ខុសពីក្រុមផលិតករដែលត្រូវតារាសម្ដែងចេញមុខទម្លាយថា បានជំពាក់ប្រាក់លើថ្លៃសម្ដែង ហើយសម្រេចចិត្តហៅតារាសម្ដែងមកសងលុយជំពាក់ ដើម្បីកុំអោយមានរឿងវែងឆ្ងាយ។
លោក អ៊ិន សុភិន ម្ចាស់ផលិតកម្មមហាហង្សបែរជាបានប្រកាសថា មិនសងបំណុលតារាសម្ដែងកញ្ញា ណាក់ ស្រីណា ក្រោយការបង្ហោះនោះទេ ដោយលោកបានអរគុណដែលនាងបានបង្ហោះថាលោកជំពាក់លុយ ដើម្បីអោយមនុស្សម្នាក់បានដឹងនោះផង។
ក្នុងនោះសូម្បីតែការចរចាណាមួយ ក៏លោកប្រកាសថាមិនមានគម្រោងនោះដែរ។ លោក អ៊ិន សុភិន និយាយថា លោកពិតជាទទួលស្គាល់ថាផលិតកម្មមហាហង្សមិនបានបង់លុយចំនួន២ពាន់ដុល្លារ ទៅអោយតារាសម្ដែង កញ្ញា ណាក់ ស្រីណា ក្រោយពីនាងថតចប់ភាពយន្តភាគរឿង«មរតកចុកឈាម»កាលពី១ឆ្នាំមុនប្រាកដមែន ប៉ុន្តែលោកថាហេតុផលដែលលោកមិនបង់ គឺព្រោះតែនាងមិនមែនជាតារាសម្ដែងដែលខាងផលិតកម្មទាក់ទងអោយមកថត និងដោយសារមនុស្សដែលចង់លើកស្ទូយនាងមិនព្រមធ្វើតាមអ្វីដែលបានព្រមព្រៀងគ្នាតែប៉ុណ្ណោះ។
លោកថាភាពយន្តរឿង«មរតកចុកឈាម» គឺមានអតិថិនជនបានជះលុយអោយលោកធ្វើការផលិត ដោយកំណត់អោយលោកយកកញ្ញា ណាក់ ស្រីណា អោយធ្វើតួឯក ដោយសន្យាក្រោយពេលលោកផលិតអោយចប់ គឺនឹងបង់លុយអោយលោកអោយអស់ ដែលបានឯកភាពមិនអោយសល់ ប៉ុន្តែនៅពេលភាពយន្តត្រូវបានបញ្ចប់ អតិថិជនបែរជានៅជំពាក់ប្រមាណជិត២ម៉ឺនដុល្លារទៀត ហើយដោយសារតែហេតុផលមិនទាន់បង់លុយអោយលោកនោះហើយ ទើបខ្សែភាពយន្តទាំងមូលត្រូវពន្យារពេលដាក់ផ្សាយលើទូរទស្សន៍មកទល់ពេលនេះ។
លោកថានិយាយថា អតិថិជនដែលជួលអោយលោកផលិតរឿងមិនបង់លុយអោយលោកគ្រប់ផង តើហេតុផលអីដែលលោកត្រូវផ្ដល់តម្លៃសម្ដែងអោយកញ្ញា ណាក់ ស្រីណា អោយអស់។ ក្នុងនោះលោកក៏បានប្រកាសថាត្រឹមប្រាក់២ពាន់ដុល្លារលោកមិនអត់អោយនាងនោះទេ ប៉ុន្តែបណ្ដាលមកពីហេតុផលហ្នឹង ទើបលោកត្រូវតែបង្កកតម្លៃសម្ដែងរបស់នាងដូចគ្នា ដើម្បីអោយអ្នកទិញរឿងរបស់លោក ដែលបានកំណត់ថាទាល់តែបាន ណាក់ ស្រីណា ជាតួឯក ដោះស្រាយបំណុលអោយលោក។
លោកថាកញ្ញា ណាក់ ស្រីណា មិនមែនជាតារាតែម្នាក់ ដែលលោកបង្កកលុយសម្ដែង ឬមិនបើកអោយតែម្ដងនោះទេ គឺមានតារាច្រើនទៀត ដែលខាងផលិតកម្មមហាហង្សសម្រេចចិត្តធ្វើបែបនោះ ដោយសារតែហេតុផលអ្នកកុម្ម៉ង់តួ មិនព្រមបង់លុយអោយលោកអោយត្រូវនឹងការព្រមព្រៀងដូចគ្នា និងហេតុផលមួយទៀត គឺសំដៅលើតារាដែលគ្មានការទទួលខុសត្រូវលើការងារ។
លោកថាតារាខ្លះកុងត្រាអោយ៣ថ្ងៃក្នុងមួយសប្ដាហ៍ តែដល់ពេលចេញថត គឺសុំថ្ងៃណាក៏រវល់ថ្ងៃណាក៏រវល់ ធ្វើអោយការផលិតភាពយន្តរបស់លោករអាក់រអួល ហើយមានភាពយន្តខ្លះភាគីខាងទូរទស្សន៍មិនអោយលុយនោះផង ដោយសារតែបានផលិតយឺតមិនទាន់ពេល។
លោកបានហៅតារាដែលឡាំប៉ាទារលុយក្រោយថតរឿងចប់មួយចំនួនអោយសំឡឹងមើលពីអ្វីដែលខ្លួនបានធ្វើ ខណៈដែលលោកក៏បានបង្ហើបថាមានតារាមួយចំនួន ក្រៅពីត្រូវផលិតកម្មលោកប្រកាសមិនអោយលុយហើយ ក៏គំរាមប្ដឹងផងដែរ ដោយសារតែភាពមិនគោរពកុងត្រារបស់តារាទាំងនោះ ធ្វើអោយផលិតកម្មខាតបង់។
លោក អ៊ិន សុភិន ម្ចាស់ផលិតកម្មមហាហង្ស
កញ្ញា ណាក់ ស្រីណា បានប្រកាសថា នេះជាមេរៀនដែលនាងមិនធ្លាប់ជួប ហើយនាងក៏មិនខ្វល់ពីមូលហេតុដែលនាំទៅដល់ការបង្កកតម្លៃថតរបស់នាងនោះដែរ ដោយសារតែក្នុងកុងត្រាគឺនាងថតចប់ត្រូវទទួលលុយគ្រប់ចំនួន។ នាងបានហៅអ្វីដែលបានកើតឡើងថា ជាការបំបាក់ទឹកចិត្តចំពោះអ្នកសិល្បករ ខណៈដែលនាងបានទាក់ទងសុំបើកថវិកាដែលនៅសល់ច្រើនលើកមកហើយតែគ្មានដំណោះស្រាយ៕
