សិទ្ធិមនុស្ស, សេរីភាពសារព័ត៌មាន

តុលាការកំពូលសម្រេចឲ្យអតីតបុគ្គលិកវិទ្យុអាស៊ីសេរីនៅជាប់ឃុំដដែល

លោក ណាត សុភាព
| ២៣ កក្កដា ២០១៨
ម៉ោង ១៦:៤៣

អតីតអ្នកព័ត៌មានវិទ្យុអាស៊ីសេរីពីរនាក់ នៅឯសាលាឧទ្ធរណ៍ កាលពីពេលកន្លងទៅ (ខាន់ លក្ខិណា)

តុលាការកំពូលសម្រេចតម្កល់សាលដីកាសាលាឧទ្ធរណ៍ទុកជាបានការដែលបដិសេធសំណើរសុំនៅក្រៅឃុំរបស់អតីតបុគ្គលិកវិទ្យុអាស៊ីសេរី២រូប។

អតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា ត្រូវបានតុលាការចោទប្រកាន់ថា បានលួចផលិតព័ត៌មានពីប្រទេសកម្ពុជាទៅឲ្យបរទេស ដែលធ្វើឲ្យប៉ះពាល់ដល់សន្តិសុខជាតិ។

ក្រុមប្រឹក្សាជំនុំជម្រះតុលាការកំពូលនៅព្រឹកនេះ សម្រេចតម្កល់សាលដីកាសាលាឧទ្ធរណ៍ និងការសម្រេចរបស់សាលាដំបូងរាជធានីភ្នំពេញទុកជាបានការដោយថាការសម្រេចនោះសមហេតុផលស្របតាមច្បាប់។

លោក កែវ វ៉ាន្នី មេធាវីការពារក្តីឲ្យអតីតបុគ្គលិកវិទ្យុអាស៊ីសេរី២រូបនោះ ចាត់ទុកក្រុមប្រឹក្សាជំនុំជម្រះតុលាការកំពូលថា ធ្វើឡើងដោយមិនមានភស្តុតាងដាក់បន្ទុកគ្រប់គ្រាន់ដល់កូនក្តីរបស់លោកនោះទេ។

វាអត់ភស្តុតាងណា ដើម្បីគាំទ្រនូវសេចក្តីសម្រេច ឬអំណះអំណាងរបស់គាត់ទេ ដូច្នេះវាពិតជាអយុត្តិធម៌សំរាប់គាត់ទាំងពីរណាស់

លោក កែវ វ៉ាន្នី មេធាវីការពារក្តីឲ្យអតីតបុគ្គលិកវិទ្យុអាស៊ីសេរី

លោកមេធាវីរូបនោះ អះអាងថា នឹងពិភាក្សាជាមួយកូនក្តីជាថ្មីទៀត ដើម្បីស្នើសុំតុលាការ អនុញាតឲ្យកូនក្តីបាននៅក្រៅឃុំបណ្តោះអាសន្នជួបជុំគ្រួសារ។

ដើរចេញពីបន្ទប់សវនាការ លោក អ៊ួន ឈិន និង យាង សុជាមេត្តា បានថ្លែងប្រហាក់ប្រហែលគ្នាប្រាប់អ្នកសារព័ត៌មានទាំងដៃជាប់ខ្នោះថា ពួកគេរងភាពអយុត្តិធម៌បន្ថែមទៀត ក្រោយពីតុលាការកំពូលសម្រេចតម្កល់ដីកាសាលាឧទ្ធរណ៍ទុកជាបានការ។

លើសពីនេះទៀត ភរិយាលោក អ៊ួន ឈិន គឺអ្នកស្រី ហេង ស៊ីណា បាននិយាយទាំងអួលដើមក ថា តុលាការកំពូលសម្រេចមិនអនុញាតឲ្យប្តីរបស់ពួកគាត់ចេញនៅក្រៅឃុំ ធ្វើឲ្យគ្រួសារគាត់ជួបបញ្ហាជីវភាព ដោយសារគ្មានអ្នករកប្រាក់មកជួយទំនុកបំរុងកូនៗ។

រាល់ថ្ងៃគាត់ជាមេគ្រួសារ។ គាត់នៅផ្គត់ផ្គង់គ្រួសារ ដល់ពេលអត់ពីគាត់ទៅយ៉ាប់ដែរ ព្រោះពេលខ្ញុំឈឺដែរ អយុត្តិធម៌សម្រាប់គ្រួសារខ្ញុំណាស់

ភរិយាលោក អ៊ួន ឈិន គឺអ្នកស្រី ហេង ស៊ីណា

ចំណែក ភរិយាលោក យាង សុជាមេត្តា គឺអ្នកស្រី ឡំា ចន្ថា អំពាវនាវទៅតុលាការទម្លាក់ការចោទប្រកាន់ នឹងដោះលែងស្វាមីគាត់ឲ្យមានសេរីភាពវិញ។

មន្រ្តីស៊ើបអង្កេតនៃសមាគមអាដហុក លោក ស៊ឹង សែនករុណា ដែលតាមដានសវនាការ បានចាត់ទុកការសម្រេចរបស់តុលាការកំពូលថា ធ្វើឡើងក្រោមហេតុផលនយោបាយច្រើនជាងអនុវត្តច្បាប់។

ហេតុផលអ្វីដែលគាត់បានលើកឡើង វាសមល្មមគាត់បាននៅក្រៅឃុំ ហើយមិនបាននៅក្រៅឃុំវាហេតុផលទាំងអស់នេះវាអត់ឆ្លុះបញ្ចាំងពីបទល្មើសនៃការប្រព្រឹត្តរបស់គាត់។ ខ្ញុំគិតថាវាជារឿងហេតុផលនយោបាយវាច្រើនជាង…ពីព្រោះអំពើហ្នឹងវាអត់សមនឹងការចោទទៅលើគាត់ទៅទៀត

មន្រ្តីស៊ើបអង្កេតនៃសមាគមអាដហុក លោក ស៊ឹង សែនករុណា

លោក អួន ឈិន និងលោក យាង សុជាមេត្តា ត្រូវបានសមត្ថកិច្ចចាប់ខ្លួនកាលពីល្ងាចថ្ងៃទី១៤ ខែវិច្ឆិកា ឆ្នាំ២០១៧កន្លងមក ហើយត្រូវបានតុលាការចោទប្រកាន់ថា បានលួចផលិតព័ត៌មានពីប្រទេសកម្ពុជាទៅឲ្យបរទេស ដែលធ្វើឲ្យប៉ះពាល់ដល់សន្តិសុខជាតិ។

អាជ្ញាធរកម្ពុជាបានចាប់ខ្លួនអ្នកទាំងពីរតែជាង ២ខែប៉ុណ្ណោះ បន្ទាប់ពីវិទ្យុអាស៊ីសេរី បានប្រកាសបិទការិយាល័យរបស់ខ្លួននៅក្នុងរាជធានីភ្នំពេញ ក្រោយពីមានបញ្ហាប្រឈមមួយចំនួនជាមួយរដ្ឋាភិបាល៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។