ក្រសួងធនធានទឹក និងឧតុនិយម នៅថ្ងៃនេះ បានសម្រេចបិទផ្លូវជាតិលេខ ៤ មិនឲ្យធ្វើចរាចរណ៍ឆ្លងកាត់បណ្តោះអាសន្ន ។
ក្នុងសេចក្ដីប្រកាសព័ត៌មានរបស់ក្រសួងក្រសួងធនធានទឹក និងឧតុនិយម ចេញផ្សាយនៅថ្ងៃនេះបានឲ្យដឹងថា ការផ្អាកការធ្វើដំណើរឆ្លងកាត់ផ្លូវជាតិលេខ ៤ ជាបណ្ដោះអាសន្នចាប់ពីចំណុចស្ពានអូរគគី(ព្រំប្រទល់ខេត្តកំពង់ស្ពឺ និងខេត្តព្រះសីហនុ) នៅថ្ងៃទី១៧ ខែកក្កដានេះ ដោយសារមានទឹកជំនន់ហូរកាត់លើផ្លូវ។
អភិបាលខេត្តព្រះសីហនុ លោក យន្ត មីន ប្រាប់វីអូឌីនៅថ្ងៃនេះថា បច្ចុប្បន្ន ជំនន់ទឹកភ្លៀងកំពុងហូរកាត់ផ្លូវនៅឡើយ បន្ទាប់មានភ្លៀងធ្លាក់ខ្លាំងរយៈពេលប៉ុន្មានថ្ងៃនេះ។
អភិបាលខេត្តព្រះសីហនុ លោក យន្ត មីន
បើតាមទំព័រហ្វេសប៊ុករបស់ក្រសួងធនធានទឹក និងឧតុនិយមនៅព្រឹកនេះ ស្ថានភាពទឹកជំនន់នៅតាមបណ្តោយផ្លូវជាតិលេខ ៤ ត្រង់ចំណុចស្ពានអូរគគី បានស្រកចុះវិញជាបណ្តើរៗហើយ ខណៈនៅចំណុចស្ពានសំរោង តាមបណ្តោយផ្លូវជាតិលេខ ៤ ដដែល ទឹកកំពុងកើនឡើងខ្លាំងនិងបានជន់ហូរកាត់លើផ្លូវជាតិជាថ្មីម្តងទៀតផងដែរ។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា មានប្រសាសន៍ថា ភ្លៀងធ្លាក់២ សប្ដាហ៍នេះ បានធ្វើឲ្យខេត្តមួយចំនួនមានទឹកជំនន់ ដូចជា ប៉ៃលិន បាត់ដំបង់ កំពង់ស្ពឺ និងខេត្តព្រះសីហនុ ប៉ុន្តែមិនបណ្ដាលឲ្យគ្រោះថ្នាក់ដល់អាយុជីវិតមនុស្ស និងមិនប៉ះពាល់អ្វីធ្ងន់ធ្ងរទេ។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា
លោកបន្តថា ក្រៅពីជំនន់ទឹកភ្លៀងនៅខេត្តខាងលើនេះដែរ ក៏មានខេត្តមួយចំនួននៅតំបន់ទន្លេមេគង្គលើ មានដូចជា ខេត្តស្ទឹងត្រែង ក្រចេះ ត្បូងឃ្មុំ និងកំពង់ចាម នឹងទទួលរងទឹកជំនន់ ដោយសារទឹកទន្លេមេគង្គកើនឡើងផងដែរ។ ទោះជាយ៉ាងណា លោក អំពាវនាវទៅប្រជាពលរដ្ឋទាំងអស់មានការប្រុងប្រយ័ត្ន ខណៈដែលខេត្តមួយចំនួនកំពុងប្រឈមនឹងទឹកជំនន់ ដោយសារ ទឹកទន្លេមេគង្គកំពុងកើនឡើងផងដែរ។
បើតាមសេចក្ដីប្រកាសព័ត៌មានរបស់ក្រសួងធនធានទឹកនិងឧតុនិយមចេញផ្សាយកាលថ្ងៃទី២៦ ខែមេសា ឆ្នាំ២០៨ ឲ្យដឹងថា កម្ពុជាអាចប្រឈមនឹងជំនន់ទឹកភ្លៀងខ្ពស់ជាង២០១៧ ជាពិសេស នៅខែសីហានិងខែកញ្ញា ដោយសារ នៅក្នុងខែទាំងពីរនេះ អាចមានបាតុភូតធម្មជាតិកើតឡើងបណ្ដាលឲ្យមានភ្លៀងធ្លាក់ច្រើន។