កងរាជអាវុធហត្ថលើផ្ទៃប្រទេសចល័តកម្លាំងជាង១០០០នាក់ ពីរាជធានីភ្នំពេញនិងខេត្តកំពង់ឆ្នាំងទៅកាន់ខេត្តកំពង់ស្ពឺដោយថា ដើម្បីការពារសន្តិសុខសណ្តាប់ធ្នាប់ក្នុងការបោះឆ្នោត។
តាមសេចក្តីប្រកាសព័ត៌មានរបស់កងរាជអាវុធហត្ថលើផ្ទៃប្រទេសចេញផ្សាយនៅថ្ងៃនេះឲ្យដឹងថា កម្លាំងចំនួន១ ៣១៣នាក់ ត្រូវចល័តចេញពីសាលាកងរាជអាវុធហត្ថនៅភ្នំពេញ និងមជ្ឈមណ្ឌលហ្វឹកហ្វឺនភ្នំជំរាយខេត្តកំពង់ឆ្នាំងទៅកាន់ភូមិសាស្ត្រខេត្តកំពង់ស្ពឺ។ តាមសេចក្តីប្រកាសឲ្យដឹងថា កងកម្លាំងទាំងនេះនឹងត្រឡប់ចូលអង្គភាពដើមវិញនៅថ្ងៃទី២៩ខែកក្កដា។
មានការចល័តកម្លាំងជាបន្តបន្ទាប់មួយរយៈកាលចុងក្រោយនេះគឺ កាលពីថ្ងៃទី១២ ខែកក្កដាចល័តកម្លាំង៨០០នាក់ទៅស្វាយរៀង ចូលរួមក្នុងពិធីអបអរសាទរខួបអនុស្សាវរីយ៍លើកទី២៥ ទិវារាជអាវុធហត្ថ។ ថ្ងៃទី២១ ខែកក្កដា មានការចល័តកម្លាំង៨០០នាក់ពីភ្នំពេញទៅ កំពង់ឆ្នាំងចូលរួមបើកការដ្ឋានសាងសង់ទីលានបាញ់គ្រប់ពិត។
