ជាពលរដ្ឋរស់នៅភូមិសែនសិរីមង្គល ឃុំក្រយា ស្រុកសន្ទុក ខេត្តកំពង់ធំ កាលពី៣ឆ្នាំមុន អ្នកស្រី សែម សំអាន អាយុ៤០ឆ្នាំ បានខ្ចីលុយពីស្ថាប័នមីក្រូហិរញ្ញវត្ថុមួយចំនួន១ពាន់ដុល្លារ ដើម្បីយកមកទិញក្បឿងប្រក់ផ្ទះ និងប្រកបរបរផ្សេងៗ និងជាពិសេសសម្រាប់ទុកមួយចំណែក ដើម្បីសងទៅមីក្រូហិរញ្ញវត្ថុ២កន្លែងទៀតដែលជាបំណុលចាស់។
ពីដំបូង អ្នកស្រីគិតថា គាត់អាចដោះបំណុលនេះរួចក្នុងរយៈពេល២ឆ្នាំ ដោយសំអាងទៅលើមុខរបបតូចតាចមួយចំនួនដូចជា ក្រងស្បូវ បេះគរ ការលក់លៀសហាលតាមម៉ូតូ និងសង្ឃឹមលើកូនៗ២នាក់ ដែលធ្វើការនៅកសិដ្ឋានចិញ្ចឹមត្រចៀកកាំមួយ នៅទីក្រុងភ្នំពេញ។
ប៉ុន្តែ ការយល់ឃើញរបស់អ្នកស្រី សែម សំអាន ខុសទាំងស្រុង។ អ្នកស្រីត្រូវជំពាក់បំណុលគេវណ្ឌក រហូតដល់ទីបំផុតត្រូវលក់ផ្ទះសងបំណុលគេ ហើយទៅស៊ីឈ្នួលគេនៅប្រទេសថៃថែមទៀត។
ទោះជាយ៉ាងណា អ្នកស្រី សែម សំអាន មិនមែនជាប្រជាពលរដ្ឋតែម្នាក់នៅក្នុងភូមិនេះ ដែលត្រូវប្រឈមមុខនឹងការដោះស្រាយបំណុលដ៏រ៉ាំរ៉ៃ បន្ទាប់ពីខ្ចីប្រាក់ពីស្ថាប័នមីក្រូហិរញ្ញវត្ថុ ក៏ដូចជាធនាគារនានានោះទេ។
ប្រជាពលរដ្ឋក្នុងភូមិឃុំជាមួយអ្នកស្រី សែម សំអាន ក៏ដូចជាប្រជាពលរដ្ឋដទៃទៀតជាច្រើននាក់នៅក្នុងខេត្តកំពង់ធំ និងខេត្តក្រុងនានានៅទូទាំងប្រទេសកម្ពុជាដែរ សុទ្ធសឹងធ្លាក់ខ្លួនដុនដាបជាងមុន ដោយសារជំពាក់បំណុលស្ថាប័នមីក្រូហិរញ្ញវត្ថុ ក៏ដូចជាធនាគារ។
ទន្ទឹមនឹងនេះ មូលហេតុដែលធ្វើឱ្យពលរដ្ឋនៅទីជនបទនៃស្រុកសន្ទុក ខេត្តកំពង់ធំ កំពុងជំពាក់បំណុលធនាគារកាន់តែច្រើននោះ គឺដោយសារពួកគេខ្វះចំណេះដឹង ការសម្រេចមិនត្រឹមត្រូវ និងការទទួលព័ត៌មានមិនច្បាស់លាស់តែម្តង។
១. ស្ថានភាពពលរដ្ឋដែលជំពាក់បំណុលធនាគារ និងមីក្រូហិរញ្ញវត្ថុ
នៅក្នុងបទសម្ភាសន៍ជាមួយអ្នកសារព័ត៌មាន អ្នកស្រី សែម សំអាន បានដំណាលរឿងរ៉ាវយ៉ាងពិស្តាររបស់គាត់ ដើម្បីចែករំលែកដល់ប្រជាពលរដ្ឋដែលមានបំណងចង់ខ្ចីថវិកាពីគ្រឹះស្ថានមីក្រូហិរញ្ញវត្ថុ ឬ ធនាគារ ដូចអ្នកស្រីជាបន្តទៀត។
