សេដ្ឋកិច្ច

ការនាំចេញរបស់កម្ពុជាកើនឡើងជាង១០ភាគរយក្នុងរយៈពេល១ឆមាសដំបូង

លោក ហ៊ុន សិរីវឌ្ឍន៍
| ០៩ សីហា ២០១៨
ម៉ោង ១៤:២១

សកម្មភាពកម្មករកំពុងផលិតសម្ភារៈ (រូបភាពពី Wah Sun Hand-Bag Factory)

រដ្ឋមន្ត្រីក្រសួងពាណិជ្ជកម្មបានលើកឡើងថាក្នុងរយៈពេល៦ខែនៃឆ្នាំ២០១៨នេះ ការនាំចេញរបស់កម្ពុជាទៅកាន់ទីផ្សារអន្តរជាតិកើនឡើង១១ភាគរយបើធៀបនឹងរយៈពេលដូចគ្នាកាលពីឆ្នាំមុន។

ទីភ្នាក់ងារសារព័ត៌មានជាតិ AKP បានដកស្រង់ប្រសាសន៍របស់រដ្ឋមន្ត្រីក្រសួងពាណិជ្ជកម្មលោក ប៉ាន់ សូរស័ក្កិ ក្នុងពេលដែលលោកជួបជាមួយបេក្ខជនដែលទទួលបានអាហារូបករណ៍ទៅសិក្សានៅប្រទេសជប៉ុនកាលពីម្សិលមិញថា ក្នុងរយៈពេល៦ខែនៃឆ្នាំ២០១៨នេះ ទំហំពាណិជ្ជកម្មរបស់កម្ពុជាសម្រេចបាន ១៣ ៩៨៥លានដុល្លារ ក្នុងនោះការនាំចេញ មានចំនួនប្រមាណ ៥ ៧៩៤លានដុល្លារ គឺកើនឡើង១១ភាគរយ ចំណែកការនាំចូល មានចំនួន ៨ ១៩១លានដុល្លារ គឺបានកើន ១០,៦ភាគរយ បើធៀបនឹងរយៈពេលដូចគ្នានៅឆ្នាំមុន។

លោកក៏បានបញ្ជាក់ថា ការនាំចេញសម្លៀកបំពាក់ នៅក្នុងឆមាសទី១ ឆ្នាំ២០១៨នេះ មានចំនួន ៤ ១៤៣លានដុល្លារ កើនឡើងប្រមាណ ១១ភាគរយ ហើយផលិតផលកសិកម្ម មានចំនួន ២៧២ លានដុល្លារ គឺបានកើនឡើង ៨ភាគរយ ខណៈការនាំចេញផ្សេងៗ មានចំនួន ១ ៣៧៩ លានដុល្លារ គឺបានកើនឡើង ១៤ភាគរយ។

អ្នកនាំពាក្យក្រសួងពាណិជ្ជកម្មលោក ស៊ាង ថៃ មានប្រសាសន៍ប្រាប់វីអូឌីនៅថ្ងៃនេះថាប្រទេសដែលកម្ពុជានាំចេញច្រើនជាងគេមានសហរដ្ឋអាមេរិក សហភាពអឺរ៉ុប ជប៉ុន និងកាណាដា ប៉ុន្តែលោកមិនទាន់អាចបញ្ជាក់ពីប្រទេសដែលនាំចូលមកកម្ពុជាច្រើនជាងគេបាននៅឡើយទេ។

វាល្អសម្រាប់យើង! ឃើញថាវិនិយោគបរទេសគាត់បានវិនិយោគបន្ថែមក្នុងប៉ុន្មានឆ្នាំចុងក្រោយនេះបានកើន ឡើង។ ដូចខ្ញុំបញ្ជាក់ ការផលិតនូវផលិតផលសម្រាប់ធ្វើដំណើរ ឃើញថារោងចក្រមានជាង៦០ហើយ ដែលកើនឡើងជាបន្តបន្ទាប់គ្រាន់តែមកផលិតរបស់ហ្នឹង។ វាជាសញ្ញាណល្អសម្រាប់កម្ពុជាគឺកើនឡើងរហូត

