អ្នកមានជម្លោះដីធ្លីមកពីសហគមន៍បុរីកីឡានិងអតីតបឹងកក់ នៅថ្ងៃព្រឹកនេះ បាននាំគ្នាតវ៉ានៅមុខគេហដ្ឋានអ្នកស្រី ស៊ុយ សុផាន ជាថ្មីទៀត ដោយទាមទារឲ្យម្ចាស់ក្រុមហ៊ុន ផាន អ៊ីម៉ិច ដោះស្រាយបញ្ចប់បញ្ហាដីធ្លីដែលសល់ បន្ទាប់ពីសាលាក្រុងបិទបញ្ចប់ដំណោះស្រាយករណីវិវាទនេះកាលពីឆ្នាំមុន។
អ្នកស្រី ភោគ សុភីន មកពីសហគមន៍បុរីកីឡា ប្រាប់អ្នកសារព័ត៌មានថា មូលហេតុដែលពួកគាត់នាំគ្នាតវ៉ានៅមុខគេហដ្ឋានអ្នកស្រី ស៊ុយ សុផាន ជាថ្មី គឺដើម្បីទាមទារឲ្យដោះស្រាយបញ្ហាដីធ្លីដល់ពួកគាត់ ២០ គ្រួសារ ដោយអ្នកស្រីអះអាងថា នៅមិនទាន់ទទួលបានសំណង ហើយក៏មិនព្រមទៅរស់នៅភូមិអណ្តូងនោះដែរ។
អ្នកស្រី ភោគ សុភីន មកពីសហគមន៍បុរីកីឡា
ពលរដ្ឋម្នាក់មកពីអតីតតំបន់បឹងកក់ អ្នកស្រី ស៊ាវ ណារ៉េត លើកឡើងថា សំណងដែលផ្ដល់ឲ្យពួកគាត់ចំនួន ៨000 ដុល្លារ និង លុយខ្មែរ ២ លានរៀលកន្លងមកនោះ អ្នកស្រីថា ធ្វើឡើងដោយការគំរាមកំហែង។ អ្នកស្រីបន្តថា ពួកគាត់តវ៉ានៅមុខគេហដ្ឋានអ្នកស្រី ស៊ុយ សុផាន នាថ្ងៃនេះ ដើម្បីទាមទារឲ្យអ្នកស្រី ស៊ុយ សុផានផ្ដល់សំណងបន្ថែមដល់ពួកគាត់ ១៦២ គ្រួសារ ដោយថា បច្ចុប្បន្នពួកគាត់ជួបការលំបាកបញ្ហាជីវភាពខ្លាំង ក្រោយពីមានការបណ្ដេញដោយបង្ខំ។
ពលរដ្ឋម្នាក់មកពីអតីតតំបន់បឹងកក់ អ្នកស្រី ស៊ារ ណារ៉េត
ប្រធានក្រុមហ៊ុន ផានអ៊ីម៉ិច អ្នកស្រី ស៊ុយ សុផាន បានប្រាប់វីអូឌីតាមទូរស័ព្ទថា ក្រុមហ៊ុនបានប្រគល់រឿងទៅឲ្យសាលា រាជធានីរួចរាល់អស់ហើយ។
ប្រធានក្រុមហ៊ុន ផានអ៊ីម៉ិច អ្នកស្រី ស៊ុយ សុផាន
អ្នកនាំពាក្យសាលារាជធានីភ្នំពេញ លោក ម៉េត មាសភក្ដីសុំមិនធ្វើអត្ថាធិប្បាយ ចំពោះករណីនេះ។
លោកថា៖«គិតថាដូចជាមិនមានរឿងអីថ្មី សម្រាប់ការជូនជាព័ត៌មានរឿងដដែល ទាំងបុរីកីឡា ទាំងបឹងកក់ អធ្យាស្រ័យសុំ អញ្ចឹងម៉ង។ ឥឡូវដូចជាមិនមានរឿងអីថ្មីសម្រាប់ជូនព័ត៌មានថ្មី អ្នកស្រីដែលត្រូវដោះស្រាយបានដោះស្រាយហើយ អ្នកស្រីដែលមិនត្រូវបានដោះស្រាយក៏បានជម្រាបជូនហើយ។ ហេតុអីមិនដោះស្រាយមូលហេតុចេះៗ សាលារាជធានីភ្នំពេញបានធ្វើកិច្ចការនេះអស់ហើយ»។
កាលពីសប្ដាហ៍មុន ក្រុមប្រជាពលរដ្ឋមកពីសហគមន៍ទាំងពីរនេះ ប្រមាណ ៤០ នាក់ ក៏បាននាំគ្នាទៅតវ៉ានៅមុខគេហដ្ឋានអ្នកស្រី ស៊ុយ សុផាន ម្ដងរួចមកហើយ ដោយទាមទារឲ្យប្រធានក្រុមហ៊ុន ផានអុីម៉ិច ផ្ដល់សំណងសមរម្យឲ្យពួកគាត់បន្ថែមទៀត និងដោះស្រាយបញ្ជាប់បញ្ហាដីធ្លីនៅបុរីកីឡាផងដែរ។ ក្រុមអ្នកតវ៉ា អះអាងថា ប្រសិនបើអ្នកស្រី ស៊ុយ សុផាន មិនព្រមដោះស្រាយបញ្ហាដីធ្លីនេះ ពួកគេនឹងនាំគ្នាទៅតវ៉ានៅមុខគេដ្ឋានអ្នកស្រីស៊ុយ សុផាន បន្តទៀត ។