ឯកអគ្គរដ្ឋទូតចិនប្រចាំនៅកម្ពុជាលោក Xiong Bo បានលើកឡើងថា សហភាពអឺរ៉ុប(EU) មិនគួរភ្ជាប់រឿងនយោបាយ ជាលេសក្នុងការដកការអនុគ្រោះពន្ធ «រាល់គ្រប់មុខទំនិញលើកលែងតែអាវុធ (EBA ឬEverything But Arm)» ដល់កម្ពុជានោះទេ។
នេះជាការលើកឡើងជាសាធារណៈរបស់ឯកអគ្គរដ្ឋទូតចិនលោក Xiong Bo កាលពីថ្ងៃទី ១៧ ខែកក្កដា ទៅកាន់ក្រុមនិស្សិតនៅក្នុងសាកលវិទ្យាល័យកម្ពុជា នៅក្នុងរាជធានីភ្នំពេញ ក្នុងកិច្ចប្រជុំមួយស្តីពី ការផ្ដួចផ្ដើមខ្សែក្រវ៉ាត់មួយ និង ផ្លូវមួយរបស់រដ្ឋាភិបាលចិន។ នេះបើតាមការចុះផ្សាយរបស់ សារព័ត៌មាន វីអូអេ។
តាមការចុះផ្សាយដដែលលោក Xiong Bo បានលើកឡើងថាទំនាក់ទំនងពាណិជ្ជកម្មរវាងកម្ពុជា និង អ៊ឺរ៉ុប ត្រូវតែធ្វើឡើងឲ្យស្របតាមច្បាប់សេដ្ឋកិច្ច និង ពាណិជ្ជកម្ម មិនមែនត្រូវផ្លាស់ប្តូរដោយមូលហេតុនយោបាយនោះទេ ។
ក្រោយបញ្ចប់បេសកកម្មស្វែងរកការពិតពីស្ថានភាពនៅកម្ពុជា កាលពីថ្ងៃទី ១១ ខែកក្កដា គណៈកម្មការអ៊ឺរ៉ុប ព្រមានពីការដកប្រទេសកម្ពុជាចេញពីប្រព័ន្ធអនុគ្រោះពន្ធដោយថា បើកម្ពុជាមិនដោះស្រាយបញ្ហាសិទ្ធិមនុស្ស និង សិទ្ធិនយាបាយនៅកម្ពុជា។
គួររំលឹកថាគម្រោងពាណិជ្ជកម្មសេរី «អ្វីទាំងអស់លើកលែងតែអាវុធ ឬ EBA» បាននាំមកនូវអត្ថប្រយោជន៍សំខាន់ៗដល់សេដ្ឋកិច្ចកម្ពុជា ស្របពេលសហភាពអឺរ៉ុបគឺជាទីផ្សារគោលដៅនាំចេញដ៏សំខាន់ដែលមានចំនួន៤០ភាគរយនៃការនាំចេញសរុបរបស់កម្ពុជា។
ការនាំចេញរបស់កម្ពុជាទៅកាន់សហភាពអឺរ៉ុបបានកើនឡើងយ៉ាងឆាប់រហ័សក្នុងប៉ុន្មានឆ្នាំថ្មីៗនេះ ដែលកើនឡើង២២៧ភាគរយ នៅចន្លោះឆ្នាំ២០១១និង២០១៦។
នៅឆ្នាំ២០១៧ ការនាំចេញសរុបរបស់កម្ពុជាទៅកាន់សហភាពអឺរ៉ុបបានឈានដល់៥ពាន់លានអឺរ៉ូ ដែលបានដាក់ចំណាត់ថ្នាក់លេខ២ ក្នុងចំណោមប្រទេសទទួលផលពីប្រព័ន្ធអនុគ្រោះពាណិជ្ជកម្មសេរី EBA។
