គណបក្សប្រជាធិបតេយ្យមូលដ្ឋាន ឬហៅកាត់ថា GDP បានប្រកាសជំហរជាថ្មីថា នឹងចូលរួមការបោះឆ្នោតខាងមុខ ទោះបីកន្លងមកសកម្មភាពឃោសនារបស់ខ្លួនត្រូវបានរារាំង និងរងការគំរាមកំហែងដោយអាជ្ញាធរមូលដ្ឋានក៏ដោយ។
កាលពីសប្ដាហ៍មុន គណបក្សប្រជាធិបតេយ្យមូលដ្ឋាន បានព្រមានដកខ្លួនចេញពីការបោះឆ្នោតជាតិខាងមុខ ដោយអះអាងថា អាជ្ញាធរមួយចំនួនមិនជួយសម្រួលក្បួនឃោសនាបោះឆ្នោត និងមានការគំរាមកំហែងទៅសកម្មភាពរបស់ខ្លួនពេលចុះចែកខិត្តប័ណ្ណនៅតាមខេត្តទៀតផង។
នៅក្នុងសន្និសីទ្ធសារព័ត៌មាននាព្រឹកថ្ងៃអាទិត្យនេះ បេក្ខជននាយករដ្ឋមន្រ្តីនៃបក្សប្រជាធិបតេយ្យមូលដ្ឋាន លោក យ៉ង សាំងកុមារ ប្រកាសជំហររថា គណបក្សលោកនៅតែបន្តចូលរួមក្នុងប្រកួតប្រជែងនយោបាយដដែល ដោយថា ដើម្បីផ្លាស់ប្ដូររបបដឹកនាំប្រទេសតាមការចង់បានរបស់ពលរដ្ឋ។
ជាមួយគ្នានោះ លោក យ៉ង សាំងកុមារ ក៏លើកឡើងដែរថា គណបក្សលោកបានសម្រេចរក្សាជំហរបែបនេះ បន្ទាប់ពីគណបក្សនេះបានសង្កេតឃើញថា អាជ្ញាធរមូលដ្ឋានបានបញ្ឈប់ការគំរាមកំហែង និងមានការសម្រួលសកម្មភាពឃោសនាប្រសើរជាងមុន ក្រោយពីមានបទបញ្ជាផ្ទាល់ពីរដ្ឋមន្រ្តីក្រសួងមហាផ្ទៃ លោក ស ខេង។
មេដឹកនាំគណបក្សរូបនេះ បានបង្ហាញក្ដីរំពឹងថា ណបក្សរបស់លោក នឹងឈ្នះឆ្នោត បើពលរដ្ឋចូលរួមបោះឆ្នោតបានច្រើនចាប់ពី ៧៥ភាគរយឡើង។
ការបោះឆ្នោតជាតិជ្រើសតាំងតំណាងរាស្រ្តសភានីតិកាលទី ៦ នឹងប្រព្រឹត្តទៅនាថ្ងៃទី២៩ ខែកក្កដាខាងមុខ ដោយមានការចូលរួមពីបក្សនយោបាយចំនួន ២០ រួមទាំងគណបក្សប្រជាធិបតេយ្យមូលដ្ឋានផងដែរ។
ប៉ុន្ដែ ប្រទេសលោកសេរីមួយចំនួន បានព្រមានមិនទទួលស្គាល់លទ្ធផលនៃការបោះឆ្នោតខាងមុខនេះទេ ដោយថាការបោះឆ្នោតនេះមិនមានភាពសេរី ត្រឹមត្រូវ និង យុត្តិធម៌ បន្ទាប់ពីអតីតគណបក្សប្រឆាំងដ៏ធំនៅកម្ពុជា ត្រូវបានរំលាយចោល ហើយអាសនៈរបស់អតីតបក្សប្រឆាំង ត្រូវបានបែងចែកឲ្យទៅគណបក្សផ្សេង៕