អ្នកស្រី សែម សំអាន បានរំឭកថា ក្រោយខ្ចីលុយពីគ្រឹះស្ថានមីក្រូហិរញ្ញវត្ថុមិនប៉ុន្មានខែផង ប្ដីរបស់គាត់បានធ្លាក់ខ្លួនឈឺ ហើយចំណូលមួយភាគធំ ត្រូវចំណាយលើថ្នាំពេទ្យ និងការវះកាត់របស់ស្វាមីគាត់ ដែលបង្ខំឱ្យអ្នកស្រីរត់ទៅខ្ចីប្រាក់ពីអ្នកភូមិផ្សេងទៀត ដើម្បីទូទាត់ថ្លៃចំណាយទាំងនោះ។
ទោះបីជាកូនៗដែលធ្វើការនៅទីក្រុងភ្នំពេញ បានផ្ញើប្រាក់មកជារឿយៗដែរ ប៉ុន្ដែនៅតែមិនអាចសងបំណុលធនាគាររួចឡើយ ក្នុងខណៈដែលការចំណាយប្រចាំថ្ងៃកើនឡើងច្រើនលើសលប់។ ទោះបីជាស្ថានភាពជំងឺប្ដីរបស់អ្នកស្រីបានធូរស្រាលបន្ដិចក្តី អ្នកស្រី សែម សំអាន បានជួបប្រទះបញ្ហាមួយទៀត ដោយអ្នកភូមិដែលឱ្យលុយខ្ចីនោះ បានមករុះរើផ្ទះរបស់គាត់មួយខ្នង ដើម្បីដោះបំណុល។
រួចហើយ អ្នកស្រីបានសម្រេចចិត្តទៅស៊ីឈ្នួលត្រួសត្រាយព្រៃចម្ការនៅភូមិផ្សេង ដើម្បីរកលុយបង់បំណុល។ ប៉ុន្តែ ការប្រឹងប្រឹងរបស់អ្នកស្រី សែម សំអាន និងគ្រួសារមិនអាចជួយសង្គ្រោះលំនៅដ្ឋានជាទីស្រឡាញ់របស់អ្នកស្រីឡើយ ដោយទីបំផុត អ្នកស្រីបានសម្រេចចិត្តលក់ផ្ទះទាំងមូល ដើម្បីលោះបំណុលទាំងនោះ។
អ្នកស្រី សំអាន រៀបរាប់បន្ដថា នៅខែមិថុនាឆ្នាំ២០១៦ អ្នកស្រី និងគ្រួសារ បានធ្វើចំណាកស្រុកទៅធ្វើការជាកម្មករ នៅចំការខ្លឹមចាន់មួយ នៅខេត្តត្រាត ប្រទេសថៃ និងរកប្រាក់បានតែ២រយបាតប៉ុណ្ណោះ ក្នុងមួយថ្ងៃ។ ប៉ុន្តែ អ្នកស្រី បាននិយាយថា អ្នកស្រីបានធ្វើការនៅប្រទេសថៃមិនដល់៣ខែផង អ្នកស្រីក៏ធ្លាក់ខ្លួនឈឺធ្ងន់ ហើយម្ចាស់ចម្ការក៏បានបញ្ជូនគាត់មកស្រុកកំណើតវិញ។
អ្នកស្រី បាននិយាយថា ក្រោយត្រឡប់មកពីធ្វើការនៅប្រទេសថៃ ជីវភាពគ្រួសាររបស់គាត់ ក៏កាន់តែលំបាក និងមិនអាចរកលុយមកសងធនាគារឡើយ។
អ្នកស្រីបានត្អូញត្អែរថា៖ «ថៅកែថៃ គេគិតថា យើងមិនអាចធ្វើការឱ្យគេបាន រវល់តែឈឺ គេក៏ឱ្យត្រឡប់មកវិញ»។
ក្នុងខណៈពេលដែលអ្នកស្រី សែម សំអាន កំពុងដំណាលរឿងរ៉ាវដ៏កំសត់របស់គាត់ បុរសម្នាក់បានស្រែកសួររកមេភូមិពីខាងក្រោមផ្ទះរបស់គាត់ ដោយក្នុងដៃមានកាន់សឺមី និងឯកសារមួយចំនួនផង។
