អាជ្ញាធរខេត្តជាប់មាត់សមុទ្រចំនួនពីរបានជម្លៀសប្រជាពលរដ្ឋជិត១០០០គ្រួសារ គេចចេញពីតំបន់មានទឹកជំនន់ទៅកន្លែងមានសុវត្ថិភាព បន្ទាប់ភ្លៀងធ្លាក់ខ្លាំង២សប្តាហ៍កន្លងទៅនេះ។
បើតាមក្រសួងធនធានទឹក និងឧតុនិយមថាខេត្តដែលទទួលរងផលប៉ះពាល់ ដោយសារជំនន់ទឹកភ្លៀងខ្លាំងជាងគេ គឺមានខេត្តកោះកុង និងខេត្តព្រះសីហនុ ។
អភិបាលខេត្តកោះកុង លោកស្រី មិថុនា ភូថង ប្រាប់វីអូឌីនៅថ្ងៃនេះថា ភ្លៀងធ្លាក់ ២ សប្ដាហ៍កន្លងមក បានធ្វើឲ្យទឹកជន់លិច ហើយអាជ្ញាធរបានជម្លៀសពលរដ្ឋ៤២៧ គ្រួសារចេញពីលំនៅឋាន។ លោកស្រីបន្តថា ពលរដ្ឋដែលរងផលប៉ះពាល់ទាំងនេះនៅស្រុកចំនួន៤ ហើយថា ពេលនេះអាជ្ញាធរកំពុងតែរកដំណោះស្រាយបញ្ជៀសការលំបាកនិងគ្រោះថ្នាក់ផ្សេងៗ។
អភិបាលខេត្តកោះកុង លោកស្រី មិថុនា ភូថង
ដោយឡែក អភិបាលខេត្តព្រះសីហនុ លោក យន្ត មីន មានប្រសាសន៍ថា ផ្ទះប្រជាពលរដ្ឋជាង ៣០០ គ្រួសារ នៅក្នុងឃុំអូរបាក់រទេះ ស្រុកកំពង់សីលា ក៏ត្រូវបានទឹកជន់។ លោកបន្តថា រហូតមកដល់ថ្ងៃនេះ អាជ្ញាធរបានជម្លៀសប្រជាពលរដ្ឋទៅកន្លែងសុវត្តិភាពអស់ហើយ។
អភិបាលខេត្តព្រះសីហនុ លោក យន្ត មីន
អ្នកនាំពាក្យគណៈកម្មាធិការគ្រប់គ្រងគ្រោះមហន្តរាយ លោក កែវ វី ឲ្យដឹងថា ភ្លៀង ២ សប្ដាហ៍បានបង្កផលប៉ះពាល់ដល់ប្រជាពលរដ្ឋនៅក្នុងខេត្តមួយចំនួន មានដូចជា បាត់ដំបង ខេត្តកោះកុង កំពង់ស្ពឺ កំពត និងខេត្តព្រះសីហនុ ប៉ុន្តែក្នុងចំណោមនោះ ខេត្តកោះកុងរងផលប៉ះពាល់ច្រើនជាងគេ។ លោកបន្តថា បច្ចុប្បន្ននេះ អាជ្ញាធរនៅតាមខេត្តនីមួយៗបានត្រៀមកម្លាំងសម្រាប់ជួយសង្គ្រោះប្រជាពលរដ្ឋ ប្រសិនបើមានទឹកជំនន់ដោយសារ ទឹកភ្លៀង និងទឹកជំនន់។ លោកអំពាវនាវទៅប្រជាពលរដ្ឋ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្ន ដោយថា ដើម្បីជៀសវាងនូវគ្រោះថ្នាក់ផ្សេងៗ ដែលកើតឡើងជាយថាហេតុ។
អ្នកនាំពាក្យគណៈកម្មាធិការគ្រប់គ្រងគ្រោះមហន្តរាយ លោក កែវ វី
ទោះជាយ៉ាងណា កាលពីម្សិលមិញ ក្រសួងធនធានទឹក និងឧតុនិយម បានសម្រេចបិទផ្លូវជាតិលេខ ៤ មិនឲ្យធ្វើចរាចរណ៍ឆ្លងកាត់បណ្តោះអាសន្ន បន្ទាប់ពីមានភ្លៀងធ្លាក់ខ្លាំងធ្វើឲ្យទឹកជន់លិចលើផ្លូវនោះ ហើយរហូតមកដល់ពេលនេះ មិនទាន់បើកវិញនៅឡើយ។
បើតាមសេចក្ដីប្រកាសព័ត៌មានរបស់ក្រសួងធនធានទឹកនិងឧតុនិយមចេញផ្សាយកាលថ្ងៃទី២៦ ខែមេសា ឆ្នាំ២០៨ ឲ្យដឹងថា កម្ពុជាអាចប្រឈមនឹងជំនន់ទឹកភ្លៀងខ្ពស់ជាង២០១៧ ជាពិសេស នៅខែសីហានិងខែកញ្ញា ដោយសារ នៅក្នុងខែទាំងពីរនេះ អាចមានបាតុភូតធម្មជាតិកើតឡើងបណ្ដាលឲ្យមានភ្លៀងធ្លាក់ច្រើន។