កម្មករបម្រើការងារនៅរោងចក្រផលិតស្បែកជើងមួយក្នុងស្រុកជើងព្រៃ ខេត្តកំពង់ចាម បានបន្តដួលសន្លប់ទៀតនៅថ្ងៃនេះ ខណៈអាជ្ញាធរថា ការដួលសន្លប់នោះ គឺភ័យដួលតាមគ្នា។
កាលពីចុងសប្តាហ៍មុនកម្មករជាង១០០នាក់ បម្រើការងារនៅរោងចក្រ ខាលីងតុន នៅស្រុកជើងព្រៃបានដួលសន្លប់ជាបន្ត បន្ទាប់ក្រោយមានហេតុការណ៍ឆ្លងចរន្តអគ្គិសនីក្នុងរោងចក្រ។
កម្មករម្នាក់បម្រើការងារនៅរោងចក្រនោះកញ្ញា ចាន់ សុណា ប្រាប់វីអូឌីថា នៅម៉ោងជាង៨ព្រឹកនេះ នាងបានឃើញកម្មករ ប្រហែល៥០នាក់ដួលសន្លប់ជាបន្តបន្ទាប់ទៀតនៅថ្ងៃនេះ ខណៈកម្មករទាំងនោះកំពុងបំពេញការងារក្នុងរោងចក្រ។
ប្រធានមន្ទីរការងារខេត្តកំពង់ចាម ចេង ហ៊ាន មានប្រសាសន៍ថា មានកម្មករប្រមាណ២០នាក់ប៉ុណ្ណោះដួលសន្លប់ ខណៈ អាជ្ញាធរ និងភាគីរោងចក្របញ្ជូនទៅព្យាបាលតាមមន្ទីរពេទ្យក្បែរនោះអស់ហើយ។
លោកឲ្យដឹងថា ការដួលសន្លប់របស់កម្មករទាំងនោះដោយសារពួកគេមិនទាន់បាត់ការភ័យខ្លាច បន្ទាប់ ពីមានការភ័យតក់ស្លុតពេលមានអគ្គីភ័យឆាបឆេះក្នុងរោងចក្រនេះកាលចុងសប្តាហ៍មុន។
ប្រធានមន្ទីរការងារខេត្តកំពង់ចាម ចេង ហ៊ាន
លោកនាយករដ្ឋមន្ត្រី ហ៊ុន សែន កាលពីដើមឆ្នាំ២០១៨ បានបញ្ជាទៅស្ថាប័នជំនាញទាំងអស់ឲ្យសិក្សារកមូលហេតុ នៃការដួលសន្លប់របស់ក្រុមកម្មការិនីក្នុងចំនួនច្រើននៅតាមបណ្ដារោងចក្រកាត់ដេរនានា ក្នុងនោះលោក ហ៊ុន សែន ក៏ជំរុញឲ្យផ្តល់ម៉ោងសម្រាក និងត្រូវផ្តល់អាហារូបត្ថម្ភដល់ក្រុមកម្មករបានសមរម្យផងដែរ។
លោកនាយករដ្ឋមន្ត្រី ហ៊ុន សែន
ប្រធានសហភាពការងារកម្ពុជា លោក អាត់ ធន់ ធ្លាប់លើកឡើងថា តាមការស្រាវជ្រាវករណីកម្មករដួលសន្លប់គឺដោយសារបរិយាកាសទាំងក្នុង និងក្រៅរោងចក្រមិនល្អ ការប្រើប្រាស់ថ្នាំគីមីផ្សេង ធ្វើការហួសកំលាំង ការហូបចុកមិនគ្រប់គ្រាន់ ការធ្វើការយូរឆ្នាំ និងច្រើនម៉ោងជាដើម។ ហើយលោក អាត់ ធន់ បានផ្តល់អនុសាសន៍ទៅក្រសួងការងារនិងភាគីរោងចក្រទាំងអស់ត្រូវឲ្យធ្វើការកែលំអរលក្ខខណ្ឌទាំងនោះឲ្យបានល្អប្រសើរឡើងវិញផងដែរ៕