រដ្ឋមន្ត្រីការបរទេសរបស់ប្រទេសអូស្ត្រាលី បានលើកឡើងថាប្រទេសខ្លួនមានជម្រើសជាច្រើន ដើម្បីឆ្លើយតបទៅនឹងការបោះឆ្នោតនៅកម្ពុជា ដែលខ្លួនយល់ថាមិនភាពសេរី និងបើកទូលាយ។
នៅក្នុងបទសម្ភាសន៍ជាមួយអ្នកសារព័ត៌មាន ABC កាលពីសប្ដាហ៍មុន លោកស្រី ជូលី ប៊ីសស៊ប (Julie Bishop) រដ្ឋមន្ត្រីការបរទេសអូស្ត្រាលី បានមានប្រសាសន៍ថា អូស្រ្តាលីនឹងខិតខំធ្វើការជាមួយរដ្ឋាភិបាលកម្ពុជា ដើម្បីឲ្យពួកគេបានដឹងពីការព្រួយបារម្ភរបស់អូស្រ្តាលី ដើម្បីស្វែងរកការឆ្លើយតបពីសំណាក់រដ្ឋាភិបាលកម្ពុជា។
លោកស្រី ជូលី ប៊ីសស៊ប (Julie Bishop) រដ្ឋមន្ត្រីការបរទេសអូស្ត្រាលី
លោកស្រីបានបន្តថា ប្រទេសអូស្រ្តាលីបានបញ្ជាក់យ៉ាងច្បាស់ថា ការបោះឆ្នោតនៅកម្ពុជាគឺមិនមានភាពសេរី និងបើកទូលាយនោះទេ ដោយសារតែរដ្ឋាភិបាលកម្ពុជាបង្ក្រាបសកម្មភាពរបស់គណបក្សប្រឆាំង ប្រព័ន្ធផ្សព្វផ្សាយ និងសង្គមស៊ីវិល។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានបដិសេធពីការចោទប្រកាន់របស់អូស្រ្តាលី ដែលថាការបោះឆ្នោតនៅកម្ពុជាមិនមានភាពសេរី ព្រោះថាអូស្រ្តាលីមិនបានចូលរួមសង្កេតការណ៍ដោយផ្ទាល់។ លោកបន្ថែមថាកម្ពុជាមិនមានការព្រួយបារម្ភអ្វីទេ ចំពោះការព្រមានរបស់អូស្រ្តាលី។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
អ្នកវិភាគគោលនយោបាយនិងជាសាស្រ្តាចារ្យរងជំនាញការទូត និងកិច្ចការពិភពលោកនៅមហាវិទ្យាល័យ Occidental នៅទីក្រុងឡូសអែនជឺលែស សហរដ្ឋអាមេរិក បណ្ឌិត អៀ សុផល មានប្រសាសន៍ថា ប្រទេសកម្ពុជាគួរបញ្ឃប់រាល់សកម្មភាពដែលផ្ទុយទៅនឹងនីតិរដ្ឋនៅអូស្ត្រាលី។ លោកបន្តថាកម្ពុជាអាចបំបែកនីតិរដ្ឋនៅកម្ពុជាបាន ប៉ុន្តែមិនសន្មតថាកម្ពុជាអាចធ្វើបានដូចនេះនៅក្នុងប្រទេសដទៃឡើយ ហើយកម្ពុជាមិនអាចត្រួតត្រានិយតករ ប្រព័ន្ធតុលាការ និងប្រព័ន្ធផ្សព្វផ្សាយរបស់គេឡើយ។
បណ្ឌិត អៀ សុផល អ្នកវិភាគគោលនយោបាយនិងជាសាស្រ្តាចារ្យរងជំនាញការទូត
ប្រទេសដែលទទួលស្គាល់ការបោះឆ្នោតនៅកម្ពុជាថាជាការបោះឆ្នោតមួយដែលត្រឹមត្រូវមានដូចជា ប្រទេសចិន ឡាវ វៀតណាម ហ្វីលីពីន និងឥណ្ឌូនេស៊ី។ ប៉ុន្តែប្រទេសមួយចំនួនទៀតមានដូចជា ជប៉ុន អាមេរិក អូស្រ្តាលី អឺរ៉ុប កាណាដា និងអាល្លឺម៉ង់ជាដើមថាការបោះឆ្នោតកាលពីចុងខែកក្កដាមិនមានភាពសេរីនិងយុត្តិធម៌នោះទេ៕