ខុសពីតារាជើងចាស់មួយចំនួន ដែលបាត់មុខយូរ ហើយត្រលប់មកកាន់ការសម្ដែងជាថ្មីរមែងប្រកាសថានឹងប្រឹងអោយអស់ពីសមត្ថភាព ដើម្បីទាក់អារម្មណ៍មហាជនអោយងាកមកគាំទ្រវិញ តារាជើងចាស់អ្នកនាង បូនីតា ដាដេណា ដែលត្រូវគេស្គាល់ថាជាតួអង្គអាបល្បី ឈ្មោះកាលពីអតីតកាល បែរជាអះអាងថា អ្នកនាងនឹងឈប់សម្ដែងកុនទៀតហើយ នៅក្នុងឱកាសដែលអ្នកនាងបង្ហាញស្នាដៃចុងក្រោយកាលពីថ្ងៃទី១ សីហាមុននេះ។
អ្នកនាងបានទាំងបង្ហើបថាស្វាមីដែលជាសេដ្ឋីជនជាតិអារ៉ាប់របស់ខ្លួន អាចនឹងដាក់គំនាបអោយអ្នកនាងដកខ្លួនអោយកាន់តែឆ្ងាយពីការផលិតភាពយន្តនោះផង កុំថាឡើយដល់អោយបន្តពាក់ព័ន្ធនឹងសិល្បៈ។
អ្នកនាង បូនីតា ដាដេណា បានប្រកាសនៅថ្ងៃសម្ពោធរឿង«ម្ចាស់ទាយាទ»ដែលជាស្នាដៃអ្នកនាងសម្ដែងជាតួឯក និងដឹកនាំផលិតដោយផ្ទាល់ថា អ្នកនាងនឹងឈប់សម្ដែងនៅក្នុងស្នាដៃភាពយន្តទៀតហើយ ដោយចាត់ទុកថាភាពយន្តដែលអ្នកនាងប្រកាសដាក់បញ្ចាំងក្នុងរោងកុននៅថ្ងៃទី២ សីហានេះ គឺជាស្នាដៃចុងក្រោយ និងជារឿងដែលអ្នកនាងទទួលសម្ដែង បើទោះជាអ្នកនាងនៅបន្តបោះទុនផលិតភាពយន្តដើម្បីប្រកួតប្រជែង។
អ្នកនាងថាបើកុំសាច់រឿងក្នុងរឿង«ម្ចាស់ទាយាទ»ដែលអ្នកនាងបាននិពន្ធត្រូវចិត្តខ្លាំងពេក ប្រហែលមិនចំណាយពេលសម្ដែងដោយផ្ទាល់នោះទេបើតាមតែអ្នកនាងក៏រវល់ច្រើន ហើយស្វាមីជាសេដ្ឋីអារ៉ាប់របស់ខ្លួន ក៏មិនចង់អោយហត់នឿយនៅក្នុងសិល្បៈ។ អ៊ីចឹងហើយ ទើបអ្នកនាងប្រកាសថានឹងមិនមានស្នាដៃភាពយន្តបន្ទាប់ពីរឿង«ម្ចាស់ទាយាទ»ទៀតទេ ដើម្បីកុំអោយស្វាមីរបស់ខ្លួនមិនសប្បាយចិត្ត និងដើម្បីជាការផ្ដល់ឱកាសអោយក្មេងៗជំនាន់ក្រោយបានជំនួសតំណែងអាបធ្មប់ ដែលអ្នកនាងត្រូវបានមហាជនសរសើរមិនដាច់ពីមាត់ថាពូកែសម្ដែងនោះផង។
អ្នកនាងបូនីតា ដាដេណា បញ្ជាក់ថា អ្នកនាងបង្ហាញខ្លួនលើកនេះ មិនមែនមកដណ្ដើមការងារសម្ដែងពីតារាជំនាន់ក្រោយនោះទេ ប៉ុន្តែគឺមកបង្ហាញស្នាដៃចុងក្រោយ ហើយមកលាអ្នកគាំទ្រដើម្បីបញ្ចប់ការសម្ដែងតែម្ដង ជាពិសេសប្រសិនបើអ្នកនាងស្រាប់តែត្រូវបានស្វាមីដែលជាអ្នកជំនួញក្រៅស្រុក ធានាអោយចេញទៅរស់នៅប្រទេសអាមេរិក ឬអារ៉ាប់ ដែលជាទីតាំងមុខជំនួញរបស់ស្វាមីនៅទីនោះ។
អ្នកនាងថាខ្លួនចូលចិត្តសម្ដែងជាតួខ្មោច ជាតួអាប ហើយដោយសារតែចង់បន្សល់ស្នាដៃមុនពេលបោះបង់អោយអ្នកគាំទ្របានចងចាំ ទើបសម្រេចចិត្តទទួលសម្ដែងក្នុងរឿង«ម្ចាស់ទាយាទ» ដោយរំពឹងថាការដាក់លក់សំបុត្រគ្រប់រោងរបស់ភាពយន្តមួយនេះ នឹងមានការគាំទ្រពេញទំហឹង។
យ៉ាងណាមិញ បើទោះជាចំណេញឬមិនចំណេញ ក៏អ្នកនាងនៅតែបន្តផលិតភាពយន្តទៀតដែរ ដោយគ្រាន់តែមិនសម្ដែងខ្លួនឯង លើកលែងតែភាពយន្តនោះ មានសាច់រឿងតម្រូវពិបាករកអ្នកសម្ដែងអោយត្រូវប៉ុណ្ណោះ។
អ្នកនាងថាស្វាមីវ័យជាង៦០ឆ្នាំរបស់ខ្លួន គ្រោងធានាអោយអ្នកនាងចេញទៅរស់នៅអាមេរិក ឬប្រទេសអារ៉ាប់ នៅអំឡុងខែ១២ខាងមុខ ប៉ុន្តែអ្នកនាងនឹងបន្តឡើងចុះស្រុកកំណើត ដោយសារតែអ្នកនាងមិនចង់បែកឆ្ងាយពីសាច់ញាតិបងប្អូន និងនៅចង់បន្តការផលិតកុនមួយរឿង ឬ២រឿងក្នុងមួយឆ្នាំ ជាពិសេសគឺរឿងបុរាណ ដែលអ្នកនាងប្រាប់ថាគឺជាចំណូលចិត្តរបស់ខ្លួន៕
