ប្រជាពលរដ្ឋមួយចំនួនដែលពុលស្រាសនៅស្រុកស្នួលខេត្តក្រចេះ បានចេញពីមន្ទីរពេទ្យក្រោយសម្រាកព្យាបាលនៅមន្ទីរពេទ្យ ខណៈដែលអ្នកភូមិ១៨នាក់ទៀតនៅកំពុងព្យាបាលនៅឡើយ។
អភិបាលស្រុកស្នួល លោក គង់ គឹមនី បានប្រាប់វីអូឌីនៅថ្ងៃនេះថា មកទល់ពេលនេះ អ្នកជំងឺដែលសម្រាកនៅមន្ទីរពេទ្យគឺមាននៅសល់ត្រឹមតែ១៨នាក់ប៉ុណ្ណោះ ក្នុងនោះមានស្រ្តីចំនួន០៦នាក់។
បើតាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី១៥ ខែកក្កដា ឆ្នាំ២០១៨ អ្នកភូមិមកពីស្រុកស្នួលខេត្តក្រចេះបានស្លាប់៣នាក់ និង៦២នាក់ទៀតបានចូលមន្ទីរពេទ្យបង្អែកស្នួល មន្ទីរពេទ្យបង្អែកខេត្ត និងមន្ទីរពេទ្យកាល់ម៉ែត្រ ដោយសារតែពួកគាត់ទាំងនោះ បានពុលស្រាសដែលមានសារធាតុមេតាណុលនៅពេលដែលពួកគាត់ចូលរួមក្នុងកម្មវិធីពិសារអាហារជុំគ្នា បុណ្យសព និងសែនអ្នកតា។
តាមសេចក្តីប្រកាសព័ត៌មានដដែល ក្រសួងសុខាភិបាលបានអំពាវនាវឲ្យអាជ្ញាធរខេត្តក្រចេះ និងស្ថាប័នពាក់ព័ន្ធឲ្យជួយរឹតបន្តឹងការត្រួតពិនិត្យក្នុងការផលិត ការចែកចាយនិងការលក់ស្រាសជាប្រចាំ និងបញ្ឈប់ការផលិតនិងការចែកចាយស្រាសដែលមិនត្រឹមត្រូវតាមបច្ចេកទេស ព្រមទាំងរឹតបន្ធឹងការត្រួតពិនិត្យដោយហ្មត់ចត់នៅតាមច្រកចូល នូវផលិតផលស្រាស និងសារធាតុសម្រាប់ផលិតស្រាសខុសពីបច្ចេកទេស។ ជាងនេះទៅទៀត ក្រសួងសុខាភិបាលក៏បានអំពាវនាវឲ្យប្រជាពលរដ្ឋទាំងអស់ ត្រូវតែបញ្ឈប់ការពិសារស្រាសដែលផលិតមិនមានបច្ចេកទេសត្រឹមត្រូវ។
គួរឲ្យបញ្ជាក់ផងដែរថា នេះជាករណីមួយទៀតនៅខេត្តក្រចេះ បន្ទាប់ពីមានការពុលទឹកព្រែកទេរដែលធ្វើឲ្យស្លាប់មនុស្ស ១៣នាក់ និង១៣៤នាក់ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ កាលពីថ្ងៃទី៧ ខែឧសភា។
