រដ្ឋមន្រ្តីក្រសួងមហាផ្ទៃបានបញ្ជាក់ថា ប៉ូលីសមិនអាចចាប់អ្នកធ្វើយុទ្ធនាការម្រាមដៃស្អាតបានទេ ដោយថាគ្មានច្បាប់ណាចែងបែបហ្នឹងនោះទេ ប៉ុន្តែអ្នកទាំងនោះត្រូវប្រឈមនឹងការពិន័យជាប្រាក់តាមច្បាប់បោះឆ្នោតកំណត់។
រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា លោក ស ខេង ថ្លែងដូច្នេះខណៈលោកចុះជួបអ្នកគាំទ្រគណបក្សនេះកាលពីម្សិលមិញនៅខេត្តព្រៃវែង។
រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា លោក ស ខេង
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ឲ្យដឹងថា គិតត្រឹមព្រឹកនេះមានករណីបណ្តឹងនេះមានចំនួន៥ ដែលកើតមាននៅក្នុងខេត្តបាត់ដំបង និងបន្ទាយមានជ័យ ប៉ុន្តែស្ថិតនៅដំណាក់កាលសម្របសម្រួលនៅឡើយ។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា
លោក ហង្ស ពុទ្ធា បញ្ជាក់បន្ថែមថា អតីតមន្រ្តីគណបក្សសង្រ្គោះជាតិក្នុងចំណោម១១៨នាក់ដែលត្រូវបានហាមមិនឲ្យធ្វើសកម្មភាពនយោបាយក៏មាននៅក្នុងបណ្តឹងករណីម្រាមដៃស្អាតនេះដែរ។
សម្រាប់អ្នកនាំពាក្យ គណបក្សប្រជាធិបតេយ្យមូលដ្ឋាន លោក សាម អ៊ីន មានប្រសាសន៍ថា គណបក្សលោកមិនគាំទ្រយុទ្ធនាការម្រាមដៃស្អាត ហើយក៏មិនគាំទ្រចំពោះច្បាប់ដែលដាក់ពិន័យចំពោះករណីនេះដែរ។
អ្នកនាំពាក្យ គណបក្សប្រជាធិបតេយ្យមូលដ្ឋាន លោក សាម អ៊ីន
នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិក លោក សំ គន្ធាមី មានប្រសាសន៍ថា ការពិន័យអ្នកដែលប្រព្រឹត្តចំពោះករណីនេះគឺធ្ងន់ធ្ងរពេក ដោយថា ច្បាប់បោះឆ្នោតមិនបានចែងច្បាស់ចំពោះករណីនេះទេ និងថាជាការប៉ះពាល់ដល់សេរីភាពបញ្ចេញមតិ។
នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិក លោក សំ គន្ធាមី
លោក សំ គន្ធាមី នៅតែជំរុញដល់ គ.ជ.ប ឲ្យអប់រំដល់ប្រជាពលរដ្ឋសិនមុនអនុវត្តច្បាប់នេះ ព្រោះអ្នកខ្លះនៅតែយល់ថាការនិយាយពីការមិនទៅបោះឆ្នោតគឺជាការបញ្ចេញមតិ។
កាលពីថ្ងៃសុក្រសប្តាហ៍មុន អតីតមន្រ្តីគណបក្សសង្រ្គោះជាតិចំនួន៣នាក់នៅក្នុងខេត្តបាត់ដំបង ត្រូវបានមន្រ្តីគណបក្សប្រជាជនកម្ពុជាប្តឹងទៅកាន់ គណៈកម្មការរៀបចំការបោះឆ្នោតប្រចាំខេត្តមួយនេះ ពាក់ព័ន្ធនឹងយុទ្ធនាការម្រាមដៃស្អាត តាមរយៈសារដែលពួកគេបង្ហោះតាមបណ្តាញសង្គមហ្វេសប៊ុក។ គិតត្រឹមព្រឹកថ្ងៃនេះ ករណីនេះកើនដល់៥បណ្តឹងហើយ នៅក្នុងខេត្តបាត់ដំបង និងបន្ទាយមានជ័យ។