុជា កំពុងជំរុញយន្តការប្រជាធិបតេយ្យ ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បង្ហាញពីការព្រួយបារម្ភថា ប្រព័ន្ធអនុគ្រោះពន្ធនេះ ស្ថិតក្នុងភាពផុយស្រួយ បើប្រទេសលោកសេរីនៅតែមិនជឿលើប្រព័ន្ធប្រជាធិបតេយ្យ របស់រដ្ឋាភិបាលនោះ ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា
អ្នកជំនាញសេដ្ឋកិច្ចលោក ង៉ែត ជូ ធ្លាប់អះអាងថា ប្រព័ន្ធអនុគ្រោះពន្ធ របស់សហភាពអឺរ៉ុប បានជំរុញដល់អត្រាកំណើតសេដ្ឋកិច្ចកម្ពុជាដល់ទៅ៤០% និងថា បានផ្តល់ឱកាសឲ្យអ្នកវិនិយោគផ្នែកវិស័យកាត់ដេរ និងកសិកម្ម មានលទ្ធភាពប្រកួតប្រជែងជាមួយប្រទេសជិតខាង ។
របាយការណ៍របស់គណកម្មការអឺរ៉ុប ដែលបានចេញផ្សាយកាលពីខែមេសាកន្លងទៅ ប្រទេសកម្ពុជាបាននាំចេញទំនិញទៅ សហគមន៍អឺរ៉ុបក្នុងឆ្នាំ២០១៧ មានទំហំជាសាច់ប្រាក់ជិត៦ពាន់លានដុល្លារ។ តាមរបាយកាណ៍ផ្ញើទៅកាន់នាយករដ្ឋមន្រ្តី ហ៊ុន សែន ដែលធ្វើឡើងដោយរដ្ឋមន្រ្តីក្រសួងពាណិជ្ជកម្មលោក ប៉ាន សូរស័ក្ត កាលពីចុងឆ្នាំមុន កម្ពុជាចំណេញប្រាក់ពីការមិនបង់ពន្ធនៅពេលនាំទំនិញចូលទីផ្សារអឺរ៉ុបចំនួន៦៧៦លានដុល្លារកាលពីឆ្នាំ២០១៦កន្លងទៅ៕