ក្រសួងការបរទេសនិងសហប្រតិបត្តិការអន្តរជាតិ បានសម្តែងការខកចិត្តចំពោះប្រតិកម្មរបស់ប្រទេសប្រជាធិបតេយ្យមួយចំនួនដែលបានវាយតម្លៃក្នុងន័យអវិជ្ជមាន ចំពោះការបោះឆ្នោតសភាជាហូរហែចាប់តាំងពីថ្ងៃបោះឆ្នោតមកម្ល៉េះ។
សេចក្តីថ្លែងការណ៍ពីម្សិលមិញ ក្រសួងការបរទេសនិងសហប្រតិបត្តិការអន្តរជាតិកម្ពុជាថា ខ្លួនមានការសោកស្តាយចំពោះរដ្ឋាភិបាលបរទេសមួយចំនួនដែលវាយតម្លៃថា ការបោះឆ្នោតសភាកន្លងទៅនេះមិនសេរីនិងយុត្តិធម៌ ដោយថា រដ្ឋាភិបាលទាំងនោះមិនបានបញ្ជូនអ្នកសង្កេតការណ៍មកចូលរួមទេ។ ក្រសួងក៏បានហៅការវាយតម្លៃនេះ ថា មិនបានឲ្យតម្លៃដល់អ្នកទៅបោះឆ្នោតជិត៧លាននាក់។
កម្ពុជាក៏បានអះអាងថា ការបោះឆ្នោតអាណត្តិទី៦នេះ ដំណើរការល្អប្រសើរជាងអាណត្តិមុនដោយថា ការអនុវត្តនីតិវិធីនានាដំណើរការទៅតាមច្បាប់មានការចូលរួមពីអ្នកសង្កេតការណ៍ជាតិ អន្តរជាតិ និងតំណាងគណបក្សនយោបាយ សរុបទាំងអស់ជិត២០ម៉ឺននាក់។
តាំងតែពីថ្ងៃបោះឆ្នោតដែលបានប្រព្រឹត្តិកាលពីថ្ងៃអាទិត្យ ទី២៩ ខែក្កដា ឆ្នាំ២០១៨ កន្លងទៅនេះ ក្រុមប្រទេសប្រជាធិបតេយ្យដែលរួមមានសហរដ្ឋអាមេរិកនិងសហភាពអឺរ៉ុបជាដើម បានបន្តសម្ដែងនូវការខកចិត្តចំពោះការបោះឆ្នោតនៅកម្ពុជា ដោយថា ជាការបោះឆ្នោតមួយដែលមិនសេរីនិងយុត្តធម៌ត្រឹមត្រូវនោះទេ។
