គណៈកម្មាធិការជាតិរៀបចំការបោះឆ្នោត (គ.ជ.ប) ស្នើក្រសួងនិងស្ថាប័នពាក់ព័ន្ធចាត់វិធានការ លោកមេធាវី ជូង ជូងី តាមតួនាទីរៀងខ្លួន ដោយសារតែលោករារាំងពលរដ្ឋមិនអោយទៅបោះឆ្នោត។
ការស្នើនេះធ្វើឡើងបន្ទាប់ពី គ.ជ.ប បានទទួលសំណើពីគណបក្សប្រជាជនកម្ពុជា ដោយថា លោក ជូង ជូងី ប្រើហ្វេសប៊ុករារាំងអ្នកមានសិទ្ធិបោះឆ្នោតមិនឲ្យទៅបោះឆ្នោត គឺជាអំពើបំពានច្បាប់។
សេចក្តីជូនដំណឹងចេញកាលពីម្សិលមិញ គ.ជ.ប ប្រកាសថា សកម្មភាពរបស់មេធាវីរូបនេះគាំទ្រអតីតមេដឹកនាំគណបក្សប្រឆាំងនៅក្រៅប្រទេសដែលអំពាវនាវកុំឲ្យពលរដ្ឋទៅបោះឆ្នោត ដោយថា ជាការធ្វើឲ្យមានការភ័ន្តច្រឡំ និងបាត់បង់ទំនុកចិត្តលើការបោះឆ្នោត។
តាមសេចក្តីជូនដំណឹងដដែលនេះ គ.ជ.ប បានស្នើបិទហ្វេសប៊ុករបស់ លោកមេធាវី ជូង ជូងី តាមរយៈប្រកាសអន្តរក្រសួងលេខ១៧០ ពិនិត្យនិងចាត់វិធានការចំពោះការហាមធ្វើសកម្មភាពនយោបាយរបស់លោក និងសុំទៅ គណៈមេធាវីចាត់វិធានការបន្ថែម។
អ្នកនាំពាក្យនិយ័តករទូរគមនាគមន៍កម្ពុជា លោក អ៊ឹម វត្ថា និងអ្នកនាំពាក្យគណៈមេធាវី លោក យឹម សារី សុំមិនធ្វើអត្ថាធិប្បាយលើករណីនេះទេ ដោយថា ពួកលោកនៅមិនទាន់ទទួលបានព័ត៌មាននៅឡើយទេ។
អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន លោក ផុស សុវណ្ណ ប្រាប់VODថា លោកបានឃើញព័ត៌មាននេះហើយ លោកថានឹងចាត់ការនៅពេលទទួលបានលិខិតផ្លូវការពីគ.ជ.ប។
រីឯអ្នកនាំពាក្យក្រសួងមហាផ្ទៃ លោក ខៀវ សុភ័គ្រ មានប្រសាសន៍ថា ក្រសួងមហាផ្ទៃឯកភាពនឹងសំណើរបស់ គ.ជ.ប។
អ្នកនាំពាក្យក្រសួងមហាផ្ទៃ លោក ខៀវ សុភ័គ្រ
នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិក លោក សំ គន្ធាមី យល់ថា ករណីនេះគឺជាការបញ្ចេញមតិតែប៉ុណ្ណោះ។
VOD មិនអាចទាក់ទងលោក ជូង ជូងី បានទេនៅថ្ងៃនេះ។
លោក ជូង ជូងី គឺជាមេធាវីមួយរូបដែលបានចេញមុខតតាំងក្តីញឹកញាប់នៅតុលាការឲ្យអតីតមេដឹកនាំបក្សប្រឆាំង លោក សម រង្ស៊ី។
កាលពីថ្ងៃម្សិលមិញនេះអតីតសមាជិកគណបក្សសង្រ្គោះជាតិ៥នាក់មកពីខេត្តបាត់ដំបងត្រូវបានពិន័យជាប្រាក់ក្នុងម្នាក់ៗចំនួន ១០លានរៀល បន្ទាប់ពីមន្ត្រីបក្សអំណាចបានប្តឹងទៅ គ.ជ.ប ក្រោយពេលដែលអតីតមន្ត្រីគណបក្សសង្គ្រោះទាំងនោះបានបង្ហោះតាមបណ្តាញសង្គមហ្វេសប៊ុករបស់ខ្លួន ព្រោះតែធ្វើយុទ្ធនាការម្រាមដៃស្អាត កាលពីថ្ងៃសុក្រសប្តាហ៍មុន។