កងរាជអាវុធហត្ថលើផ្ទៃប្រទេស ប្រកាសចល័តទ័ពកម្លាំងចំនួន៨០០នាក់ ទៅចូលរួមក្នុងពិធីបើកការដ្ឋានសាងសង់ទីលានបាញ់គ្រាប់ពិតនៅក្នុងខេត្តកំពង់ឆ្នាំង ដែលនឹងប្រព្រឹត្តទៅនៅថ្ងៃសៅរ៍ ទី២១ ខែកក្កដាខាងមុខនេះ។
យោងតាមសេចក្តីប្រកាសព័ត៌មានរបស់កងរាជអាវុធហត្ថលើផ្ទៃប្រទេស ចេញផ្សាយនៅថ្ងៃទី ១៧ ខែកក្កដា បានឲ្យដឹងថា សាលាកងរាជអាវុធហត្ថកំបូលនិងពីបញ្ជាការដ្ឋានកងរាជអាវុធលើផ្ទៃប្រទេស នឹងចល័តកម្លាំងកងរាជអាវុធហត្ថពីភ្នំពេញ ទៅកាន់មជ្ឈមណ្ឌលហ្វឹកហ្វឺនភ្នំជុំរាយខេត្តកំពង់ឆ្នាំង ដើម្បីចូលរួមក្នុងពិធីបើកការដ្ឋានសាងសង់ទីលានបាញ់គ្រាប់ពិត។
ប្រភពដដែលក៏បានបញ្ជាក់ថា កម្លាំងនេះពុំមានបំពាក់អាវុធយុទ្ធភណ្ឌទេ ហើយទៅកាន់កន្លែងប្រារព្ធពិធីចាប់ពីថ្ងៃទី១៩ ខែកក្កដា និងត្រឡប់មកកាន់អង្គភាពវិញនៅថ្ងៃទី២១ កក្កដា។
កាលពីថ្ងៃទី១២ ខែកក្កដា កងរាជអាវុធហត្ថលើផ្ទៃប្រទេស ក៏បានចល័តកម្លាំង ៨០០នាក់ ពីរាជធានីភ្នំពេញទៅខេត្តស្វាយរៀង ដើម្បីចូលរួមក្នុងពិធីអបអរសាទរខួបអនុស្សាវរីយ៍លើកទី២៥ ទិវារាជអាវុធហត្ថ និងបានចល័តចូលភ្នំពេញវិញនៅថ្ងៃទី១៤ ខែកក្កដា។