បុរសរូបនោះ គឺលោក កុយ ផាន អាយុ៥០ឆ្នាំ ដែលបានប្រាប់អ្នកស្រី សែម សំអាន ថាគាត់មករកមេភូមិ«ដងក្តា» ដើម្បីសុំចុះហត្ថលេខាលើលិខិតសុំខ្ចីប្រាក់ពីធនាគារមួយកន្លែង។ ទោះបីជាយ៉ាងណា លោក កុយ ផាន ហាក់ចៀសផុតពីបញ្ហាធ្ងន់ធ្ងរ ដែលបណ្តាលមកពីការខ្ចីបុលពីគ្រឹះស្ថានមីក្រូហុរញ្ញវត្ថុ ឬធនាគារនោះ។
នៅពេលសួរនាំពីរឿងខ្ចីលុយធនាគារ លោក កុយ ផាន ឆ្លើយតបថា គាត់ពុំដែលមានបញ្ហាអ្វីនោះទេ ទោះបីជាមានអ្នកភូមិជាមួយគាត់ខ្លះបានជួបផលពិបាកខ្លាំង ដោយសារខ្ចីលុយប្រើខុសគោលដៅ។
លោក បាននិយាយបន្តថា ពលរដ្ឋខ្លះ ដែលខ្ចីលុយធនាគារ និងគ្មានលទ្ធភាពសង បានបង្ខំចិត្តលក់ដី និងផ្ទះ ហើយក៏នាំគ្នាទៅធ្វើការនៅស្រុកថៃទាំងគ្រួសារ។
លោក កុយ ផាន ពលរដ្ឋរស់នៅភូមិសែនសិរីមង្គល ឃុំក្រយា ស្រុកសន្ទុក ខេត្តកំពង់ធំ
ពលរដ្ឋម្នាក់ទៀត ដែលរស់នៅឃុំក្រយា ស្រុកសន្ទុកនេះផងដែរ លោក ពៅ មឿន លើកឡើងថា ពលរដ្ឋក្នុងភូមិនេះ ដឹងតែពីចង់បានប្រាក់កម្ចី ដោយពុំសូវបានដឹងពីលក្ខខណ្ឌ ដែលធនាគារ និងស្ថាប័នមីក្រូហិរញវត្ថុកំណត់នោះទេ។
លោក បាននិយាយថា ចំណែក ក្រុមហ៊ុនឯកជនទាំងនោះ ក៏មិនបានពន្យល់លម្អិតដល់អតិថិជន និងក្រុមហ៊ុនខ្លះទៀត បានព្យាយាមបញ្ចុះបញ្ចូលពលរដ្ឋឱ្យខ្ចីលុយពួកគេទៀតផង។ លោករំលឹកថា មានគ្រួសារមួយ បានទៅខ្ចីលុយពីធនាគារចំនួន ៣ពាន់ដុល្លារ ដើម្បីទិញដីមួយកន្លែងទំហំក្បាល១០ម៉ែត្រ ជាប្រភេទដីលំនៅដ្ឋានក្នុងភូមិ។
ប៉ុន្ដែ ពួកគេមិនមានលទ្ធភាពសងត្រឡប់ទៅវិញឡើយ និងបាននាំគ្នារត់ចោលស្រុកជាច្រើនខែ ហើយកូនៗ ក៏បាត់បង់ការសិក្សាទៀតផង។
ពលរដ្ឋម្នាក់ទៀត ដែលរស់នៅឃុំក្រយា ស្រុកសន្ទុកនេះផងដែរ លោក ពៅ មឿន
២. ទោះបីប្រឈមមុខនឹងបញ្ហា ចំនួនអ្នកជាប់បំណុលចេះតែកើនឡើង
ក្នុងឃុំក្រយា ស្រុកសន្ទុក មានប្រជាពលរដ្ឋរស់នៅចំនួន ៣ ៤៥០គ្រូសារ ដែលក្នុងនោះភាគច្រើនជាកម្មករចំការកៅស៊ូ និងមានប្រាក់ចំណូលមិនលើសពី៧០ម៉ឺនរៀលក្នុងមួយខែ ហើយក្នុងនោះ ប្រមាណ ៧០ភាគរយ មានជាប់បំណុលធនាគារ និងមីក្រូហិរញ្ញវត្ថុ។ នេះបើតាមរបាយការណ៍ការិយាល័យស្រុកសន្ទុក ខេត្តកំពង់ធំ នៅឆ្នាំ២០១៧។
