អ្នកជំនួញដែលកំពុងទិញ-លក់ដី និងអ្នកជំនាញស្រាវជ្រាវពីស្ថានភាពសេដ្ឋកិច្ចបង្ហាញការយល់ឃើញខុសគ្នា ចំពោះស្ថានភាពទីផ្សារដីធ្លីក្រោយការបោះឆ្នោតអាណត្តិទី៦នេះ។
ម្ចាស់ក្រុមហ៊ុនពុះដីឡូត៍លក់ និងជាម្ចាស់បុរីឡេងណាវ៉ាត្រាអចលនទ្រព្យ លោក ឡេង ណាវ៉ាត្រា មានប្រសាសន៍ថា តម្រូវការទិញដីកើនឡើងជាលំដាប់ មិនមានការប្រែប្រួលអ្វីទេ ទោះក្នុងអំឡុងពេលបោះឆ្នោតក៏ដោយ។
ម្ចាស់ក្រុមហ៊ុនពុះដីឡូត៍លក់ និងជាម្ចាស់បុរីឡេងណាវ៉ាត្រាអចលនទ្រព្យ លោក ឡេង ណាវ៉ាត្រា
ចំណែកប្រធានសមាគមអ្នកវាយតម្លៃនិងភា្នក់ងារអចលនវត្ថុកម្ពុជា លោក គីម ហ៊ាង មានប្រសាសន៍ថា វិស័យអចលនទ្រព្យកំពុងតែមានភាពទាក់ទាញជាងវិស័យ ផ្សេងៗ និងថាកំពុងតែមានស្ថិរភាពល្អ។
ប្រធានសមាគមអ្នកវាយតម្លៃនិងភា្នក់ងារអចលនវត្ថុកម្ពុជា លោក គីម ហ៊ាង
ប៉ុន្តែសម្រាប់អ្នកជំនាញសេដ្ឋកិច្ចនិងហិរញ្ញវត្ថុលោក ង៉ែត ជូ មានប្រសាសន៍ថា លោកនៅមានការព្រួយបារម្ភ និងមិនប្រញ៉ាប់ចំពោះការវិនិយោគរឿងដីធ្លីទេ ដោយថា ស្ថានភាពនយោបាយមិនទាន់ប្រាកដប្រជាពាក់ព័ន្ធបញ្ហាសេដ្ឋកិច្ចបន្ទាប់ពីបោះឆ្នោតរួច។
អ្នកជំនាញសេដ្ឋកិច្ចនិងហិរញ្ញវត្ថុលោក ង៉ែត ជូ
បើតាម លោក ង៉ែត ជូ ឲ្យដឹងបន្ថែមពីការទិញដូរដីថា មានការផ្អាកនៅមុនកៀកការបោះឆ្នោត ប៉ុន្តែក្រោយការបោះឆ្នោតលោកសង្កេតឃើញមានសកម្មភាពទិញលក់ដីច្រើនគួរសមនៅតំបន់ដែលមានតម្លៃធូរ និងថាប្រជាពលរដ្ឋមិនខ្វល់ពីស្ថានភាពនយោបាយទេ។
ព័ត៌មានដែលផ្សព្វផ្សាយខ្លាំងពីតម្លៃដីធ្លីក្នុងអំឡុងពេលបោះឆ្នោតនេះគឺពាក់ព័ន្ធនឹងតារាចម្រៀងពីររូបដាក់ទុនជាមួយលោក ឡេង ណាវ៉ាត្រា រៀបចំពុះដីឡូត៍លក់។ តារាចម្រៀងទាំងពីរនោះគឺលោក ព្រាប សុវត្ថិ ដាក់ទុន ៥លានដុល្លារ និង លោក ខេមរៈសិរីមន្ត ដាក់ទុន១០លានដុល្លារ។