ប្រជាពលរដ្ឋ១១២គ្រួសារនៅស្រុកជាំក្សាន្ត ខេត្តព្រះវិហារត្រូវបានអាជ្ញាធរដោះស្រាយបញ្ចប់វិវាទដីធ្លី ក្រោយពីពលរដ្ឋទាំងនោះបាននាំគ្នាតវ៉ារកដំណោះស្រាយអស់រយៈពេលជិត១០ឆ្នាំ។
ក្នុងលិខិតថ្លែងអំណរគុណមួយចុះថ្ងៃទី១២ ខែកក្តដា ផ្ញើជូនលោកនាយករដ្ឋមន្រ្តី ហ៊ុន សែន តំណាងរបស់ប្រជាពលរដ្ឋទាំង១១២គ្រួសារបានសាទរចំពោះដំណោះស្រាយដែលអ្នកភូមិទទួលបានដីទៅរស់នៅ ភូមិធម្មជាតិសម្តេចតេជោ ហ៊ុន សែន ឃុំស្រអែម ស្រុកជាំក្សាន្ត ដើម្បីបញ្ចប់ការតវ៉ាពីដីតំបន់ស្វាយជ្រុំ។
តំណាងពលរដ្ឋម្នាក់អ្នកស្រី សាត ញ៉េប មានប្រសាសន៍បន្ថែមលើលិខិតថា ក្រុមអ្នកភូមិទទួលបានក្បាលដីរួមរួចហើយ ប៉ុន្តែមិនទាន់បានប័ណ្ណកម្មសិទ្ធិសម្រាប់ពលរដ្ឋ១គ្រួសារៗនៅឡើយទេ។
អ្នកស្រីបន្តថា ក្រុមពលរដ្ឋក៏មានការព្រួយបារម្ភដែរ បើទោះបីជាពួកគាត់ទទួលបានក្បាលដីរួម ដោយខ្លាចថាអាជ្ញាធរកែប្រែពាក្យសម្តីក្រោយបោះឆ្នោតរួច។
តំណាងពលរដ្ឋម្នាក់អ្នកស្រី សាត ញ៉េប
វិអូឌីមិនអាចសុំការបញ្ជាក់បន្ថែមពីអភិបាលខេត្តព្រះវិហារ លោក អ៊ុន ចាន់ដា បានទេ ដោយលោកថារវល់ប្រជុំ។
ប្រធានគ្រប់គ្រងផ្នែកអង្កេតលោក អំ សំអាត បានសាទរចំពោះពលរដ្ឋដែលទទួលបានដំណោះស្រាយនេះ ប៉ុន្តែលោកស្នើទៅរដ្ឋាភិបាលត្រូវដោះស្រាយករណីនេះឲ្យបានប្រាកដប្រជា និងត្រូវដោះស្រាយបញ្ចប់រាល់បញ្ហាវិវាទដីធ្លី ដែលនៅសេសសល់ផ្សេងៗទៀតដើម្បីកុំឲ្យពលរដ្ឋឡើងមកតវ៉ាដល់ថ្នាក់ជាតិ។
ប្រធានគ្រប់គ្រងផ្នែកអង្កេតលោក អំ សំអាត
កាលពីឆ្នាំ២០១១អាជ្ញាធរខេត្តព្រះវិហារបានដាក់កម្លាំងចុះរុះរើផ្ទះ វត្តអារាម និងផលដំណាំរបស់ពលរដ្ឋរាប់រយគ្រួសារនៅតំបន់ស្វាយជ្រំុ ស្រុកជាំក្សាន្ត ដោយអះអាងថា ដីនោះជាតំបន់អភិរក្ស។ ពលរដ្ឋទាំងនោះ បាននាំគ្នាឡើងមករកកិច្ចអន្តរាគមន៍ពីស្ថាប័នរដ្ឋកំពូលៗនៅភ្នំពេញជាបន្តបន្ទាប់ រហូតដល់ពេលខ្លះមានការបង្រ្កាបពីអាជ្ញាធរទៀតផង៕