គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា ជំនន់ទឹកភ្លៀងនៅតែបន្តវាយលុកលើខេត្តចំនួន៥ ខណៈដែល កម្ពុជាកំពុងរងឥទ្ធិពលព្យុះត្រូពិកដែលបណ្តាលឲ្យមានខ្យល់និងភ្ញៀងធ្លាក់ខ្លាំង។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី ប្រាប់វីអូឌីនៅថ្ងៃនេះថា គិតត្រឹមថ្ងៃព្រហ្បស្បតិ៍ ខេត្តចំនួន 5 កំពុងទទួលរងគ្រោះដោយសារ ទឹកជំនន់រយៈពេលប៉ុន្មានថ្ងៃនេះ មានដូចជា ខេត្តកោះកុង បាត់ដំបង កំពត ព្រះសីហនុ និងខេត្ដកំពង់ស្ពឺ ខណៈដែលខេត្តកោះកុង កំពត និងកំពង់ស្ពឺ ទឹកជំនន់កំពុងកើនឡើងខ្លាំងជាងគេ ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី
លោកបន្តថា ក្នុងចំណោម ខេត្តទាំង ៥ នេះ ប៉ះពាល់ដល់ប្រជាពលរដ្ឋទាំងអស់ ៣៨២០ គ្រួសារ ប៉ះពាល់ដំណាំស្រូវ ២៩៤១ ហិកតា ដោយខូចខាត ៥២ ហិកតា និងលិចស្ពាន ចំនួន ៥។ លោកបន្តថាពេលនេះ អាជ្ញាធរកំពុងជួយសង្គ្រោះប្រជាពលរដ្ឋរងគ្រោះទាំងនោះ។
ពាក់ព័ន្ធរឿងនេះ វិអូឌីមិនទាន់ទាកទង់អភិបាលខេត្តកោះកុងលោកស្រី មិថុនា ភូថង បាននៅឡើយទេ ។
តាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយផ្ញើជូនលោកនាយករដ្ឋមន្រ្តីហ៊ុន សែន គិតត្រឹមថ្ងៃទី១៩ខែកក្កដានេះ ទឹកជំនន់ទឹកភ្លៀងប៉ះពាល់ស្រុកចំនួន៤នៃខេត្តកោះកុងដែលបណ្ដាលឲ្យពលរដ្ឋពលរដ្ឋចំនួន៥៥១ ត្រូវជម្លៀសទៅទីទួលសុវត្ថិភាព។
ដោយឡែក អភិបាលខេត្តកំពង់ស្ពឺ លោក វ៉ី សំណាង ប្រាប់វីអូឌីនៅថ្ងៃនេះថា រហូតមកដល់ពេលនេះ ជំនន់ទឹកភ្លៀងបានបង្កផលប៉ះពាល់ដល់ប្រជាពលរដ្ឋនៅក្នុងស្រុកចំនួន ២ គឺ ស្រុកភ្នំស្រួច និងស្រុកបសេដ្ឋ ដែលក្នុងនោះស្រុកភ្នំស្រួចប៉ះពាល់ប្រជាពលរដ្ឋ ២៣០ គ្រួសារ ដំណាំស្រូវ ១១៥៧ ហិកតា។ ចំណែកស្រុកបសេដ្ឋពុំទាន់មានរបាយការណ៍ផលប៉ះពាល់នៅឡើយទេ។
អភិបាលខេត្តកំពង់ស្ពឺ លោក វ៉ី សំណាង
ចំណែក អភិបាលខេត្តកំពតលោក ជាវ តាយ ប្រាប់វីអូឌីនៅថ្ងៃនេះដែរថា ទឹកជំនន់បានជន់លិចផ្ទះប្រជាពលរដ្ឋ ២ ស្រុកដែលក្នុងនោះមាន ស្រុកទឹកឈូ ត្រូវបានទឹកជន់លិចផ្ទះ៦០០ ខ្នង និងស្រុកឈូក ១១២ គ្រួសារ និងផលដំណាំមួយចំនួនប៉ុន្តែមិនទាន់ដឹងថាប៉ះពាល់អស់ប៉ុន្មានហិកតានៅឡើយ។
អភិបាលខេត្តកំពតលោក ជាវ តាយ
ក្រសួងធនធានទឹក និង ឧតុនិយម កាលពីម្សិញនេះ បានចេញសេចក្តីជូនដំណឹងថា ប្រទេសកម្ពុជានឹងរង ឥទ្ធិពលព្យុះទី ៩ ឈ្មោះថា ព្យុះ សុនទីញ (SON-TINH) ចាប់ពីថ្ងៃទី ១៩ រហូតដល់ថ្ងៃទី ២១ ខែ កក្កដា ឆ្នាំ២០១៨នេះ ហើយបង្កឲ្យមានភ្លៀងធ្លាក់រាយប៉ាយទូទាំងប្រទេស។ ក្រសួងធនធានទឹក និងឧតុនិយម បានអំពាវនាវឲ្យប្រជាពលរដ្ឋមានការប្រុងប្រយ័ត្ន ជាពិសេសអ្នកនេសាទ អ្នកធ្វើដំណើរតាមសមុទ្រ និងប្រជាពលរដ្ឋដែលរស់នៅតាមតំបន់ទំនាបជាប់ផ្លូវទឹកនានាផងដែរ។
