អ្នកសង្កេតការណ៍ជាតិ ឃ្លាំមើលការបោះឆ្នោតនៅអាណត្តិថ្មីនេះ បានកើនឡើងជាង៣ដង បើធៀបទៅនឹងការបោះឆ្នោតជ្រើសតាំងតំណាងរាស្ត្រអាណត្តិមុន ខណៈក្រុមអង្គការសង្គមស៊ីវិលខ្លះបានប្រកាសដកខ្លួនដោយសំអាងពីការគំរាមផ្នែកនយោបាយ។
បណ្តុំអង្គការឃ្លាំមើលការបោះឆ្នោតហៅERA មានទាំងអង្គការខុមហ្វ្រែល និងអង្គការនិកហ្វិកផងនោះ បានប្រកាសដកខ្លួនចេញពីការឃ្លាំមើលដំណើរការបោះឆ្នោត នៅអាណត្តិថ្មីនេះ ដោយអះអាងថា បារម្ភពីសុវត្ថិភាព ក្រោយពីលោកនាយករដ្ឋមន្ត្រី ហ៊ុន សែន ថ្លែងជាសាធារណៈ បញ្ជាផ្ទាល់មាត់ ទៅក្រសួងមហាផ្ទៃស៊ើបអង្កេត ERA ដោយសង្ស័យថាបណ្តុះអង្គការទាំងនោះ អាចជាកន្លែងបង្កើតក្រុមបដិវត្តពណ៌ ប្រឆាំងរដ្ឋាភិបាល។
ដូចគ្នានេះដែរ អង្គការតម្លាភាពកម្ពុជា ដែលធ្លាប់ដាក់ពង្រាយអ្នកសង្កេតការណ៍ឃ្លាំមើលការបោះឆ្នោតដែរនោះ ក៏បានប្រកាសដកខ្លួន មិនដាក់អ្នកសង្កេតការណ៍ឃ្លាំមើលការបោះឆ្នោតដូចគ្នា។
គ.ជ.ប ចេញសេក្តីប្រកាសចុះថ្ងៃទី១៨ខែកក្កដាថា ការបោះឆ្នោតដែលគ្រោងធ្វើនៅថ្ងៃទី២៩ខែែកក្កដានេះ មានអ្នកសង្កេតការណ៍ដែលបានចុះឈ្មោះរួចហើយជិត៨ម៉ឺននាក់ មកពី១០៧ស្ថាប័ន ខណៈការបោះឆ្នោតជ្រើសតាំងតំណាងរាស្ត្រឆ្នាំ ២០១៣ មានអ្នកសង្កេតការណ៍ជាតិតែ ជាង២ម៉ឺន៥ពាន់នាក់(២៥៤៣១)ប៉ុណ្ណោះ។
យ៉ាងនេះក្តីសេចក្តីប្រកាស របស់ គ.ជ.ប នេះ មិនបានបញ្ជាក់ថា អង្គការ ឬសមាគមណាបានដាក់អ្នកសង្កេតការណ៍ច្រើនជាងគេនោះទេ ។ សមាជិក គ.ជ.ប និងជាអ្នកនាំពាក្យលោក ហង្ស ពុទ្ធា អះអាងថាលោកមិនទាន់អាចលំអិតលើសេចក្តីប្រកាសព័ត៌មាននេះបានទេ ដោយថាកំពុងជាប់ប្រជុំ។
មន្ត្រីឃ្លាំមើលការបោះឆ្នោតនៅអង្គការខុមហ្វ្រែល លោក កន សាវាង្ស និយាយថា មានអ្នកសង្កេតការណ៍ច្រើន មិនប្រាកដថា ដំណើរការបោះឆ្នោតនោះ ត្រឹមត្រូវ និងយុត្តិធម៌ទេ។ លោកថា ដរាបណាស្ថាប័ននោះ មិនត្រូវបានគេមើលឃើញថាជាស្ថាប័នឯករាជ្យ ឬមានការគំរាមកំហែងផ្នែកនយោបាយមុន និងអំឡុងពេលបោះឆ្នោតនោះ។
បើតាមលោក កន សាវាង្ស ការបោះឆ្នោតដែលចាត់ទុកថាសេរី ត្រឹមត្រូវ និងយុត្តិធម៌ លុះណាតែដំណាក់កាលធ្វើបញ្ជីបោះឆ្នោតមានតម្លាភាព បរិកាសនយោបាយ គ្មានការគំរាមកំហែង ការប្រកួតប្រជែងរបស់អ្នកនយោបាយស្មើភាពគ្នា មានការចូលរួម យ៉ាងកុះករពីពលរដ្ឋគ្រប់និន្នាការ និងត្រូវធានាពីឯករាជ្យភាពពីប្រព័ន្ធច្បាប់ជាដើម។
លោកថា៖«សរុបបមក ការវាយតម្លៃ ការអង្កេត មិនមែនមានតែមនុស្សច្រើនមួយ មើលត្រឹមថ្ងៃបោះឆ្នោត ចប់រួចរាល់ទេ វាត្រូវ ត្រូវការវាយតម្លៃដំណាក់កាលមួយទៅតំណាក់កាលមួយ ហើយសំយោគបញ្ចូលគ្នា ហើយវាត្រូវការភាពឯករាជ្យ របស់ស្ថាប័ន ហ្នឹងថែមទៀត ទើបធ្វើការវាយតម្លៃទៅលទ្ធផលវាអាចជឿទុកចិត្តបានគ្រប់ស្ថាប័ន»។
អ្នកវិភាគនយោបាយលោក បណ្ឌិត មាស នី ដាក់ការព្រួយបារម្ភថា ប្រព័ន្ធបោះឆ្នោតបច្ចុប្បន្ន កំពុងជំរុញឲ្យមានការបែកបាក់ជាតិ និងប្រឈមនឹងការដាក់ទណ្ឌកម្ម បើរដ្ឋាភិបាលថ្មី កើតក្រោយបោះឆ្នោត គ្មានការទទួលស្គាល់ពីក្រុមប្រទេសលោកសេរី ។
យ៉ាងណាក៏ដោយ គជប អះអាងក្នុងសេចក្តីប្រកាសព័ត៌មាននោះថា អ្នកសង្កេតការណ៍ជាតិ គឺជាសាក្សីនៃការបោះឆ្នោតដោយសេរី ត្រឹមត្រូវ និងយុត្តិធម៌ ។