សមាជិកសភាម៉ាឡេស៊ីមួយរូបបានស្នើរដ្ឋាភិបាលទើបឡើងកាន់អំណាចថ្មីរបស់ខ្លួន បង្ហាញជំហរឲ្យបានច្បាស់ទាក់ទងនឹងការរំលាយគណបក្សសង្រ្គោះជាតិ និង បញ្ហាមួយចំនួនទៀតពាក់ព័ន្ធនឹងដំណើរការលទ្ធិប្រជាធិបតេយ្យនៅកម្ពុជា។
យោងតាមលិខិតផ្ញើជូនទៅក្រសួងការបរទេសម៉ាឡេស៊ី កាលពីថ្ងៃម្សិលមិញ សមាជិកសភាមកពីគណបក្សយុត្ដិធម៌ពលរដ្ឋ លោក Wong Chen បានសួរដេញដោលពីគោលជំហររបស់រដ្ឋាភិបាលលោក ម៉ាហាធៀ ម៉ូហាម៉ាត់ ជុំវិញការអនុវត្តលទ្ធិប្រជាធិបតេយ្យនៅកម្ពុជា ដូចជា ការបង្ក្រាបលើអ្នកនយោបាយគណបក្សប្រឆាំង ការរំលាយអតីតគណបក្សសង្គ្រោះជាតិ និងការហាមឃាត់មន្ដ្រីបក្សប្រឆាំង ១១៨រូប មិនឲ្យធ្វើនយោបាយជាដើម។
លោក Wong Chen បន្ដថា រដ្ឋាភិបាលកម្ពុជាកំពុងទទួលរងឥទ្ធិពលបរទេស ដែលធ្វើឲ្យរដ្ឋាភិបាលមួយនេះ អាចគំរាមកំហែងដល់លទ្ធិប្រជាធិបតេយ្យ។
បើទោះបីនៅក្នុងធម្មនុញ្ញអាស៊ាន មានគោលការណ៍មិនលូកលាន់កិច្ចការផ្ទៃក្នុងប្រទេសណាមួយក៏ដោយ ប៉ុន្ដែ លោក Wong Chen លើកឡើងថា គោលការណ៍នេះ មិនអាចហាមឃាត់ប្រទេសជាសមាជិក ឲ្យជំរុញការអនុវត្តលទ្ធិប្រជាធិបតេយ្យល្អប្រសើរក្នុងតំបន់នោះទេ។
តាមរយៈសេចក្ដីថ្លែងការណ៍នៅថ្ងៃនេះ ក្រុមសមាជិកសភាអាស៊ានដើម្បីសិទ្ធិមនុស្ស បានចូលរួមគាំទ្រការលើកឡើងរបស់សមាជិកសភា លោក Wong Chen និងថា ការបោះឆ្នោតនៅកម្ពុជា នឹងគ្មានការទទួលស្គាល់ឡើយ បើគ្មានអតីតគណបក្សសង្គ្រោះជាតិចូលរួមនោះ។
អ្នកនាំពាក្យគណបក្សប្រជាជន លោក សុខ ឥសាន ប្រតិកម្មនឹងសមាជិកសភាម៉ាឡេស៊ីរូបនេះ ដោយថា សមាជិកសភារូបនេះបានរំលោភនឹងគោលការណ៍ក្នុងធម្មនុញ្ញរបស់អាស៊ាន ដែលហាមមិនឲ្យជ្រៀតជ្រែកផ្ទៃក្នុងប្រទេសណាមួយ។
អ្នកនាំពាក្យគណបក្សប្រជាជន លោក សុខ ឥសាន
ប្រធានក្រុមអ្នកវិភាគនយោបាយវ័យក្មេង លោក ហង្ស វិទូ យល់ថា បញ្ហាសិទ្ធិមនុស្ស និងប្រជាធិបតេយ្យនៅកម្ពុជា បានធ្វើឲ្យបណ្ដាប្រទេសលើពិភពលោក និងក្នុងតំបន់អាស៊ាន មានការចាប់អារម្មណ៍ខ្លាំង ខណៈ ប្រទេសខ្លះ ក៏បានបង្ហាញក្ដីកង្វល់របស់ពួកគេផងដែរ។
ប្រធានក្រុមអ្នកវិភាគនយោបាយវ័យក្មេង លោក ហង្ស វិទូ
កម្ពុជានឹងរៀបចំការបោះឆ្នោតអាណត្តិទី៦ របស់ខ្លួន នៅថ្ងៃទី២៩កក្កដាខាងមុខ ខណៈ មានគណបក្សចំនួន២០ នឹងចូលរួមប្រកួតប្រជែង។ ប៉ុន្ដែ ការបោះឆ្នោតនេះ ត្រូវបានប្រទេសលោកសេរីមួយចំនួន ព្រមានមិនទទួលស្គាល់ បន្ទាប់ពីអតីតបក្សប្រឆាំងដ៏ធំមួយ ត្រូវបានតុលាការកំពូលរំលាយចោល៕