មន្ទីរសុខាភិបាលនៅតាមបណ្ដាលខេត្តមួយចំនួនដែលទទួលរងគ្រោះដោយសារទឹកជំនន់ ឲ្យដឹងថា អាជ្ញាធរកំពុងចុះណែនាំដល់ប្រជាពលរដ្ឋដែលត្រូវបានទឹកជំនន់ជន់លិចផ្ទះ ឲ្យប្រុងប្រយ័ត្ននូវជំងឺឆ្លង និងផ្ដល់ថ្នាំបង្កាផ្សេងៗ ខណៈខេត្តទាំងនោះកំពុងប្រឈមនឹងទឹកជំនន់ជន់លិច។
ប្រធានមន្ទីរសុខាភិបាលខេត្តកំពង់ស្ពឺ លោក អោ វណ្ណថេន ប្រាប់វីអូឌីនៅថ្ងៃនេះថា អាជ្ញាធរនិងមន្ទីរសុខាភិបាលបានចុះណែនាំប្រជាពលរដ្ឋនៅតាមស្រុកមួយចំនួនដែលត្រូវទឹកលិច ដើម្បីឲ្យប្រុងប្រយ័ត្ននូវជំងឺឆ្លងផ្សេងៗ ក្នុងនោះមាន ជំងឺរាគរូស អាសន្នរោគ ពុលចំណីអាហារ ផ្តាសាយធំ ជំងឺរមាស់ជាដើម។
ប្រធានមន្ទីរសុខាភិបាលខេត្តកំពង់ស្ពឺ លោក អោ វណ្ណថេន
ដោយឡែក ប្រធានមន្ទីរសុខាភិបាលខេត្តកំពត លោក ញ ប៊ុនថន មានប្រសាសន៍ថា មន្ទីរសុខាភិបាលបានសហការជាមួយអាជ្ញាធរនៅតាមមន្ទីរពេទ្យស្រុកនីមួយៗដើម្បីណែនាំប្រជាពលរដ្ឋកំពុងជួបនឹងទឹកជំនន់ឲ្យប្រុងប្រយ័ត្ននូវជំងឺ។ លោកបន្តថា រហូតមកដល់ពេលនេះ មិនទាន់មានប្រជាពលរដ្ឋរងគ្រោះដោយសារជំងឺ ក្នុងអំឡុងពេលមានទឹកជំនន់នៅឡើយទេ ប៉ុន្តែជាមន្ទីរសុខាភិបាល និងអាជ្ញាធរបានត្រៀមថ្នាំ សម្រាប់បង្ការនូវជំងឺឆ្លងផ្សេងៗផងដែរ។
ប្រធានមន្ទីរសុខាភិបាលខេត្តកំពត លោក ញ ប៊ុនថន
ប្រធានមន្ទីរសុខាភិបាលខេត្តព្រះសីហនុ លោកស្រី លឹម សាមាន លើកឡើងដែរថា មន្ទីរសុខាភិបាលបានសហការជាមួយអាជ្ញាធរដោយចុះទៅអប់រំផ្ដល់ថ្នាំបង្ការដល់ប្រជាពលរដ្ឋដែលកំពុងជួបប្រទះនឹងទឹកជំនន់ឲ្យមានការប្រុងប្រយ័ត្ននូវជំងឺឆ្លង និងគ្រោះថ្នាក់ផ្សេងៗផងដែរ។
ប្រធានមន្ទីរសុខាភិបាលខេត្តព្រះសីហនុ លោកស្រី លឹម សាមាន
វីអូឌីមិនអាចសុំការអត្ថាធិប្បាយពីប្រធានមន្ទីរសុខាភិបាលខេត្តកោះកុង លោក ទៅ ម៉ឹង បានទេ ។
កាលពីម្សិលមិញនេះដែរ រដ្ឋាភិបាលបានចេញសេចក្ដីណែនាំមួយ ឲ្យក្រសួងស្ថាប័នពាក់ព័ន្ធអាជ្ញាធរ រាជធានីខេត្តទាំងអស់ ត្រូវបង្កើតការយកចិត្តទុកដាក់នឹងប្រុងប្រយ័ត្ន និងត្រូវមានការរៀបចំទុកជាមុន ដោយប្រើប្រាស់កម្លាំង មធ្យោបាយ នៅពេលមានទឹកជំនន់កើតឡើង ត្រូវជម្លៀសប្រជាពលរដ្ឋទៅកាន់ទីទួលសុវត្តិភាព បញ្ជៀសឲ្យខាងតែបាននូវការប៉ះពាល់ដល់អាយុជិវិតនិងការខូចខាតផ្សេងៗដែលកើតឡើងជាយថាហេតុ ។
គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថាកាលពីម្សិលមិញថា ខេត្តដែលទទួលរងគ្រោះដោយសារ ទឹកជំនន់មានដូចជា ខេត្តកោះកុង បាត់ដំបង កំពត ព្រះសីហនុ ប៉ៃលិន និង ខេត្ដកំពង់ស្ពឺ ប៉ុន្តែក្នុងចំណោមទាំងអស់នេះ ខេត្តកោះកុង កំពត និងកំពង់ស្ពឺ ទឹកជំនន់កំពុងកើនឡើងខ្លាំងជាងគេ។