កងរាជអាវុធហត្ថលើផ្ទៃប្រទេសបានប្រកាសចាត់ការផ្លូវច្បាប់លើបុរសម្នាក់ដែលជាអតីតមន្រ្តីក្នុងស្ថាប័ននេះ ក្នុងខេត្តកំពង់ធំថា បានផ្សព្វផ្សាយព័ត៌មានមិនពិតធ្វើឲ្យប៉ះពាល់ដល់កិត្តិយសកងរាជអាវុធហត្ថ។
នៅក្នុងបណ្ដាញសង្គមឈ្មោះ «យមរាជលោកិយ៍» ដែលត្រូវបានចែកចាយតគ្នា បុរសម្នាក់ឈ្មោះ សន សំនៀង បានផ្សាយផ្ទាល់ជាបន្តបន្ទាប់ថាខ្លួនត្រូវបានបាត់បង់ដំណែងក្នុងកងរាជអាវុធហត្ថទាំងអយុត្តិធម៌ ដោយសារការចាប់បទល្មើសគ្រឿងញៀន ១៧២ គីឡូក្រាម កាលពីឆ្នាំ ២០១៣ ដែលលោកថាជារបស់បុគ្គលមានឥទ្ធិពល។
នេះបើតាមការលើកឡើងក្នុងសេចក្ដីប្រកាសព័ត៌មានមួយចុះថ្ងៃទី ១៥ ខែ កក្កដា របស់កងរាជអាវុធហត្ថលើផ្ទៃប្រទេសស្ដីពីការបង្ហោះព័ត៌មានតាមបណ្ដាញសង្គមហ្វេសប៊ុកឈ្មោះ «យមរាជ លោកិយ៍» និងការផ្សព្វផ្សាយតាមប្រព័ន្ធព័ត៌មានមួយចំនួនទៀត ដែលថាជាព័ត៌មានមិនពិតធ្វើឲ្យប៉ះពាល់ដល់កិត្តិយសរបស់កងរាជអាវុធហត្ថ។
តាមសេចក្ដីប្រកាសព័ត៌មាននោះ អ ហ បានលើកឡើងថាបុរសឈ្មោះ សន សំនៀង ជាអតីតនាយទាហានកងរាជអាវុធហត្ថខេត្តកំពង់ធំ ហើយត្រូវបានលុបឈ្មោះចេញពីក្របខណ្ឌតាំងពីឆ្នាំ ២០១៧ ដោយសារបានប្រព្រឹត្តកំហុសជាបន្តបន្ទាប់ៗ ។
ជាមួយគ្នានោះដែរ អ ហ ក៏លើកឡើងដែរថារាល់ការផ្សព្វផ្សាយរបស់បុគ្គលនោះជាព័ត៌មានមិនពិត និង ប្រកាសចាត់វិធានការផ្លូវច្បាប់ ថាបើអតីតមន្រ្តីកងរាជអាវុធហត្ថរូបនោះមិនបញ្ឈប់ការផ្សព្វផ្សាយព័ត៌មាននោះ៕