គណៈកម្មាធិការជាតិរៀបចំការបោះឆ្នោត( គ.ជ.ប) បានបញ្ចប់ការផ្ទៀងផ្ទាត់តួលេខសន្លឹកឆ្នោតដែលកត់ត្រានៅលើក្រដាស និងតួលេខដែលបញ្ជូលក្នុងប្រព័ន្ធកុំព្យួទ័រ ហើយថា មិនមានកំហុសនោះទេ។
សេចក្តីប្រកាសព័ត៌មានរបស់ គ.ជ.ប ដែលចេញផ្សាយកាលពីម្សិលមិញបានឲ្យដឹងថា ក្រុមការងារបានធ្វើការត្រួតពិនិត្យ និងផ្ទៀងផ្ទាត់ឡើងវិញក្នុងរយៈពេលបីថ្ងៃ គឺពីថ្ងៃទី០៤ ដល់ថ្ងៃទី០៦ ខែសីហា ដោយមិនបានរកឃើញនូវកំហុសណាមួយពាក់ព័ន្ធនឹងលទ្ធផលនៃការបោះឆ្នោតឡើយ។
តាមសេចក្តីប្រកាសព័ត៌មានដដែល ក្រុមត្រួតពិនិត្យនីមួយៗបានអនុវត្តការងារត្រួតពិនិត្យ និងផ្ទៀងផ្ទាត់របស់ខ្លួននៅចំពោះមុខតំណាងគណបក្សនយោបាយ អ្នកសង្កេតការណ៍បោះឆ្នោត និងអ្នកសារព័ត៌មាន នៅទីស្តីការ គ.ជ.ប។
គ.ជ.ប នឹងប្រកាសលទ្ធផលបណ្តោះអាសន្ន នៅថ្ងៃទី១១ ខែសីហា តាមរយៈវិទ្យុ និងទូរទស្សន៍ជាតិកម្ពុជា ហើយលទ្ធផលផ្លូវការនឹងត្រូវប្រកាសនៅថ្ងៃទី១៥ ខែសីហា។