រដ្ឋបាលលោកប្រធានាធិបតីចិន ស៊ី ជីនពីង នៅតែព្យាយាមរិះរកគ្រប់វិធីដើម្បីឲ្យមហាជនទទួលស្គាល់ដែនដីតៃវ៉ាន់ថាជាទឹកដីរបស់ចិន។ ក្នុងរយៈពេលចុងក្រោយនេះចិនបានដើរបញ្ចុះបញ្ចូលក្រុមប្រទេសមួយចំនួនដែលធ្លាប់តែមានទំនាក់ទំនងស្អិតរមួតជាមួយកោះតៃវ៉ាន់ឲ្យងាករកខ្លួនវិញ។
ក្រៅពីការខំប្រឹងប្រែងដើរបញ្ចុះបញ្ចូលប្រទេសនានាដែលកំពុងមានទំនាក់ទំនងការទូតជាមួយតៃវ៉ាន់ ចិនក៏កំពុងតែធ្វើឲ្យពិភពលោកមើលឃើញថាតៃវ៉ាន់ជារបស់ខ្លួនតាមរយៈការដាក់កំហិតដល់ក្រុមហ៊ុនអាកាសចរបរទេសឲ្យសរសេរថាតៃវ៉ាន់ជារបស់ចិន។
អាជ្ញាធរអាកាសចរស៊ីវិលចិន បានផ្ញើលិខិតទៅកាន់ក្រុមហ៊ុនអាកាសចរណ៏បរទេសចំនួន៣៦ កាលពីចុងខែមេសាកន្លងទៅ ដែលតម្រូវឲ្យក្រុមហ៊ុនអាកាសចរទាំងនោះដកចេញពីគេហទំព័ររបស់ខ្លួនដែលដាក់ថា តៃវ៉ាន់ ហុងកុង និងម៉ាកាវ ជាប្រទេសមួយដាច់ដោយឡែក ហើយពិសេសសម្រាប់តៃវ៉ាន់ត្រូវតែដាក់ថាតៃវ៉ាន់ជារបស់ចិន។
សម្រាប់ដែនដីហុងកុង និងម៉ាកាវវាមិនមែនជារឿងចម្រូងចម្រាសទេ ព្រោះទឹកដីទាំងពីរនេះត្រូវបានពិភពលោកដឹងថាជាទឹកដីរបស់ចិនទៅហើយ បើទោះបីជាតំបន់ទាំងពីរជាតំបន់ស្វ័យយ័តដែលមានប្រព័ន្ធគ្រប់គ្រងពីរដ៏ដោយ តែវានៅតែស្ថិតក្រោមរដ្ឋបាលក្រុងប៉េកាំងដដែល។
ប៉ុន្តែសម្រាប់ករណីតៃវ៉ាន់ វាជារឿងមួយផ្សេងព្រោះថាតៃវ៉ាន់មិនដែលទទួលស្គាល់ថាខ្លួនជាផ្នែកមួយរបស់ចិនទេ ហើយចិនក៏មិនមានសិទ្ធិណាមួយលើរដ្ឋបាលក្រុងតៃបិដែរ។ ដូច្នេះការសរសេរឬផ្សាយពាណិជ្ជកម្មណាមួយដែលតៃវ៉ាន់ជាប្រទេសមួយឯករាជ្យវាប្រាកដជាធ្វើឲ្យចិនមិនអាចទទួលយកបាននោះទេ។
យោងតាមការចុះផ្សាយរបស់ទីភ្នាក់ងារសារព័ត៌មាន AFP គិតត្រឹមដំណាច់ខែឧសភា ក្រុមហ៊ុនអាកាសចរជាង២០ដែលក្នុងនោះមានក្រុមហ៊ុនរបស់កាណាដា អង់គ្លេស និងអូស្រ្តាលីជាដើមបានគោរពតាមការចង់បានរបស់ប្រទេសចិន។ នេះបញ្ជាក់អោយឃើញពីជោគជ័យមួយទៀតរបស់មេដឹកនាំចិនដែលធ្វើឲ្យពិភពលោកទទួលស្គាល់ថាតៃវ៉ាន់ជារបស់ខ្លួន។
ប៉ុន្តែទោះបីជាអាជ្ញាធរបានតម្រូវឲ្យក្រុមហ៊ុនអាកាសចរបរទេស ដកចេញពីគេហទំព័ររបស់ខ្លួនដែលដាក់ថាតៃវ៉ាន់ជាប្រទេសមួយយ៉ាងណាក៏ដោយចុះ ក៏ក្រុមហ៊ុនអាកាសចរអាមេរិកធំៗចំនួនពីរគឺ Delta Airlines និង American Airlines បដិសេធមិនធ្វើតាមការចង់បានរបស់ក្រុងប៉េកាំងដែរ។
ក្រុមហ៊ុនទាំងនោះលើកហេតុផលថានេះជារឿងនយោបាយរវាងប្រទេសនឹងប្រទេស ពោលគឺរវាងចិននិងអាមេរិក។ ក្រុមហ៊ុនទាំងពីរក៏លើកហេតុផលមួយទៀតដែរថាពួកគេគោរពតាមការសម្រេចរបស់រដ្ឋាភិបាលអាមេរិក។
យោងតាមការចុះផ្សាយរបស់សារព័ត៌មានFinancial Times របស់អាមេរិក អាមេរិកបានហៅថាវិធានការណ៍របស់ចិនថាធ្វើឡើងមិនសមហេតុផល ហើយអាមេរិកក៏បានអំពាវនាវឲ្យក្រុមហ៊ុនអាកាសចរអាមេរិកកុំគោរពតាមការចង់បានរបស់ចិន។
អ្នកនាំពាក្យក្រសួងការបរទេសចិន លោកស្រី ហួរ ឈុនយីង បានថ្លែងជាមួយអ្នកសារព័ត៌មានកាលពីថ្ងៃទី១៩ខែកក្កដា ថាចិនមានជំហរមួយយ៉ាងពិតប្រាកដជុំវិញរឿងនេះ។ អ្នកស្រីបន្តថាសហគ្រាសបរទេសដែលកំពុងប្រតិបត្តិការក្នុងប្រទេសចិនត្រូវគោរពអធិបតេយ្យភាពនិងបូរណភាពទឹកដីនិងគោរពតាមច្បាប់និងបទបញ្ញត្តិនានារបស់ចិន។
ថ្ងៃទី២៥ខែកក្កដាជាថ្ងៃឱសានុវាទចុងក្រោយដែលរដ្ឋាភិបាលចិនបានដាក់ចំពោះក្រុមហ៊ុនអាសចរបរទេសដែល នៅតែដាក់ថាតៃវ៉ាន់ជាប្រទេសមួយដោយឡែកពីចិន។ យោងតាមការចុះផ្សាយរបស់ការសែត Washington Post ក្រុមអាកាសចរទាំងនោះនឹងប្រឈមនឹងការដាក់ទណ្ឌកម្មនានាដែលរដ្ឋបាលក្រុងប៉េកាំងបានដាក់ដែលជាអាទិ៍រួមមាន ការដាក់ពិន័យផ្នែករដ្ឋបាល និងវិធានការណ៍ច្បាប់នានាប្រឆាំងក្រុមហ៊ុនទាំងនោះផងដែរ។
