រដ្ឋាភិបាលបានសម្រេចផ្តល់កម្ចីដល់ម្ចាស់រោងម៉ាស៊ីនកិនស្រូវ និងអ្នកនាំចេញ ដោយទទួលយកស្រូវក្នុងឃ្លាំងជាទ្រព្យបញ្ចាំដើម្បីទប់ស្កាត់ការធ្លាក់ថ្លៃស្រូវរបស់កសិករ។
ក្នុងសេចក្តីប្រកាសព័ត៌មានចុះថ្ងៃទី ១៨ កក្កដា ក្រសួងពាណិជ្ជកម្មឲ្យដឹងថាបន្ទាប់ពីក្រសួងបានចុះស្រាវជ្រាវ និងប្រមូលព័ត៌មាននៅក្នុងខេត្តបាត់ដំបង កំពង់ធំ កំពង់ចាម ព្រៃវែង និងតាកែវរួចមក រកឃើញថាតម្លៃស្រូវអ៊ីអ៊ែរក្នុងខែកក្កដានេះ បានធ្លាក់ចុះ១៥ភាគរយបើធៀបទៅនឹងខែមិថុនា ដោយសារភ្លៀងធ្លាក់ច្រើនធ្វើឲ្យមានសំណើមខ្លាំង រោងម៉ាស៊ីនកិនស្រូវ និងអ្នកនាំចេញមានកង្វះខាតទុនបង្វិលក្នុងការទិញស្រូវស្តុកទុក និងការធ្លាក់ចុះថ្លៃអង្ករអ៊ីអ៊ែរក្នុងទីផ្សារអន្តរជាតិ។
ក្រសួង បានបន្ថែមថាដើម្បីទប់ស្កាត់ការធ្លាក់ចុះតម្លៃនេះ ធនាគារអភិវឌ្ឍន៍ជនបទ បានសម្រេចពិនិត្យលទ្ធភាពក្នុងការផ្តល់ប្រាក់កម្ចីជូនម្ចាស់រោងម៉ាស៊ីនកិនស្រូវ និងអ្នកនាំចេញយកទៅធ្វើជាទុនបង្វិលដើម្បីប្រមូលទិញស្រូវអ៊ីអ៊ែរ ដោយយកស្រូវនៅក្នុងស្តុកជាវត្ថុបញ្ចាំ។
អ្នកនាំពាក្យក្រសួងពាណិជ្ជកម្មលោក ស៊ាង ថៃ មានប្រសាសន៍ថា វិធានការនេះធ្លាប់បានអនុវត្តន៍ និងមានប្រសិទ្ធិភាពម្តងរួចមកហើយកាលពីឆ្នាំ ២០១៦ ដើម្បីដោះស្រាយបញ្ហាតម្លៃស្រូវចុះថោករបស់ប្រជាកសិករ។
អ្នកនាំពាក្យក្រសួងពាណិជ្ជកម្មលោក ស៊ាង ថៃ
ក្នុងសេចក្តីប្រកាសព័ត៌មានចុះថ្ងៃ១៨ កក្កដា ដូចគ្នាធនាគារអភិវឌ្ឍន៍ជនបទក៏បានឲ្យដឹងផងដែរថាបើទោះបើជាមានការធ្លាក់ចុះក៏ដោយក៏តម្លៃស្រូវស្ថិតក្នុងស្ថានភាពប្រែប្រួលជាវិជ្ជមាន ដោយថាកសិករនៅតែអាចចំណេញបានជាមធ្យម២លានរៀលក្នុង១ ហិកតា។
បើតាមធនាគារអភិវឌ្ឍន៍ជនបទតម្លៃស្រូវអ៊ីអ៊ែរបច្ចុប្បន្នមានតម្លៃ៨០០រៀលក្នុងមួយគីឡូ។
អគ្គលេខាធិការធនាគារអភិវឌ្ឍន៍ជនបទលោក កៅ ថាច បានឲ្យVOD ដឹងថា ធនាគារអភិវឌ្ឍន៍ជនបទមានទុនបង្វិល ជាង៥០លានដុល្លារដើម្បីជួយរក្សាតម្លៃស្រូវដល់កសិករ។
អគ្គលេខាធិការធនាគារអភិវឌ្ឍន៍ជនបទលោក កៅ ថាច
កសិករដាំស្រូវនៅក្នុងខេត្តតាកែវលោក កង ថា មានប្រសាសន៍ថា ក្នុងរយៈពេលជាង២សប្តាហ៍នេះតម្លៃស្រូវបានធ្លាក់ចុះពីមួយគីឡូជាង៩០០រៀល មកនៅសល់ត្រឹមតែជាង៧០០រៀលប៉ុណ្ណោះ។ លោកស្នើរឲ្យរដ្ឋាភិបាលរក្សាតម្លៃឲ្យបានលើ៨០០រៀលទើបប្រជាកសិករអាចចំណេញបានខ្លះ។
កសិករដាំស្រូវនៅក្នុងខេត្តតាកែវលោក កង ថា
អគ្គនាយកក្រុមហ៊ុន Amru Rice លោក សុង សារ៉ន មានប្រសាសន៍ថាការចាប់ប្រមូលទិញស្រូវនឹងចាប់ផ្តើមចាប់ពីខែនេះទៅ ខណៈដែលលោករំពឹងថានៅខែសីហា ដល់ខែធ្នូតម្លៃស្រូវអាចហក់ឡើងវិញ។ ចំពោះតម្លៃស្រូវចុះមកនៅប្រហែល៨០០រៀលនេះ លោកថាកសិករនៅតែអាចចំណេញបាន ខណៈក្រុមហ៊ុនក៏ត្រូវការរក្សាអតិថិជនរបស់ខ្លួនផងដែរ ។
អគ្គនាយកក្រុមហ៊ុន Amru Rice លោក សុង សារ៉ន
កាលពីខែកញ្ញា ឆ្នាំ២០១៦ ក្រុមកសិករនៅខេត្តបាត់ដំបងជាង ៥០០នាក់ បានចាក់ស្រូវបិទផ្លូវជាតិលេខ៥ តវ៉ាទៅអាជ្ញាធរឲ្យស្វែងរកទីផ្សារសម្រាប់លក់ស្រូវ ទៅតាមតម្លៃដែលត្រូវបានកំណត់ដោយរដ្ឋាភិបាល។ ក្រោយពីមានការតវ៉ាក្រសួងសេដ្ឋកិច្ច និងហិរញ្ញវត្ថុបានប្រកាសថា រដ្ឋាភិបាលបានសម្រេចបញ្ចេញថវិកាចំនួន២៧លានដុល្លារអាមេរិកដែលបានមកពីប្រាក់បម្រុងរបស់រដ្ឋនិងហិរញ្ញវត្ថុរបស់ធនាគារអភិវឌ្ឍន៍ជនបទដែលក្រសួងនេះថា ដើម្បីជួយជំរុញស្ថិរភាពតម្លៃស្រូវ និងជំរុញការទិញស្រូវក្នុងស្រុក៕
