ទឹកភ្លៀងធ្លាក់ជាបន្ដបន្ទាប់នៅប្រទេសថៃនិងឡាវ បានបង្កឲ្យទឹកទន្លេមេគង្គលើ ក្នុងប្រទេសកម្ពុជាអាចបន្ដកើនឡើងដល់កម្រិតប្រកាសអាសន្ន នៅថ្ងៃទី០២ ខែសីហា ឆ្នាំ២០១៨ខាងមុននេះ ខណៈដែលទឹកទន្លេមេគង្គបានលិចចូលក្រុងស្ទឹងត្រែងកាលពីព្រឹកមិញ។
យោងតាមការជូនដំណឹង របស់ក្រសួងធនធានទឹក និងឧតុនិយម នៅថ្ងៃទី២៩ ខែកក្កដា ឆ្នាំ២០១៨ បានឲ្យដឹងថា ភ្លៀងកំពុងធ្លាក់ខ្លាំងនៅទន្លេមេគង្គលើក្នុងប្រទេសថៃ និងប្រទេសឡាវ ដែលនឹងធ្វើឲ្យទឹកហក់ឡើងខ្ពស់ដល់កម្រិតប្រកាសអាសន្នតាមបណ្តាខេត្តមួយចំនួនដងទន្លេមេគង្គក្នុងប្រទេសកម្ពុជា នៅក្នុងសប្តាហ៍នេះ។
ទឹកទន្លេមេគង្គស្ទឹងតែ្រងអាចកើនឡើងដល់ ១១,០៥ ម៉ែត្រ ទន្លេមេគង្គក្រចេះ ២១,៦៥ ម៉ែត្រ និង ទន្លេមេគង្គកំពង់ចាម ១៤,៨០ ម៉ែត្រ។
យោតាមការផ្សព្វផ្សាយរបស់ក្រសួងធនធានទឹក នៅថ្ងៃនេះបានឲ្យដឹងថា ទឹកទន្លេមេគង្គស្ទឹងត្រែងឡើងដល់១០,៨០ម៉ែត្រ ដែលលើសពីកម្រិតប្រកាសប្រុងប្រយ័ត្ន។ ទឹកបានលិចចូលសង្កាត់បួនក្នុងក្រុងស្ទឹងត្រែង ខេត្តស្ទឹងត្រែង នៅព្រឹកថ្ងៃទី៣០ ខែកក្កដា ឆ្នាំ២០១៨។
អ្នកនាំពាក្យខេត្តស្ទឹងត្រែង លោក ម៉ែន គង់ បានមានប្រសាសន៍ថា អាជា្ញធរខេត្តមិនមានវិធានការណាដែលអាចទប់ស្កាត់ទឹកជំន់បានទេ ប៉ុន្តែអាជ្ងាធរខេត្តបានត្រៀមជួយសង្គ្រោះជាបឋម និងធ្វើការផ្សព្វផ្សាយបន្ថែមតាមប្រព័ន្ធផ្សព្វផ្សាយទៅកាន់ប្រជាពលរដ្ឋរស់នៅតំបន់នោះ។
អ្នកនាំពាក្យខេត្តស្ទឹងត្រែង លោក ម៉ែន គង់
អភិបាលរងខេត្ដក្រចេះ លោក ប៉ែន លីណា បានមានប្រសាសន៍ថា កំរិតកម្ពស់ទឹកមានការកើនឡើងថ្ងៃនេះ ប៉ុន្តែកម្ពស់ទឹក ២១,៦៥ ម៉ែត្រគឺមានភាពល្អបំផុតសំរាប់ប្រជាពលរដ្ឋ ដែលជាអ្នកទន្លេ និងជាអ្នកបង្កបង្កើនផល។ ទោះជាយ៉ាងណា អាជ្ញាធរខេត្តបានត្រៀមខ្លួនរួចរាល់ហើយដែរ ប្រសិនបើកម្ពស់ទឹកកើនឡើងដល់ ២២ ម៉ែត្រ នឹងធ្វើការប្រកាសអាសន្នដល់ប្រជាពលរដ្ឋឲ្យបានដឹង។
អភិបាលរងខេត្ដក្រចេះ លោក ប៉ែន លីណា
អភិបាលខេត្តកំពង់ចាម លោក កួច ចំរើន បានសម្តែងការ ព្រួយបារម្ភ ហើយប្រាប់ប្រជាពលរដ្ឋតាមដងទន្លេថា គួរតែមានការប្រុងប្រយ័ត្នដើម្បីសុវត្ថិភាព បើទោះបីជាកម្ពស់ទឹកមិនទាន់ឡើងខ្ពស់ខ្លាំងក៏ដោយ។
អភិបាលខេត្តកំពង់ចាម លោក កួច ចំរើន
លោក កួច ចំរើន បានបន្ថែមទៀតថា លោកបានត្រៀមខ្លួនរួចរាល់ក្នុងការរៀបចំ និងអនុវត្តន៍ផែនការសម្រាប់អន្ដរាគមន៍ដល់ប្រជាពលរដ្ឋដែលរស់នៅតាមបណ្ដោយទន្លេមេគង្គ ដោយមានការបញ្ជូនថ្នាំសង្កូវនៅតាមមណ្ឌលសុខភាព ប្រសិនជាមានគ្រោះថ្នាក់ដោយសារពស់ចឹក។
ក្រសួងធនធានទឹកបានអំពាវនាវឲ្យ អាជ្ញាធរ និង ប្រជាពលរដ្ឋមានការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ដោយទឹកជំនន់ទន្លេមេគង្គ។
អាជ្ញាធរខេត្តស្ទឹងត្រែងកាលពីសប្តាហ៍មុនបានជម្លៀសប្រជាពលរដ្ឋជាង១២០០គ្រួសារ ក្នុងស្រុកសៀមប៉ាង ដែលរងគ្រោះដោយទឹកជំនន់ពីការបាក់ទំនប់វារីអគ្គិសនីនៅប្រទេសឡាវ។