គណបក្សនយោបាយចំនួន ៥ គ្រោងដង្ហែក្បួនឃោសនារបស់ពួកគេនៅរាជធានីភ្នំពេញ នៅថ្ងៃអាទិត្យនេះ ខណៈដែលអាជ្ញាធររាជធានីភ្នំពេញ បានជូនដំណឹងថា ផ្លូវមួយចំនួននឹងកកស្ទះចរាចរណ៍ដោយសារតែក្បួនឃោសនារបស់គណបក្សទាំងនោះ។
សាលារាជធានីភ្នំពេញ បាននិយាយក្នុងសេចក្ដីជូនដំណឹងកាលពីថ្ងៃសុក្រកន្លងមកនេះថា គណបក្សប្រជាជនកម្ពុជាដឹកនាំក្បួនឃោសនាជាមួយអ្នកគាំទ្ររបស់ពួកគេដល់ទៅ ៣ម៉ឺន ៥ពាន់នាក់ ខណៈដែលគណបក្សប្រជាធិបតេយ្យមូលដ្ឋាន គណបក្សយុវជនកម្ពុជា គណបក្សមាតុភូមិយើង និងគណបក្សខ្មែរសាធារណរដ្ឋ ក៏ចេញឃោសនានៅក្នុងរាជធានីភ្នំពេញផងដែរ ដោយមានអ្នកគាំទ្ររបស់ពួកគេចន្លោះពី ២០០នាក់ ទៅ ៥០០នាក់។
សាលារាជធានីភ្នំពេញ បានឲ្យដឹងថា ក្បួនដង្ហែឃោសនារបស់គណបក្សទាំង ៥នោះ នឹងឆ្លងកាត់តាមទីតាំង និងផ្លូវសំខាន់ៗ ដូចជា មហាវិថីម៉ៅសេទុង មហាវិថីព្រះមុនីវង្ស មហាវិថីសម្ដេចសុធារស ផ្លូវព្រះស៊ីសុវត្ថិ ផ្លូវជាតិលេខ ៥ ផ្លូវជាតិលេខ ១ ផ្លូវមិត្តភាពភ្នំពេញ-ហាណូយ ផ្លូវណតប្រ៊ីត ផ្លូវចោមចៅ និង ផ្លូវសំខាន់ៗមួយចំនួនទៀតក្នុ្ងងរាជធានីភ្នំពេញ។
បើតាមសេចក្ដីជូនដំណឹងដដែលនោះ សាលារាជធានីភ្នំពេញក៏ជំរុញឲ្យអាជ្ញាធរ និងភាគីពាក់ព័ន្ធគ្រប់លំដាប់ថ្នាក់ ជាពិសេសពលរដ្ឋ ជ្រាបជាព័ត៌មាន និងចូលរួមសហការ ដោយយោគយល់អធ្យាស្រ័យគ្នា ដើម្បីធានាឲ្យបរិយាកាសឃោសនាបោះឆ្នោតរបស់បក្សនយោបាយខាងលើប្រព្រឹត្តទៅដោយរលូន រក្សាបានសន្តិសុខសុវត្ថិភាព៕
