កម្មកររោងចក្រមួយស្ថិតនៅក្នុងខណ្ឌពោធិសែនជ័យ រាជធានីភ្នំពេញ នៅថ្ងៃនេះ បាននាំគ្នាតវ៉ាជាថ្មីទៀត ដោយទាមទារឲ្យក្រសួងការងារនិងស្ថាប័នពាក់ព័ន្ធពន្លឿនការបើកប្រាក់ឈ្នួលឲ្យពួកគេ ដោយសារតែថៅកែបានសម្លាប់ខ្លួនដោយមិនបានបើកប្រាក់ឈ្នួលឲ្យពួកគេ។
កម្មករ នៅរោងចក្រកាត់ដេរសម្លៀកបំពាក់ ជូលី អឹភើរឹល (JULEE APPREL) ស្ថិតក្នុងភូមិចំការឱឡឹក សង្កាត់កាកាប ខណ្ឌពោធិសែន បាននាំគ្នាប្រមូលផ្ដុំនៅមុខរោងចក្រជាថ្មីទៀត ដើម្បីទាមទារឲ្យក្រសួងការងារ និងភាគីពាក់ព័ន្ធផ្សេងៗដោះស្រាយសំណងដល់ពួកគេ បន្ទាប់ថៅកែសម្លាប់ខ្លួនដោយមិនបានបើកប្រាក់ឈ្នួលឲ្យពួកគេ។
ក្រោយពីមានករណីនេះ នៅថ្ងៃទី ៨ ខែសីហា កន្លងមកនេះ លោកនាយករដ្ឋមន្រ្តី ហ៊ុន សែន បានប្រាប់ទៅមន្រ្តីក្រោមឱវាទឲ្យប្រញាប់ដោះស្រាយប្រាក់ឈ្នួលឲ្យកម្មររោងចក្រនេះឲ្យបានឆាប់ ប៉ុន្តែរហូតដល់ថ្ងៃនេះ ក្រុមកម្មករ អះអាងថា ពួកគេមិនទាន់ទទួលបានដំណោះស្រាយនៅឡើយទេ។
កម្មករម្នាក់អ្នកស្រី សុខ មុន្នី លើកឡើងថា ពួកគាត់នាំគ្នាតវ៉ាជាថ្មីទៀត ដោយសាររង់ចាំដំណោះស្រាយពីក្រសួងការងារយូរថ្ងៃពេក។ ស្រីបន្តថា ពួកគាត់ទាំងអស់គ្នាគ្មានប្រាក់ បង់ថ្លៃទឹក ថ្លៃបន្ទប់ជួល បង់ធនាគារ និងថ្លៃកូនរៀននោះទេ ខណៈថ្ងៃនេះជាថ្ងៃដែលពួកគាត់ត្រូវបង់ថ្លៃផ្ទះជួល។
អ្នកស្រីថា៖«សូមសម្ដេចជួយខ្ញុំផង ព្រោះអ្នកក្រសួងអ្នកអីគេអត់ជួយខ្ញុំទេ គេពន្យាពេលរហូត។ ខ្ញុំអត់មានលុយបង់ថ្លៃទឹកបង់ភ្លើងគេ ខ្ញុំអត់មានអីហូបទេ។ ខ្ញុំមកធ្វើការនេះ ថៅកែចងកស្លាប់ហើយ។ អញ្ចឹងហើយគ្មានអ្នកដោះស្រាយឲ្យខ្ញុំបានទេ។ ខ្ញុំមានតែលើកម្រាមដៃ១០ សូមឲ្យសម្ដេចតេជោជួយខ្ញុំ»។
កម្មករម្នាក់ទៀតអ្នកស្រី ឡុង សុផល ឲ្យដឹងថាក្រសួងនិងភាគីពាក់ព័ន្ធហាក់គ្មានឆន្ទៈក្នុងការដោះស្រាយឲ្យពួកគាត់ ខណៈដែលកម្មករទាំងអស់រង់ចាំដំណោះស្រាយជាង ១ សប្ដាហ៍កន្លងមកហើយនោះ។
អ្នកស្រីថា៖«ខ្ញុំចង់ឲ្យក្រសួងដោះស្រាយឲ្យលឿនៗបើគាត់អត់ដោះស្រាយទេ គឺយ៉ាប់ហើយ ណាមួយខ្ញុំចង់ឲ្យគាត់បានឬមិនបានឲ្យគាត់ប្រាប់មុនម៉ោង ១១ ព្រឹកហ្នឹង ។ បើអត់លឺដំណឹងអីសោះអញ្ចឹង ពួកខ្ញុំម្នាក់ៗអស់សង្ឃឹមគ្រប់គ្នា ធម្មតាគាត់ធ្វើតាមច្បាប់គាត់ដឹងហើយ ។ ធម្មតាកម្មករឥឡូវកំពុងអត់លុយ ហើយាគាត់អត់មានផ្ញើរដំណឹងអីមកស្ងាតត់សូន្យ អញ្ចឹងពួកខ្ញុំក៏ពិបាកដែរ បើគាត់ថាមិនទាន់បានគាត់ប្រាប់តាមនឹងដែរ»។
ក្រុមកម្មករអះអាងថា ប្រសិនបើក្រសួងនិងស្ថាប័នពាក់មិនពន្លឿនការដោះស្រាយឲ្យពួកគេនោះទេ ពួកគេនឹងនាំគ្នាតវ៉ាបិទផ្លូវរហូតបានដំណោះស្រាយ។
វី.អូ.ឌីមិនអាចសុំការឆ្លើយពីអ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈលោក ហេង សួរ បានទេ។
កម្មករឲ្យដឹងថា រោងចក្រ ជូលី អឹភើរឹល (JULEE APPREL) មានកម្មករសរុប២៧០នាក់ និងមានថៅកែជាជនជាតិកូរ៉េខាងត្បូងបានចង់កសម្លាប់ខ្លួនក្រោយថ្ងៃបោះឆ្នោត ហើយថៅកែរោងចក្រនេះជំពាក់ប្រាក់ឈ្នួលកម្មករម្នាក់ចម្លោះពី២៥០ដុល្លារទៅ៣០០ដុល្លារ៕
