តុលាការកំពូលនឹងបើកសវនាការជំរះក្តីនៅសប្តាហ៍ក្រោយ លើសំណុំរឿងបណ្តឹងសារទុក្ខរបស់គ្រូពេទ្យភូមិម្នាក់ឈ្មោះ យ៉ែម ជ្រិន ដែលរងការចោទថា បានចាក់ថ្នាំធ្វើឲ្យពលរដ្ឋឃុំរកាខេត្តបាត់ដំបងជាង១០០នាក់ ឆ្លងមេរោគអេដស៍ ។
កូនស្រីរបស់ជនជាប់ចោទឈ្មោះជ្រិន តុលា បានឲ្យដឹងថា គាត់ទើបទទួលបានដំណឹងនេះ ប៉ុន្តែថា ក្រុមគ្រួសារគ្រោងស្នើសុំឲ្យតុលាការពន្យារពេលសវនាការទៅដើមឆ្នាំក្រោយវិញ ដោយសារតែពេលនេះលោក យ៉ែម ជ្រិន មានជំងឺប្រចាំកាយ។
សំណុំរឿងបណ្តឹងសារទុក្ខ របស់គ្រូពេទ្យភូមិ យ៉ែម ជ្រិន រងការចោទថា បានចាក់ថ្នាំធ្វើឲ្យពលរដ្ឋនៅឃុំរកា ប្រមាណ១២២នាក់ឆ្លងមេរោគអេដស៍ តុលាការគ្រោងនឹងជំនុំជម្រះនៅថ្ងៃទី៨ ខែសីហា ឆ្នាំ២០១៨នេះ។
លោក យ៉ែម ជ្រិន សារភាពនៅក្នុងសវនាការខេត្តបាត់ដំបងកាលពីថ្ងៃទី៣ ខែធ្នូ ឆ្នាំ២០១៥ ថា កន្លែងពិនិត្យសុខភាពរបស់គាត់ ពុំមានសុំច្បាប់អនុញ្ញាត នឹងចេះចាក់ថ្នាំបន្តិចបន្តួចព្យាបាលអ្នកភូមិ ដោយប្រើម្ជុលរួមគ្នា ទើបបណ្តាលឲ្យរាប់រយនាក់ឆ្លងមេរោគអេដស៍។
ក្រោយពីសវនាការ តុលាការបាត់ដំបងបានសម្រេចផ្តន្ទាទោស លោក យ៉ែម ជ្រិន ២៥ឆ្នាំ និងចោទប្រកាន់ចំនួន៣បទល្មើស រួមមាន ឃាតកម្ម អំពើឃោរឃៅ តាមមាត្រា ២០៥ នៃក្រម ព្រហ្មទណ្ឌ ការប្រព្រឹត្តចម្លងមេរោគដេស៍ទៅ អ្នកដទៃតាមមាត្រា១៨ និងមាត្រា៥០ នៃច្បាប់ស្តី ពីការបង្ការ និងការប្រយុទ្ធទប់ស្កាត់ការរីករាលដាល មេរោគអេដស៍/ជំងឺអេដស៍ និងទី៣ ការធ្វើអាជីវកម្មពេទ្យដោយគ្មានការអនុញ្ញាត៕