កងកម្លាំងរក្សាសន្តិភាពកម្ពុជាចំនួន ៣៨២នាក់បានបញ្ចប់បេសកកម្ម នៅសាធារណរដ្ឋម៉ាលី និងស៊ូដង់ខាងត្បូង និងត្រូវវិលត្រលប់មកម្ពុជាវិញ នៅរសៀលថ្ងៃនេះ។
យោងតាមសេចក្តីប្រកាសរបស់ក្រសួងការពារជាតិ កងកម្លាំងរក្សាសន្តិភាពកម្ពុជាទាំង ៣៨២នាក់នោះ មានកងវិស្វកម្មព្រលានយន្តហោះលេខ១៨៩ ចំនួន១៦៥នាក់ និង កងកម្ទេចគ្រាប់មិនទាន់ផ្ទុះ លេខ១២៣ ចំនួន១៤៤នាក់ បានបញ្ចប់បេសកម្មពីសាធារណរដ្ឋម៉ាលី និងកងរាជអាវុធហត្ថ លេខ៦១៨ ចំនួន៧៣នាក់ មកពីសាធារណរដ្ឋស៊ូដង់ខាងត្បូង ។
កញ្ញា កុសល ម៉ាលីនដា ជំនួយការអគ្គនាយកនៃមជ្ឈមណ្ឌលកងកម្លាំងរក្សាសន្តិភាព បោសសម្អាតមីន និងគ្រាប់មិនទាន់ផ្ទុះ បានឲ្យដឹងថា បច្ចុប្បន្ននេះ គឺមានកងកម្លាំងកម្ពុជាដែលបំពេញបេសសកម្មក្របខណ្ឌអង្គការសហប្រជាជតិ មានចំនួនសរុប ៨០៨នាក់ ក្នុងនោះមានកងរាជអាវុធហត្ថចំនួន៧៣នាក់ កងវិស្វកម្មចំនួន ២១៦នាក់ កងវិស្វកម្មពហុជំនាញចំនួន ១៨៤នាក់ កងកម្ទេចគ្រាប់មិនទាន់ផ្ទុះចំនួន ១៤៤នាក់ និងកងវិស្វកម្មព្រលានយន្តហោះចំនួន ១៦៥នាក់។
លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងអញ្ជើញចូលរួមក្នុងពិធីទទួលដំណើរមាតុភូមិនិវត្តន៍របស់កងកម្លាំងរក្សាសន្តិភាព ដែលនឹងរៀបចំឡើង នៅអគារមិត្តភាពនៃទីស្តីការគណៈរដ្ឋមន្រ្តី។