អង្គការឃ្លាំមើលសិទ្ធិមនុស្សអន្តរជាតិ(Global Witness)អះអាងថា ខ្លួនកំពុងតែធ្វើកិច្ចការទាក់ទងនិងការស្នើឲ្យសហរដ្ឋអាមេរិកដាក់ទណ្ឌកម្មបង្កកទ្រព្យសម្បត្តិមហាសេដ្ឋីចំនួន៤រូប ដែលមហាសេដ្ឋីទាំងនេះជាសមាជិកព្រឹទ្ធសភារបស់គណបក្សប្រជាជនកម្ពុជា។
នៅក្នុងសេចក្តីប្រកាសព័ត៌មានរបស់អង្គការអន្តរជាតិមួយនេះ ដែលចេញផ្សាយកាលពីម្សិលមិញបានលើកឡើងថា ឧកញ៉ាទាំង៤មានតួនាទីសំខាន់ក្នុងការជួយទ្រទ្រង់គណបក្សប្រជាជនកម្ពុជា ហើយជាថ្នូរមកវិញអ្នកទាំងនេះមានឱកាសរួចផុតពីទោសទណ្ឌនានា បើទោះជាបានបំពានច្បាប់យកទ្រព្យសម្បត្តិរដ្ឋក៏ដោយ។
ឧកញ៉ាទាំង៤នោះរួមមាន លោក ម៉ុង ឫទ្ធី រងការចោទថា ពាក់ព័ន្ធការកាប់បំផ្លាញព្រៃឈើ និងរត់ពន្ធកញ្ឆា លោក លី យ៉ុងផាត់ រងការចោទថាទន្ទ្រានយកដីពលរដ្ឋ លោក ទ្រី ភាព រងការចោទថា មេជួញដូរឈើខុសច្បាប់ និងលោក ឡៅ ម៉េងឃីន រងការចោទថា បណ្តេញអ្នកភូមិបឹងកក់ទាំងហិង្សា។
វីអូឌីនៅមិនទាន់អាចសុំការឆ្លើយតបពីឧកញ៉ាទាំង៤រូបនេះនៅឡើយទេ។ ទោះយ៉ាងណារាល់របាយការណ៍អង្គការនេះស្តីពីស្ថានភាពកម្ពុជា គឺរដ្ឋាភិបាលកម្ពុជាមិនដែលទទួលស្គាល់ទេ ដែលថា ជារបាយការណ៍ក្លែងក្លាយគ្មានមូលដ្ឋាន។
កាលពីដើមខែមិថុនា សហរដ្ឋអាមេរិកបានដាក់ទណ្ឌកម្មលោក ហ៊ីង ប៊ុនហៀង មេបញ្ជាការកងអង្គរក្សលោកនាយករដ្ឋមន្ត្រីហ៊ុន សែនដោយចោទថា មន្ត្រីរូបនេះបានប្រើហិង្សាលើប្រជាពលរដ្ឋខ្មែរដែលមិនមានអាវុធជាច្រើនឆ្នាំមកហើយ។