គណបក្សខ្មែរឈប់ក្រ ប្រកាសថាខ្លួនមិនទទួលស្គាល់លទ្ធផលបោះជាតិអាណត្តិទី៦នេះទេ និងស្នើឲ្យមានការបោះឆ្នោតឡើងវិញ។
ក្នុងសន្និសីទកាសែតកាលពីព្រឹកមិញនៅទីស្នាក់ការគណបក្សនេះនៅរាជធានីភ្នំពេញ ប្រធានគណបក្សខ្មែរឈប់ក្រ លោកក្រវ៉ាញ ដារ៉ន បានប្រកាសបន្តផ្ទាល់តាមរយៈបណ្តាញអ៊ីនធឺណែតពីសហរដ្ឋអាមេរិកមកថា គណបក្សលោកមិនទទួលស្គាល់លទ្ធផលបោះឆ្នោតដែលបានប្រព្រឹត្តទៅកាលពីថ្ងៃទី២៩កក្កដាកន្លងទៅទេ ដោយសារមិនមានភាពប្រក្រតីនិងតម្លាភាព ហើយក៏ស្នើសុំបោះឆ្នោតឡើងវិញដោយមានសហគមន៍អន្តរជាតិចូលរួមត្រួតពិនិត្យ។
លោក ក្រវ៉ាញ ដារ៉ន មានប្រសាសន៍ថា
រដ្ឋាភិបាលផ្តាច់ការណ៍និងភាពឃោរឃៅ បានបង្ហាញឲ្យឃើញថា ក្តីសង្ឃឹមនិងបំណងប្រាថ្នារបស់ប្រជាពលរដ្ឋមិនមានសារៈសំខាន់អ្វីដល់រដ្ឋាភិបាលកាន់អំណាចនេះទេ។ ការបោះឆ្នោតនេះមិនមែនជាអ្វីក្រៅពីជាការក្បត់នឹងឆន្ទះរបស់ប្រជានុរាស្ត្រឡើយ»។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថា នេះជាការលើកឡើងដើម្បីការពារខ្លួនដោយសារមិនបានទទួលសំឡេងឆ្នោតតែប៉ុណ្ណោះ។
លោក ហង្ស ពុទ្ធា មានប្រសាសន៍ថា ៖
«បាទ! បើសិនជាមិនទទួលស្គាល់ហេតុអ្វីចូលរួមតាំងពីដើមទីបាទ? ហើយបើសិនជាទទួលស្គាល់សហគមន៍អន្តរជាតិឲ្យធ្វើជាអ្នករៀបចំបោះឆ្នោត អញ្ចឹងមានន័យថាមិនចាំបាច់មានខ្មែរឬយ៉ាងម៉េចបាទ? អញ្ចឹង! នេះគ្រាន់តែជាការលើកឡើងដើម្បីការពារខ្លួនដែលគណបក្សលោកអត់បានទទួលបានសំឡេងឆ្នោតតែប៉ណ្ណឹង! ផ្ទុយទៅវិញគឺមិនមែនគណបក្សមួយឬបុគ្គលម្នាក់ជាអ្នកសម្រេចចិត្តនោះទេ អ្វីៗជាការសម្រេចចិត្តរបស់ប្រជាពលរដ្ឋខ្មែរភាគច្រើននៅទូទាំងប្រទេស ហើយអ្វីដែល គ.ជ.ប គឺធ្វើក្នុងនាមជាស្ថាប័នដែលច្បាប់តម្រូវឲ្យរៀបចំការបោះឆ្នោតបម្រើប្រជាពលរដ្ឋ»។
នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិក លោក សំ គន្ធាមី ជឿថា នឹងមិនមានការធ្វើតាមសំណើររបស់គណបក្សខ្មែរឈប់ក្រឡើយ។
លោក សំ គន្ធាមី មានប្រសាសន៍ថា «មិនអាចទេបាទ! ព្រោះអីសូម្បីតែកាល ២០១៣ សង្គ្រោះជាតិសុំបោះឡើងវិញអត់បោះផង សុំរាប់ឡើងវិញក៏មិនរាប់ឲ្យផង ធ្វើបាតុកម្មចង់មួយឆ្នាំអ្ហើយ!»។
គណបក្សខ្មែរឈប់ក្រ ជាគណបក្សទីបីហើយដែលបានប្រកាសបដិសេធមិនទទួលស្គាល់លទ្ធផលបោះឆ្នោតនិងសុំឲ្យមានការបោះឆ្នោតឡើងវិញ បន្ទាប់ពីគណបក្សខ្មែរអភិវឌ្ឍន៍សេដ្ឋកិច្ចនិងគណបក្សរស្មីខេមរា ។ គណបក្សទាំងបីនេះជាគណបក្សក្នុងចំណោម២០បក្សផ្សេងទៀតដែលបានចូលរួមប្រកួតប្រជែងបោះឆ្នោតជ្រើសរើសតំណាងរាស្ត្រអាណត្តិទី៦ឆ្នាំ២០១៨នេះ៕