លោក កែវ ឆេង មេឃុំក្រយា ស្រុកសន្ទុក បានបង្ហាញក្ដីកង្វល់យ៉ាងខ្លាំង ដោយថាមានពលរដ្ឋកាន់តែច្រើនកំពុងជាប់បំណុលធនាគារ និងមីក្រូហិរញ្ញវត្ថុ។
លោកបាននិយាយថា លោកសង្កេតឃើញពលរដ្ឋភាគច្រើនមិនយល់ដឹងពីបញ្ហាមីក្រូហិរញ្ញវត្ថុនេះទេ ដូចជា ការយល់ដឹងអំពីកិច្ចសន្យា បញ្ហាច្បាប់ និងផលវិបាកនានា នៅពេលពួកគាត់មិនអាចសងត្រឡប់ទៅវិញទាន់ពេល។
លោក កែវ ឆេង មេឃុំក្រយា ស្រុកសន្ទុក
ដើម្បីទប់ស្កាត់បញ្ហានេះ មេឃុំក្រយា លោក កែវ ឆេង ស្នើដល់ក្រុមហ៊ុនឯកជន និងប្រជាពលរដ្ឋ ត្រូវជូនដំណឹងដល់អាជ្ញាធរ មុននឹងចុះកិច្ចសន្យាលើការខ្ចីប្រាក់ណាមួយជាមួយគ្នា។
លោកក៏ស្នើទៅប្រជាពលរដ្ឋ ឱ្យចូលរួមក្នុងកិច្ចប្រជុំនានារបស់ថ្នាក់ឃុំ ដើម្បីបានដឹងព័ត៌មានពិតប្រាកដ មុននឹងខ្ចីលុយពីក្រុមហ៊ុន។
លោក កែវ ឆេង មេឃុំក្រយា ស្រុកសន្ទុក
៣. អ្នកជំនាញផ្តល់អនុសាសន៍ថាពលរដ្ឋគួរខ្ចីលុយពីធនាគារក្នុងករណីចាំបាច់
នៅក្នុងរយៈពេល៥ឆ្នាំចុងក្រោយនេះ ប្រជាពលរដ្ឋខ្មែររាប់លាននាក់ បានរត់ទៅខ្ចីបុលពីធនាគារ និងស្ថាប័នមីក្រូហិរញវត្ថុឯកជន ដើម្បីពង្រីកអាជីវកម្ម បង្កើតមុខរបរ និងជំនួញ និងការទិញសម្ភារផ្ទាល់ខ្លួនជាដើម។
យោងតាមការស្រាវជ្រាវមួយរបស់ស្ថាប័នធ្វើការលើផ្នែកមីក្រូហិរញ្ញវត្ថុ Standards and Poor របស់សហរដ្ឋអាមេរិក កាលពីឆ្នាំ២០១៥ ឱ្យដឹងថា មានពលរដ្ឋខ្មែរតែ១៨ភាគរយប៉ុណ្ណោះ ដែលមានចំណេះដឹងផ្នែកមីក្រូហិរញ្ញវត្ថុ ហើយថា នេះជាមូលហេតុចំបងនៃការជំពាក់បំណុលវណ្ឌក។
អ្នកស្រាវជ្រាវផ្នែកសេដ្ឋកិច្ចនៅកម្ពុជា លោក ចាន់ សុផល ពន្យល់ថា ពលរដ្ឋមួយចំនួនធំដែលទៅខ្ចីលុយពីធនាគារ ឬមីក្រូហិរញ្ញវត្ថុ មិនបានស្វែងយល់ឱ្យបានច្បាស់លាស់ពីផលលំបាក និងលទ្ធភាពនៃការសងត្រឡប់ទៅវិញ មុននឹងខ្ចីប្រាក់នោះទេ។
