អង្គការសង្គមស៊ីវិល និងអតីតបក្សប្រឆាំងថា ការអនុម័តច្បាប់របស់រដ្ឋសភានីតិកាលទី៥នេះមានទាំងច្បាប់ដែលល្អនិងច្បាប់ដែលធ្វើឲ្យប៉ះពាល់ដល់សិទ្ធិសេរីភាព ខណៈរដ្ឋសភាអះអាងថាការអនុម័តច្បាប់ជាង១០០នេះ គឺសម្រាប់បម្រើជាប្រយោជន៍ដល់សង្គមជាតិ។
នាយកអង្គការតម្លាភាពកម្ពុជា លោក ព្រាប កុល មានប្រសាសន៍ថា ច្បាប់មួយចំនួនមានលក្ខណៈអវិជ្ជមាន បើតាមការសង្កេតឃើញរបស់លោកពីប្រតិកម្មរបស់សាធារណៈជន និងការវិភាគរបស់អ្នកឯកទេសច្បាប់។
នាយកអង្គការតម្លាភាពកម្ពុជា លោក ព្រាប កុល
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា ការអនុម័តច្បាប់ក្នុងអាណត្តិទី៥នេះ មួយភាគធំបម្រើផលប្រយោជន៍ ប៉ុន្តែក៏មានច្បាប់ខ្លះមានភាពចម្រូងចម្រាសផងដែរ។
ចំណែកអតីតតំណាងរាស្រ្តគណបក្សសង្គ្រោះជាតិ លោក អ៊ូ ចាន់រ័ត្ន មានប្រសាសន៍ថា រដ្ឋសភាបានអនុម័តច្បាប់ច្រើនដែលមានប្រយោជន៍ដល់ប្រជាជន ប៉ុន្តែមានច្បាប់ជាពិសេសច្បាប់សំខាន់ៗមួយចំនួនដែលអនុម័តចុងក្រោយមានផលប៉ះពាល់ដល់ប្រទេសជាតិ។
អតីតតំណាងរាស្រ្តគណបក្សសង្គ្រោះជាតិ លោក អ៊ូ ចាន់រ័ត្ន
ឆ្លើយតបនឹងការលើកឡើងនេះ អ្នកនាំពាក្យរដ្ឋសភា លោក ឡេង ប៉េងឡុង មានប្រសាសន៍ថា នេះជាសិទ្ធិបញ្ចេញមតិ ហើយការអនុម័តច្បាប់ជាង១០០ ដោយសភាជាតិក្នុងនីតិកាលទី៥នេះ មានការចូលរួមយោបល់ជាច្រើន។ លោកបន្តទៀតថាការលើកឡើងពីភាពចម្រូងចម្រាសនៃច្បាប់ទាំងនោះ វាជារឿងធម្មតានិងទូទៅប៉ុណ្ណោះសម្រាប់ប្រទេសប្រជាធិបតេយ្យ។
អ្នកនាំពាក្យរដ្ឋសភា លោក ឡេង ប៉េងឡុង
យោងតាមការចុះផ្សាយរបស់ទីភ្នាក់ងារសារព័ត៌មាន AKP ចេញផ្សាយកាលពីថ្ងៃទី១៥ ខែ កក្កដា ២០១៨ រដ្ឋសភាកម្ពុជា បានអនុម័តច្បាប់បានចំនួន១០៩ក្នុងរយៈពេល៥ឆ្នាំនេះ។
តាមប្រភពដដែលនៅក្នុងរយៈពេល៥ឆ្នាំនេះ រដ្ឋសភាបានបើកកិច្ចប្រជុំគណៈអចិន្រ្ដៃយ៍ចំនួន៩៧លើក ប្រជុំពេញអង្គ៦៥លើក និងប្រជុំវិសាមញចំនួន១១លើក ។