អ្នកតាមដានបញ្ហាសង្គមបង្ហាញចំណាប់អារម្មណ៍ខុសគ្នាជុំវិញសកម្មភាពរបស់រដ្ឋមន្ត្រីមួយចំនួនដែលចុះមូលដ្ឋានបង្រៀនពលរដ្ឋពីរបៀបគូសសន្លឹកឆ្នោតឲ្យចំបក្សប្រជាជនកម្ពុជាក្នុងយុទ្ធនាការឃោសនាបោះឆ្នោតនេះ។
អ្នកវិភាគមួយចំនួនយល់ថាសកម្មភាពនេះគឺកំពុងមើលងាយពលរដ្ឋខ្លួន និងខុសតួនាទី ខណៈមួយចំនួនទៀតយល់ផ្សេងពីនេះ។
ប្រធានសមាគមសម្ព័ន្ធនិស្សិតបញ្ញាវន្តខ្មែរលោក មួង សូនី មានប្រសាសន៍ថា ការចុះទៅឃោសនាសម្រាប់បក្សខ្លួនរបស់រដ្ឋមន្ត្រីនេះគឺមិនមែនជាបញ្ហានោះទេ តែលោកថាសកម្មភាពដែលបង្រៀនពលរដ្ឋពីរបៀបគូស ហើយគូសឲ្យចំបក្សប្រជាជននោះគឺពិបាកទទួលយកបាន និងមើលងាយប្រជាពលរដ្ឋរបស់ខ្លួន។
ប្រធានសមាគមសម្ព័ន្ធនិស្សិតបញ្ញាវន្តខ្មែរលោក មួង សូនី
ប្រធានក្រុមអ្នកវិភាគវ័យក្មេងលោក ហង្ស វិទូ មានប្រសាសន៍ថាការចេញមុខផុលផុសរបស់រដ្ឋមន្ត្រីទៅមូលដ្ឋានបង្រៀនពលរដ្ឋឲ្យគូសសន្លឹកឆ្នោតយកបក្សប្រជាជននេះ គឺជារឿងដែលគួរឲ្យអស់សំណើច ខណៈដែលដៃគូរប្រកួតដ៏ធំរបស់បក្សប្រជាជនត្រូវបានផាត់ចេញពីការបោះឆ្នោតនោះ។
ប្រធានក្រុមអ្នកវិភាគវ័យក្មេងលោក ហង្ស វិទូ
អ្នកនាំពាក្យគណបក្សប្រជាជនកម្ពុជាលោក ឈឹម ផលវរុណ មិនចាប់អារម្មណ៍ចំពោះការការរិះគន់ទាំងនេះឡើយ ដោយថាការចុះទៅណែនាំឲ្យពលរដ្ឋពីរបៀបគូសសន្លឹកឆ្នោតគឺបង្ការកុំឲ្យសន្លឹកឆ្នោតខូចតែប៉ុណ្ណោះ។
អ្នកនាំពាក្យគណបក្សប្រជាជនកម្ពុជាលោក ឈឹម ផលវរុណ
មួយរយៈចុងក្រោយនេះគេឃើញមានរដ្ឋមន្ត្រីមួយចំនួននៃរដ្ឋាភិបាលបក្សប្រជាជនបានចុះឃោសនាបក្សនៅតាមមូលដ្ឋានដោយបានបង្ហាញទៅកាន់ពលរដ្ឋពីរបៀបគូសសន្លឹកឆ្នោត និងជំរុញឲ្យពលរដ្ឋទាំងនោះគូសឲ្យចំលេខ២០ដែលជាលេខរៀងរបស់បក្សប្រជាជនផងដែរ។
រដ្ឋមន្ត្រីទាំងនោះរួមមានរដ្ឋមន្ត្រីក្រសួងការងារលោក អ៊ិត សំហេង រដ្ឋមន្ត្រីក្រសួងរ៉ែ និងថាមពល លោក ស៊ុយ សែម រដ្ឋមន្ត្រីក្រសួងទេសចរណ៍លោក ថោង ខុន និងរដ្ឋមន្ត្រីក្រសួងធម្មការលោក ហ៊ឹម ឆែម ជាដើម។
ទោះជាយ៉ាងណាសម្រាប់អ្នកវិភាគបញ្ហាសង្គមលោកបណ្ឌិត ប៉ា ច័ន្ទរឿន យល់ថាការចុះទៅឃោសនារបស់រដ្ឋមន្ត្រីទាំងនេះគឺមិនខុសនោះទេប្រសិនជាការឃោសនានៅក្រៅម៉ោងការងារ ហើយចំពោះការបង្រៀនពលរដ្ឋឲ្យគូសចំបក្សប្រជាជនវិញលោកយល់ថាជាការសកម្មភាពមួយក្នុងចំណោមសកម្មភាពផ្សេងទៀតនៃការឃោសនាប៉ុណ្ណោះ។
អ្នកវិភាគបញ្ហាសង្គមលោកបណ្ឌិត ប៉ា ច័ន្ទរឿន
បើតាមលោក ប៉ា ច័ន្ទរឿន កម្ពុជាគួរមានការកម្រិតឲ្យបានជាក់លាក់លើធនធាននៃគណបក្សនយោបាយដែលបានចូលរួមបោះឆ្នោតដើម្បីឲ្យការឃោសនាមានតម្លាភាពសម្រាប់គ្រប់បក្សនយោបាយទាំងអស់។
យុទ្ធនាការឃោសនាបោះឆ្នោតជ្រើសតាំងតំណាងរាស្ត្រអាណត្តិទី៦ ចាប់ផ្តើមពីថ្ងៃទី៧ រហូតដល់ថ្ងៃទី២៧ កក្កដានេះ ដោយមានគណបក្សនយោបាយចំនួន ២០ចូលរួមឃោសនា៕