លោកបាននិយាយបន្តថា ស្ថាប័នផ្ដល់ប្រាក់កម្ចីខ្លះ បានបញ្ចុះបញ្ចូលពលរដ្ឋឱ្យខ្ចីលុយពួកគេក្នុងចំនួនច្រើនដូចជា តាមរយៈការសម្រួលឯកសារកាន់តែងាយជាងមុន ការផ្ដល់ប្រាក់កម្ចីដោយពុំចាំបាច់ដាក់ទ្រព្យបញ្ចាំ និងការផ្ដល់ព័ត៌មានមិនបានគ្រប់ជ្រុងជ្រោយ។
ជាអនុសាសន៍ លោកបាននិយាយថា ពលរដ្ឋគួរខ្ចីលុយពីធនាគារ ឬមីក្រូហិរញ្ញវត្ថុ ក្នុងករណីចាំបាច់បានហើយ ដូចជា ដើម្បីពង្រីកអាជីវកម្ម មុខជំនួញ ការវិនិយោគ និងការបើកអាជីវកម្មថ្មីៗ។
មួយវិញទៀត លោកបាននិយាយថា អាជ្ញាធរក៏មានតួនាទីយ៉ាងសំខាន់ ក្នុងការផ្សព្វផ្សាយដល់ពលរដ្ឋ ឱ្យយល់ដឹងអំពីផលវិបាកនានា នៃការខ្ចីលុយពីធនាគារនេះ។
ដោយមើលឃើញពីការជំពាក់បំណុលធនាគាររបស់ពលរដ្ឋនេះ នៅដើមឆ្នាំ២០១៧ រដ្ឋាភិបាលកម្ពុជា តាមរយៈធនាគារជាតិកម្ពុជា បានដាក់កំហិតឱ្យធនាគារ និងក្រុមហ៊ុនឯកជន យកអត្រាការប្រាក់តែ ១៨ភាគរយក្នុងមួយឆ្នាំ ឬស្មើនឹង ១,៥ភាគរយក្នុង១ខែ បើធៀបនឹងឆ្នាំកន្លងទៅ ដែលយកអត្រាការប្រាក់ដល់ទៅជាង ៣០ភាគរយ។
ប៉ុន្ដែ បើធៀបនឹងប្រទេសជិតខាង អត្រាការប្រាក់នេះ នៅតែខ្ពស់ដដែល និងពលរដ្ឋនៅមានការយល់ដឹងទាបក្នុងកាកម្ចី មួយផ្នែកធ្វើឱ្យពលរដ្ឋនៅជួបបញ្ហា។ ករណីនេះ រដ្ឋាភិបាលអះអាងថា ដើម្បីការពារផលប្រយោជន៍ពលរដ្ឋ ទប់ស្កាត់ការជំពាក់បំណុលវណ្ឌក កាត់បន្ថយភាពក្រីក្រ និងជម្រុញឱ្យមានការប្រើប្រាស់ឥណទានឱ្យកាន់តែមានប្រសិទ្ធភាព។
យោងតាមអនុសាសន៍ដែលផ្តល់ដោយអ្នកជំនាញការ ប្រជាពលរដ្ឋក្រីក្រជាច្រើននាក់ប្រហែលជាអាចគេចផុតពីធ្លាក់ខ្លួនកាន់តែក្រីក្រតោកយ៉ាកថែមទៀត ប្រសិនបើពួកគេធ្វើការពិចារណាឱ្យបានល្អិតល្អន់ មុនពេលដែពួកគេខ្ចីលុយពីធនាគារ ឬស្ថាប័នមីក្រូហិរញ្ញវត្តុនោះ។
ទោះបីជាយ៉ាងណា សម្រាប់អ្នកស្រី សែម សំអាន ដែលជាពលរដ្ឋរស់នៅភូមិសែនសិរីមង្គល ឃុំក្រយា ស្រុកសន្ទុក ខេត្តកំពង់ធំ និយាយថា អនុសាសន៍របស់អ្នកជំនាញផ្នែកសេដ្ឋកិច្ច បានមកយឺតពេលទៅហើយ ពីព្រោះមិនដឹងពេលណានោះឡើយដែលអ្នកស្រីបានរើបម្រាស់រួចផុតពីសម្ពាធនៃបំណុលគ្រឹះស្ថានមីក្រូហិរញ្ញវត្ថុនោះ៕