សមាគមចំនួន៦របស់ខ្មែរនៅក្រៅប្រទេសដែលបានដាក់អ្នកសង្កេតការណ៍បោះឆ្នោតកាលពីថ្ងៃទី២៩ខែកក្កដា បានវាយតម្លៃថា ដំណើរការបោះឆ្នោតនេះ បានប្រព្រឹត្តិទៅដោយសេរី យុត្តិធម៌ និងតម្លាភាព អាចទទួលយកបាន។
ក្នុងសេចក្តីថ្លែងការណ៍រួមមួយចុះថ្ងៃទី៣១ ខែកក្កដានេះ សមាគមចំនួន៦ ដែលអះអាងថា មានមូលដ្ឋាននៅប្រទេសអូស្រ្តាលី និងណូវ៉ែលហ្សេឡង់ បានលើកឡើងថា តាមការចូលរួមសង្កេតការណ៍លើដំណើរការបោះឆ្នោតជ្រើសតាំងតំណាងរាស្រ្តនីតិកាលទី៦នេះ គឺបានប្រព្រឹត្តិទៅដោយរលូន ស្ថិតក្នុងបរិយាកាសល្អប្រសើរទាំងក្នុងពេលធ្វើយុទ្ធការបោះឆ្នោត និងថ្ងៃបោះឆ្នោតដោយ គ្មានអំពើហិង្សា ឬមានការគំរាមកំហែងណាមួយឡើយ។
សមាគមទាំងនោះរួមមាន សមាគមខ្មែរ-អូស្ត្រាលីនៃឃ្វីនស្លែនដ៍, សមាគមពលរដ្ឋខ្មែរអូស្រ្តាលី-រដ្ឋវិចគូរីយ៉ា, សមាគមយុវជនខ្មែរទីក្រុងស៊ីដនី, សមាគមមិត្តភាពកម្ពុជានិងវប្បធម៌ប្រចាំរដ្ឋអូស្ត្រាលីខាងត្បូង, សមាគមទ្រទ្រង់វប្បធម៌ខ្មែរ រដ្ឋធានីវែល្លីងគុន និងសមាគមខ្មែរហាមីលគុន-ភ្នំពេញ។
ក្នុងសន្និសីទសារព័ត៌មានមួយកាលពីម្សិលមិញ តំណាងអ្នកសង្កេតការណ៍បោះឆ្នោតមកពីប្រទេសចំនួន៦ដែលបានអង្កេតការណ៍បោះឆ្នោតក្នុងប្រទេសកម្ពុជា មានប្រទេសម៉ាឡេស៊ី រុស្ស៊ី ឡាវ ឥណ្ឌា ថៃ និងប្រទេសវៀតណាម ក៏បានអះអាងថា ការបោះឆ្នោតក្នុងប្រទេសកម្ពុជាថ្ងៃទី ២៩ ខែកក្កដាបានប្រព្រឹត្តទៅដោយសេរី យុត្តិធម៌ និងតម្លាភាព ហើយពួកគេបានសាទរចំពោះប្រជាពលរដ្ឋដែលបានចូលរួមបោះឆ្នោតនៅទូទាំងប្រទេសមានរហូតដល់ ៨២,១៧ ភាគរយ។