ព្យុះត្រូពិកទី៩ នឹងមានឥទ្ធិពលមកលើប្រទេសកម្ពុជា ដែលបណ្តាលឲ្យមានភ្លៀងធ្លាក់និងខ្យល់ខ្លាំងនៅក្នុងសប្តាហ៍នេះ ដែលអាចបង្កគ្រោះថ្នាក់ដល់ប្រជាពលរដ្ឋ។
ក្រសួងធនធានទឹក និង ឧតុនិយម នៅថ្ងៃទី ១៨ ខែកក្កដា ឆ្នាំ២០១៨នេះ បានចេញសេចក្តីជូនដំណឹងថា ប្រទេសកម្ពុជានឹងរង ឥទ្ធិពលព្យុះទី ៩ ដែលមានឈ្មោះថា ព្យុះ សុនទីញ (SON-TINH) ចាប់ពីថ្ងៃទី ១៩ រហូតដល់ថ្ងៃទី ២១ ខែ កក្កដា ឆ្នាំ២០១៨នេះ ហើយបង្កឲ្យមានភ្លៀងធ្លាក់រាយប៉ាយ ក្នុងក្របខណ្ឌទូទាំងប្រទេស។
តំបន់ជួរភ្នំ និងបណ្ដោយខេត្តដែលស្ថិតនៅតាមបណ្ដោយព្រំដែនកម្ពុជា-វៀតណាម មានភ្លៀងធ្លាក់ខ្លាំង។ហើយព្យុះនេះនឹង ធ្វើឲ្យតំបន់មាត់សមុទ្រមានភ្លៀងធ្លាក់ជោកជាំ លាយឡំជាមួយនឹងខ្យល់បក់បោកខ្លាំង និងមានរលកខ្ពស់ៗ។
ក្រសួងធនធានទឹក និងឧតុនិយម បានអំពាវនាវឲ្យប្រជាពលរដ្ឋមានការប្រុងប្រយ័ត្ន ជាពិសេសអ្នកនេសាទ អ្នកធ្វើដំណើរតាមសមុទ្រ និងប្រជាពលរដ្ឋដែលរស់នៅតាមតំបន់ទំនាបជាប់ផ្លូវទឹកនានា។
