មន្ត្រីជាន់ខ្ពស់ក្រសួងឧស្សាហកម្ម និងសិប្បកម្មថា កម្ពុជានៅមិនមានវិធីណាមួយដើម្បីផលិតអំបិលសម្រាប់ផ្គត់ផ្គង់តម្រូវការក្នុងស្រុក ក្រៅតែប្រើវិធីធម្មជាតិឡើយ។
អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា មានប្រសាសន៍ប្រាប់វីអូឌីថាក្រសួងនេះមិនមានវិធីកែច្នៃផលិតអំបិលក្រៅពីការរំហួតទឹកសមុទ្រនោះទេ ដែលវានឹងធ្វើអោយការផលិតមានបញ្ហានៅពេលមានភ្លៀងធ្លាក់ខ្លាំង។
អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា
លោក អ៊ុំ សុថា បញ្ជាក់ថា លោកគិតថាយើងគួរតែសាកល្បងប្រើវិធីផ្សេងដើម្បីផលិតអំបិលក្រៅតែពីពឹងផ្អែកកំដៅព្រះអាទិត្យដែរ ដោយថា រង់ចាំមើលអ្នកបច្ចេកទេសសិក្សាសិន។
អ្នកនាំពាក្យរូបនេះបន្តថា ការនាំចូលអំបិលនេះគឺជាដំណោះស្រាយចំពោះមុខ ដោយថា នេះជាចរន្តធម្មតានៃសេដ្ឋកិច្ចទីផ្សារសេរី ប៉ុន្តែត្រូវគោរពតាមគោលការណ៍ស្តង់ដារក្រសួងកំណត់ និងត្រូវមានជាតិអ៊ីយ៉ូត។
សហប្រធានសហគមន៍អ្នកផលិតអំបិលខេត្តកំពត-កែប លោក ប៊ុន បារាំង ក៏បានថ្លែងប្រាប់VODកាលពីសប្តាហ៍មុនដែរថា កម្ពុជានៅមិនទាន់មានវិធីផលិតអំបិលក្រៅពីវិធីរំហួតទឹកសមុទ្រដោយកំដៅព្រះអាទិត្យនៅឡើយ។
សហប្រធានសហគមន៍អ្នកផលិតអំបិលខេត្តកំពត-កែប លោក ប៊ុន បារាំង
លោក ប៊ុន បារាំង ក៏បានប្រាប់VODឲ្យដឹងថា កាលពីថ្ងៃទី១២ ខែកក្កដាកន្លងទៅថា សហគមន៍របស់លោក និងអភិលបាលខេត្តកំពត លោក ជាវ តាយ បានបើកកិច្ចប្រជុំដើម្បីពិភាក្សាអំពីកង្វះអំបិលសំរាប់ផ្គត់ផ្គង់ក្នុងស្រុក។ កិច្ចប្រជុំបានសម្រេចនាំអំបិលចូល ៣ម៉ឺនតោន ពីប្រទេសចិនសំរាប់ចែកចាយលើទីផ្សារ។
លោក ប៊ុន បារាំង បាននិយាយថា អំបិលនឹងនាំចូលដល់ប្រទេសកម្ពុជាក្នុងខែតុលាឆ្នាំ២០១៨ ស្របពេលដែលអំបិលកម្ពុជាអស់ពីស្តុក។ តម្លៃអំបិលនឹងថ្លៃជាងអំបិលដែលផលិតក្នុងប្រទេសកម្ពុជា ដោយឡើងពី៣៥០រៀលក្នុងមួយគីឡូក្រាម ទៅ ៥០០រៀលក្នុងមួយគីឡូក្រាម ព្រោះត្រូវចំណាយទៅលើសេវាការដឹកជញ្ជូនពីប្រទេសចិន។
ក្នុង មួយឆ្នាំៗប្រទេសកម្ពុជាត្រូវការអំបិលប្រមាណ១០ម៉ឺនតោន សំរាប់បំពេញតម្រូវការក្នុងស្រុក ប៉ុន្តែក្នុងឆ្នាំ២០១៧ កម្ពុជាផលិតបានត្រឹមតែ៣ម៉ឺន៣ពាន់តោនប៉ុណ្ណោះ ហើយក្នុងឆ្នាំ២០១៨ ពុំបានផលិតនោះទេ ដោយមានភ្លៀងធ្លាក់ច្រើន។ កម្ពុជាមានកសិដ្ឋានផលិតអំបិល៧កន្លែងក្នុងខេត្តកែបនិងកំពត ដោយមានផ្ទៃដីសរុបចំនួន៤៦០០ហិចតា ក្នុងនោះមានក្រុមផលិតករចំនួន ២០០នាក់។
កាលពីឆ្នាំ២០០៨ ប្រទេសកម្ពុជាធ្លាប់បានជួបបញ្ហាកង្វះអំបិលប្រើប្រាស់ម្តងរួចហើយ ដោយសារមានភ្លៀងធ្លាក់ច្រើន ហើយបានទិញអំបិលប្រមាណ៣ម៉ឺនតោនមកពីប្រទេសចិន។
ទោះយ៉ាងណាក៏ដោយបើតាម លោក អ៊ុំ សុថា កាលពីដើមឆ្នាំ២០១៧ កម្ពុជាក៏ធា្លប់នាំអំបិលទៅប្រទេសបារាំងជាលើកដំបូងប្រមាណ១០តោនផងដែរ។