អ្នកនាំពាក្យក្រសួងពាណិជ្ជកម្មលោក ស៊ាង ថៃ

ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិលោក ម៉ី កល្យាណ មានប្រសាសន៍ថាការកើនឡើងនៃទំហំពាណិជ្ជកម្មនេះជារឿងល្អសម្រាប់កម្ពុជា បើទោះបីឆ្នាំនេះជាឆ្នាំបោះឆ្នោតក៏ដោយ។

នេះជារឿងល្អមួយ តាមថ្ងៃមុនគេក៏បានសួរខ្ញុំដែរ ឃើញថាទីផ្សារយើងក៏មានភាពច្រើនបែបដែរ ពីមុននាំចេញទៅតែអាមេរិកកាំង ពីដើមនាំចេញទៅតែអឺរ៉ុបទេ។ តែឥឡូវយើងបាននាំចេញទៅជប៉ុន ទៅប្រទេសអី ផ្សេងជារឿងល្អសម្រាប់យើង។ ជាទូទៅជារឿងដែលយើងត្រូវអបអរសាទរ

ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិលោក ម៉ី កល្យាណ

បញ្ហានយោបាយបន្ទាប់ពីបោះឆ្នោតរួច ហាក់បានធ្វើឲ្យកម្ពុជាមានការរកាំរកូសជាមួយសហរដ្ឋអាមេរិក និងអឺរ៉ុប ដែលជាអ្នកបញ្ជារទិញធំពីកម្ពុជាខណៈលោក ម៉ី កល្យាណ ថាលោកពិបាកផ្តល់យោបល់ចំពោះការសម្រេចចិត្តរបស់ប្រទេសទាំងនោះណាស់ តែលោកយល់ថាកម្ពុជាគួរផលិតផលិតផលឲ្យបានច្រើនមុខ និងទីផ្សារឲ្យបានច្រើនដើម្បីបញ្ចៀសបញ្ហាដែលអាចកើតឡើងជាយថាហេតុណាមួយក្នុងឆមាសទី២នៃឆ្នាំ២០១៨នោះ។

អ្វីដែលយើងធ្វើកើតហ្នឹងដោះស្រាយរឿងមធ្យម និងវែងដូចដែលខ្ញុំបានប្រាប់អញ្ចឹង ពិពិធកម្មទាំងរបស់របរ ទាំងទីផ្សារទាំងអស់ហ្នឹង! កុំឲ្យពឹងតែលើទីផ្សារមួយ ឬវត្ថុធាតុដើមតែមួយហ្នឹងគឺអត់ល្អទេ! ទាល់តែធ្វើពិពិធកម្មឲ្យបានច្រើន គិតបញ្ហារយៈពេលមធ្យម និងយូរអង្វែង មិនអាចគិតត្រឹមតែមួយយប់បានទេ។ គេសម្រេចយ៉ាងណាជារឿងរបស់គេ ខ្ញុំពិបាកផ្តល់យោបល់ណាស់ តែបើសិនជាគេសម្រេចថាដាក់ទណ្ឌកម្ម ឬអីហ្នឹងជារឿងអវិជ្ជមានសម្រាប់ប្រទេសយើងហើយ

ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិលោក ម៉ី កល្យាណ

ប៉ុន្តែសម្រាប់ អ្នកនាំពាក្យក្រសួងពាណិជ្ជកម្មលោក ស៊ាង ថៃ ថាមិនមានសញ្ញាណមិនល្អណាមួយពីប្រទេសទាំងនោះចំពោះពាណិជ្ជកម្មនោះទេ បើទោះបីជាប្រទេសទាំងនោះប្រកាសមិនគាំទ្រការបោះឆ្នោតកាលពីចុងខែកក្កដាកន្លងមកយ៉ាងណាក្តី។

កាលពីឆ្នាំ២០១៧កន្លងទៅ ការនាំចេញរបស់កម្ពុជាមានតម្លៃប្រមាណ ១១,២ពាន់លានដុល្លារ គឺបានកើនឡើង ៩,២ភាគរយ ធៀបនឹងឆ្នាំ២០១៦ ដែលមានទឹកប្រាក់ ១០,២ពាន់លានដុល្លារខណៈការនាំចូលមានទំហំ ១៥,៥ពាន់លានដុល្លារ គឺបានកើន ៩,៨ភាគរយ ធៀបនឹង១៤,១ពាន់លានដុល្លារ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។